كل عام وانتم بخير بعد الزحمه 
الدنيا كله اشغال ومتى مافضى الواحد لازم يخت على اخوانه
فهانحن ختينا عليكم واعذرونا على الغياب << محد دريبك ولحد نشد عنك
ان شاء الله هالسالفه تعجبكم
بما أن الأوضاع أعياد رجعت بي الذاكره إلى أوائل الثمانينات
وفيها من الملامح الطفولية البريئة الكثير و الكثير .
" سنة السروال "
سنة لاتنسى وماراح انساه نهائيا
"الله يذكرك بالخير ياشنقل وينك وين ايامك"
اذكر لابغينا نتروش<< طبعا يوم واحد بالشهر مخربينه نظيفين حيل
" نتروش بالعرية"
..
>>الناس الحضر يروحون يسألون قصوده عن المعنى
" دجت والله البدويه " 
..
جاني شنقل وانا جالس افكر بالجنيه الاسترليني :icon_lol: والضغوطات الدخيلة
عليه من الدولار الامريكي 
وكيفية التعامل
مع ناسداك
وقال ياولد الى متى وريحك كذا 
قلت اخس يازهور الريف من زين ريحك
انت لو يشم البعير ريح ابطك يسكر ويقوم لوه مناهق << معقوله
ماصدق الخبل وهو يشم ريح ابطه وهو ينصفر
ههههههههههه
وانا احط ابطي عند خشمه وهو يصحي
ههههههههههههههه
قال ياولد نبي نتروش ماهي سالفه قلت وشلون
قال انا اقولك
نتلفت شوي يمين شوي يسار
الا الوايت ماعنده احد والحوض مليان ماء
وحنا نروح نتمجغل بالحوض طبعا السروال مايحتاج لونه اشهب
ومتمغطين بالبراد معينين خير انا قاضب جهه وهو جهه
وبعض المرات شنقل يغرندز
ويحط يده بخشمه ويده الثانيه باذنه
ويدور القرش << الإيطاليين اقتبسوا الحركه من شنقل 
واحيانا يتزغلب بالحوض
وفيه نفيخات تطاير من الحوض كل ماتزغلب ما ادري وش يسوي
هههههههههههههههههههه
وحنا كذا متمجغلين الا الرعيان جابوا الغنم (واردين)
واقرب طلي وهو يعض سروال شنقل وهو يشقه
وانواع الدمان ولوه جعير الزعيم 
ومن هكاليوم وانا اسمي هالسنة بسنة السروال
حتى سرواله مازلت احتفظ به معلقه بمنظرة الوايت للحين
وباول هالفايت
رحت للوايت << سجع
وشفت سروال شنقل وانا اتهيض شعريا
وكتبت هالبويتات فاستلموهن واعذروني على التنسيق
[poem=font=",6,,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
ياحوض ياللـي تجمـع الوغدانـي = متى علـى الله نلتقـي مـن ثانـي
بشخصن على قلبي عزيـز وطيـب = مايلتـفـت الا عـلـى النيشـانـي
ياما سبحنا بحوض جـدي وجـدك = ويامـا تحدحدنـا علـى البيبـانـي
يجينـي جـدك طايـرن بالوايـت = وبعـد التجلغـف دايمـن يردانـي
باسباب شنقل صار وجهـي لوحـه = يازينهـا مـن كـثـرة الألـوانـي
ازرق مع اصفر صرت انا نصراوي = اسبـاب بقسـن خاطـف عجلانـي
وسنيـة الـسـروال لا ماتنـسـى = وشلـون ننسـى عضـة الطليانـي
مـازال سروالـه معلـق عـنـدي = بالوايـت اللـي صانعـه المـانـي
لاشفـت سروالـه وصـار بعينـي = اسـج واصنـع اجمـل الالحـانـي
مسـاك ربـي بالمحـبـه دايــم = ياللـي بطيبـك يشهـد العـدوانـي
ايـام راحـت بيـن ضحـك وفلـه = نلعـب مـع الاقصيـن والا الدانـي
شنقـل عشـيـري يابعـدهـم والله = ودعـتـك الله بــس لاتنسـانـي
مـع السلامـه يالعشيـر الغـالـي = استر على اللي شفت مـن نقصانـي
[/poem]
..........................................
[align=right]
ـ نسخة للمواضيع المميزة .
ـ نسخة لمضيف الشعر النبطي .
ـ نسخة لمضيف الأسرة والطفل قسم ترك الأطفال والآثار المترتبة على ذلك .
ـ نسخة لمضيف فيض المشاعر .
ـ نسخة لديوان شعراء المضايف وفتح قسم جديد بكتاب الأحاد .
ـ نسخة للاستراحة الأدبية حتى يكتب لغز عن سنة السروال .
ـ نسخة للزعيم شنقل بغيابه .
ـ النسخة الأصلية تختم بختم الولاية وتوضع في الخزنة .
[/align]
يعتمد
مشرف فلة حجاج
سناعيسو
اعذرونا على القصور وعلى الغياب
المسافر
.
.
" سنة الـ**** " ..عيديه ..
المشاركة الأصلية كتبت بواسطة ريال الفسحه
المفضلات