والله مانسى نظرتك يـوم قفيـت
اليـن تنسـى كـل امٍ ضنـاهـا
لو شفتني من نظرتك كيف سويت
والله ان تمنى قبل هـذا عماهـا
حسبي عليك ارسلتها ماتوانيـت
احرقت قلبي وسط حامي لضاهـا
مادري هي الصدفه او انك تحريت
سددتها وابليـس يمـي حداهـا
فجرتها بالقلـب مثـل الدناميـت
الله واكبـر كيـف قلبـي قواهـا
والرِجل كنك ناثرٍ حدرها الزيـت
الرِجـل عيـت لاتثبِـت اخطاهـا
النظرة اللي في مداهـا تهقويـت
عدت على الهقوات قـوة مداهـا
والمشكله لاابديت فيها ولااخفيت
عجزت احدد يالغضـي محتواهـا
وراك من بين المخاليـق لديـت
دمرت قلبٍ سالـيٍ عـن هواهـا
ياليتني عن نظرة العين صديـت
ياليت ربـي فكنـي مـن بلاهـا
وانا الذي عن مارد البيض كفيت
رميت دلوي والرشا مـن وراهـا
استغفر الله والي العرش والبيـت
من نظرةٍ بان الخلل مـن رداهـا
الحمد لله كل ماصبحت وامسيـت
نفسي عن دروب الرذيله حماهـا
احمد بن عبدالرحمن العريفي
(نديم المجره)
رد مع اقتباس
المشاركة الأصلية كتبت بواسطة كحل المحاجر
المفضلات