[poem=font=",6,,normal,normal" bkcolor="transparent" bkimage="" border="none,4," type=0 line=0 align=center use=ex num="0,black""]
والـ LBC نشر الرذيله لها شعار=ام التعري شرها مستطيري
والـ ART فيها بلا كل الاعمار=مزابل فيها فسادً كثيري
[/poem]
قبل رمضان بكم يوم سير علي واحد من الجماعه مبطي علمي به وهو شغال بالرياض
ومن جلس كل شوي يسألن وين جدك ـــــــــــــ قلت وش لك به ؟
قال يابن الحلال ترن ماجيت اشوف زين صوابرك ــــــــــــــــــ انا ابي جدك بحاجه !!
قلت بالله ماهن جايزاتن لك صوابري ـــــــــــــــــ والله وانا امد رجليني واحط وحده فوق الثانيه <<<< كنايه عن اللكاعه!
وقلت اخلص من الاخر سلف مافيه
قال يابن الحلال تسانك تبي سلف عطيتك !!
انجز علي شف لي شايبك وينهو !
شوي ويجي جدي يقول وش بلا مناقركم واصل لاخر الدنيا؟؟
الوكاد جلس جدي وانا اقهويه ــــــــــــــــ وسأل ضيفي وش عندك ياوليدي توي جاي من قوم فلان ويقولون انك تنشد عني عسى ماخلاف !؟
قال لالا ياعمي ماخلاف بس بغيتك بلي حاجه <<<<< قاله وخدوده حمر
قال خير وش تامر عليه بس ؟؟
شوي الا وهدوء يسود المجلس !؟
واحس ان فيه لغه ثانيه غير لغة الكلام قاعده تدار بشكل غير مباشر !!
شوي الا والحواجب ترتفع فوق وكله تشير لي!
وهو يتنحنح جدي قال ايه ـــــــــــــــــــــ مصيول ياوليدي قم هات لنا ماء <<<<< محاولة تصريف!!
قلت ماعندنا ماء كله خلصـــــــــــــــــ شوي الا والمقداعه تمشي الفين
الوكاد نزولا عند رغبة الجمهور رحتــــــــــــــــــــ يوم رجعت الا وضيفنا ماشي !
قلت وين راح المروح ؟
قال جدي والله مامروح الا انت
قلت وش عنده ؟
اللي يشوف صوابره يقول جاين يخطب !
قال جدي ايه جاين يخطب
قلت يابن الحلال من يخطب ماخبر عندنا الا عنز لا ومضرع بعد
قال جدي ياعلك تخفى
الرجال يبيني اروح معه يبي يخطب بنت من بنات فلان !
قلت لجدي وانت شغال خطابه هاليومين ــــــــــــــــــــ هذا انا عندك لي عشرين سنه ولاتهيا تخطب لي
قال اقول فاردز عن وجهي انت وصوابرك لاقسم بالله اتمردغك !
قلت لاحووول وانتم وشبلاكم على صوابري اليوم
قال اقول لايكثر حتسيك بس ـــــــــــــــــ ورح هات لي بشتي يبي يمرن الرجال اللحين نبي نروح لهم !
قلت اجيب بشتي بعد علشان اخاويكم
قال انطق بهذا بس ماعلينا زود قراده
الزبده راحو ــــــــــــــــــ وحروة ساعه الا وهم ناكسين !!
قلت هاه بشرو اللولش ــــــــــــــــــ قال جدي لاوالله الا ابلع العافيه
افااا مهي هي تسحتكم !
قال الخاطب مار ماخطبنا منه تقهوينا وجيناـــــــــــــــــــ قلت ليه وش انتم رايحينن له ؟؟
قال جدي يابن الحلال هالدنيا عقوبه
شفنا لنا شوفه عند بابه واستخرنا عن هالخطبه :confused:
قلت تروكم طلعتو براسي نخله ـــــــــــــــــــــ تخبرونن شفاي لا تلعبون على الوتر الحساس عندي !
خير وش السالفه ووش اللي شفتوه علشان تهونون !!؟
قال الخاطب والله يامصيول يوم وقفنا عند الباب الا على وقفته ومعه اهله !
يقول الباب اللي من يمنا نزلت معه حدا بناته ـــــــــــــــــــ وياليتنا ماراعينا له
قلت ليه قشرا !؟
قال ماهو مبين زينه من قشاره ــــــــــــــــــــ بس تهولنا من لبسه هاللي تقل بامريكا
تنوره قصيره سيقانه طالعات ـــــــــــــــــ وبطنه طالع !!
والنقاب لثمه !!
ويوم شفنا الوضع كذا هونا وكنسلنا الخطبه !
قلت يارجل خيره خيره ـــــــــــــــــــ الحمدلله اللي شفت الوضع قبل لايصير شي !
قال جدي الرجال مايعرفنا ــــــــــــــــــــ وشك ان لنا حاجه وحنا استحينا لانمشي عقب ماحنا موقفين عند بابهتقهوينا وجيناك ناكسين !
الوكاد ان الوضع مزري ومتأزم جداً في ظل وجود اشباه الرجال اللي رمو الحبل على الغارب لخبلات همهن الموضه وش عليه هالسنه !
[poem=font=",6,,normal,normal" bkcolor="transparent" bkimage="" border="none,4," type=0 line=0 align=center use=ex num="0,black""]
تمشي على الموضه ولاهمها انكار=من ينكر المنكر وعنده ضميري
[/poem]
عسى الله يرحمنا برحمته ولايؤخذنا بما فعل السفهاء منا
وش طرا علي هالموقف اليوم ؟
سمعت لي شيله بصوت طفل روووعه خيال تحكي بالضبط ماسمعته
http://www.youtube.com/watch?v=9nKhW...eature=related
قد يقول قائل هالموضوع مكانه ماهو بالفله !؟
واقول لدي اعتقاد جازم بأن الفله بالنسبه لنا تحتوي على كل شي !
وبنفس الوقت تغني عن كل شي
وقريب ان شاءالله عندي وصفه طبخ وبالصور حصريا بالفله
وكل عام وانتم صايمين ان شاءالله
رد مع اقتباس
المفضلات