لا تفرح إن الوقت اسعدك واعطـاك
لابـد مـا سـود الليالـي تبكيـك
دنيـا تقلـب علـهـا مـاتـولاك
تمسي عزيز وتصبح من الصعاليك
إلى اقبلت تخفي عيوبك عن اعداك
وإلى ادبرت تظهر عيوبك لاهاليـك
اغنم من صروف الدهر كانه امداك
قبل اللحد عن ظاهر الارض يخفيك
وترى التشكي للمخاليـق يشنـاك
يحط من قـدرك ويفـرح امعاديـك
وكثر التشره يجعل الناس تجفـاك
ولاعاد تلقى بينهم مـن يخاويـك
ولا تمادى في زعل مـن ترضـاك
مادام جاء عاني على شأن يرضيك
والجاهل احـذر لاتجادلـه يبـلاك
في كلمة بيـن المخاليـق تعميـك
والهرجه العوجى لو انـه تنصـاك
حـاول تجاهلهـا وخلـه تعديـك
ولاتخيب هقـوت اللـي تهقـواك
مادام جاء بين المخاليـق ناصيـك
واحذر تهزا يافتى بخلـق مـولاك
تشوفهـا باقـرب قريـبٍ يواليـك
ولاتفرح بزودٍ على الحق وان جاك
زودك ترى نقصٍ على حق ذوليـك
وخل القناعه ميـزةٍ مـن مزايـاك
مع القناعـه كـل شـيء يكفيـك
وان جت لك الدنيا على غير مشهاك
اصبر ترى بالصبر تـدرك امانيـك
لا تأمن الدنيا ترى الوقـت فتـاك
لجا القدر كثر الحـذر مـا ينجيـك
احمد بن عبدالرحمن العريفي
( نديم المجره )
رد مع اقتباس
المشاركة الأصلية كتبت بواسطة عبدالله الجعيثن
المفضلات