شبل الكرم والمعالي.......
المناسبه:
هذه القصيده اهداء للمقدم / محمد بن علي السديري (القحطاني) والذي كان له الفضل بعد الله في السعي لحل مسأله معقده جدا حيث قدم اجازه للتفرغ لهذه المسأله وفعلا استطاع حلها في آخر ثانيه من الوقت الضائع . ويستحق الثناء من قدم المعروف . آمل ان تنال استحسانكم ,,,,,,
يالله طلبتك والي العرش والبيـت .. يالله طلبتـك ياعزيـز الجـلالـي
تفزع لفـزاعٍ فـزع يوم ناديـت .. لبَى الندا شبـل الكـرم والمعالـي
يوم انها ضاقـت علـي وتوذيـت .. وصارت بعيني كبر خرم الخلالـي
واسودت الدنيا بعينـي وصديـت .. والروح يصلاها من الهـم صالـي
نصيت من فيه المراجـل توخيـت .. اللي على الفزعات مثل الهلالـي*
لقيت ابوفيصـل علـى ماتمنيـت .. مثل القمر فـي مظلمات الليالـي
شرحت له هـمٍ عنالـي وعديـت .. من بعد ماقـال ابشـر ولاتبالـي
واقسم بربه لفزع بكـل ماوتيـت .. والله ماذخر عنـك حالـي ومالـي
ويوم استبد الياس فيني ومليـت .. والوقت داهمني وضـاق المجالـي
حتى الآمل اصبح طريحٍ تقل ميت .. والياس عدى فوق روس الجبالـي
رن المسره وسط جيبـي ورديـت .. وسمعت صوتٍ للسديـري يلالـي
قال احمد الله كل ماصبحت وامسيت .. تسهلـت قبل انقطـاع الحبالـي
لاتحسب انـي يالعريفـي تخليـت .. نخيت لجلك أخوتي مـع خوالـي
والعـذر لله منـك بالـرد ابطيـت .. أخَر مسيل السيل كبـر المسالـي
كفيت ياولـد السديـري ووفيـت .. لله درك ياكـريـم الخـصـالـي
عـزالله انـك هقوتـي لتهقويـت .. ماخيب الهقـوات ذيـب المفالـي
ادعي لك الله كل ماقبلت واقفيـت .. عسـاه يغفـر ذنبـك اول وتالـي
وعسى الفرح لك دايمٍ وين لديـت .. عسى ضميرك من غثا الوقت خالي
يسعدك ربي كل مارحت اوجيـت .. عليك ستـر الله وخيـره متوالـي
تلقى الفرج بالدرب من وين لقيـت .. شرقٍ وغربٍ مع جنوب وشمالـي
*ابوزيد الهلالي
احمد بن عبدالرحمن العريفي
(نديم المجره)
رد مع اقتباس
المشاركة الأصلية كتبت بواسطة شاعر الاحزان
المفضلات