خويتي زعلانة؟ تبي زيت......

[أبوطروق]

السلام عليكم ورحمة الله وبركاته


إخواني وأخواتي الطيبين والطيبات (واللي ماهم طيبين لاسلام عليهم ولا إحترام)

وطبعا كلكم طيبين
----------------------------------------





هذا سلمكم الله البارح وانا ساري من الاستراحة ومتسحر اكالسحور اللي ماذقت مثله

جايبه لنا حدا الشباب من البيت واللي مسوي السحور اخته لأن مرته طامح عند اهله بسبب هوشة هي واخته(الي سوت السحور)

وبمثل هالمواقف تخبرون تكون الاخت مستانسة ومتشققه وتبي ترضي اخوة

وطبعا حنا المستفيدين

انا شبلاي شطحت عن الموضوع<< من حبك للفضايح



الوكاد وانا ساري للبيت حسيت ان خويتي ماش وصوته متغير علي


سألته: سلامات عسى ماشر
قالت: من والله عمايلك
قلت: افا وانا أبوطروق وش انا عامل
قالت: صارلك فترة لاتهتم بي ولا تشوف مستلزماتي ولا سألت عني الا يوم تغيرت عليك

يعني وشتبيني اسوي اصايح وادق بواري عشان تحس

ياخي انت إذا احتجتن تالي الليل او الفجر عمري قلتلك لا

بعز القايلة وبعز الرطوبة ماعمري رديتك خايب وكل ماطلبتن قلتلك سم


وانا مابي منك إلا شوية اهتمام بس ولا اخوياك بالاستراحة اهم مني



هنا انا نزلت دمعتي وحسيت بمعنى كلامة

ونزلت راسي للعداد وانصدمت







ماشية 6588كيلو


تصوروا 6588كيلو بدون لا ابدل الزيت
يعني مطوف 1588فوق اللي مكتوب بكتالوج السيارة


وانا ادنق على دركسونة وانا احبه وقلت (اسمحيلي يالغرام)

قالت "وفي صوتها حشرجة) وشو عقبه لكن امكنن امكنن وودن لأبو محمود خله يسنعن ترن دايخة وتسبدي تحوم

قلت ابشري وانا ابوطروق بس يخسا ابومحمود يفك صرتتس الحين ابي افللتس بانزين وبكرى مايردتس إلا الوكالة والله لاخليهم يدلعونتس ويلعفونتس من هالزيت والشحم يما تشبعين ويفحصونتس عن جميع الامراض الثانية ويرجعونتس لي عروس


قالت بيض الله وجهك وماقصرت يعني نروح البيت

قلت توكلي على الله

ورجعنا للبيت ونحن في سعادة
------------------------------------




يالربع حنا ليه مانفكر بسيارتنا شوي ونحس بحقه علينا من عناية واهتمام

يعني نبي يما تقفل معهن ويزعلن علينا

تروا اذا زعلن مهو من صالحنا


تخيل تبي تروح للدوام ولا عندك حالة طارئة وجيت تبي خويتك وقالت معصي واذا مو عاجبك طق راسك بالجدار

وبهالساعة مالك الا تروح ركض





ليه مانهتم بسياراتنا علشان اذا بغيناهن نلقاهن عند وجيهنا



طبعا انا وعدت خويتي أوديه للسوق قصدي للوكالة والحين اتحراهم يفتحون عشان اوديه وادلعه




تمت وادعوا ان الله ينتعه بالسلامة

وارجوا من الجميع التقيد بانظمة المرور
وربط حزام الامان (والتأكد من نفخ الايرباق قبل السفر)


:

[عبدالله الجعيثن]

تسلم على هالسالفه



عسى مايفكون صرتك يابوطرووووق

[قهر]

والتأكد من نفخ الايرباق قبل السفر



ابو طروق يعطيك العافية على هالسولافه

من هنا تأكدت انك رومانسي

[طلال]

:. ابو طروق .:

هههههههههه

رومانسي

[ابو خلوف]

[align=center]
مزبوط



دلعه على كيفك على هواك





وان مادلعت السياره اجل من دلع
[/align]

[أبوطروق]

تسلم على هالسالفه



عسى مايفكون صرتك يابوطرووووق

الله يسلمك ويبدزيك

ياهلا ومسهلا

اسفرت وانورت

شرفت الصفحة<< متأثر بالترحيب



حياك الله يابوجعيثن

وعسى هالوجه ماينفكله صرة






شكرا لمرورك

:

[أبوطروق]

والتأكد من نفخ الايرباق قبل السفر



ابو طروق يعطيك العافية على هالسولافه

من هنا تأكدت انك رومانسي

الله يعافيك اخوي قهر وشاكر لك مرورك الطيب




والرومنسية مطلوبة حتى مع السيارات

وانا ضد اللي يقول (موتري) لانه فيه خدش لرفرف اقصد لانوثة السيارة

المفروض يقول (سيارتي) مع ترقيق الحروف وإطالتها

:

[ابو عارف]

كلام خويتك صحيح والإهمال خطأ ولكن الإعتراف بالحق فضيلة والردة تعوض بالشردة والصيانة شيء أساسي لكل شيء والتدليع كماليات مطلوبة عند القدرة والنظام ملزم وإلا خذ مخالفتك وأدفع قوت عيالك للمرور.


شكراً لك على هالسالفة والحوار الرومانسي مع خويتك لاهنت.

[الشبث]

[align=center]
وانا اشوفهم رفعوا حق الرخص



ياخوي لاعاد تكتب انت وصرتك


قصد صرت سيارتك خخخخخخخخخ






ابو طروق

مهو لو انت كاتبن عن حقوق الزوجات اصرف

ولا لا


ههههههههه



بس ابي افهم شين



وش دخل فضيحة خويك تكتبه هههههههههه





وتقلد تحيتي
[/align]

[فتى البيداء]

ابوطروق ودك عقب هالمدح والدلع تطلع السيارة مازدا مديله واحد وواحدين ..

تصدق أول مرة أحس أنا السيارة له مشاعر وتحس (شكلك سامع شريط فكس أر عبدالله الفريسي الجربا) لا تقول لا .. يقول على لسان الدتسن (يوم أغتنا زتن تقل فضلة له ) ..

ابوطروق ما خليت شيء ما كتبت فيه موضوع قضن المواضيع عنا ..

شكراً ابوطروق وتقبل مروري .