ليلة كلها شبثان .. !!
ياهلا ومسهلا بكل من لفانا
اليوم بقص لكم سالفتنا مع الشبثان
وهي جمع شبث و الشبث كائن حي من فصيلة الديدان يتواجد ويتكاثر في
الصحراء ولي مزيد من الأستفساريرجى الأتصال بمشرف الفلة الشبث حيث
يعطيكم العلم الوكاد
هذا سلمكم الله كنا طالعين كشته للبر في ليلة جمعة ونص الشهر والقمر مكتمل والجو ربيعي عال العال
حنا وأخواني المتزوجين و أختي ورجلها الأستاذ فهد << مثل مايسمي روحه
مكتبر ومع الكبر ثقل وزن هوو الجسمي ماتفرق بينهم
الله يعينك يأخيتي على هالبلوه
بعد ماصلينا المغرب وشبينا النار و زينا الشاي والقهوه وتزين العلوم وطقة حنك نسائيه
مع الفصفص والحلا والفطاير وكل مالذ وطاب وحنا جالسين مال الشيطان طاري
وانا مندمجة حييييل مع سالفة ومركزه فيها بكل حواسي الخمس
مافطنت الأ وقولة مرت أخوي :
هديبا هديبا الشبث .. الشبث والعالم اللي جالسين على الحصير معي كلها تهج
وانا من الخرعه كان في أيدي كاسة شاي رمياتها بحيييييل ماعندي وأهج أخر
وحده طبعاً ... ياروح مابعدك روح
وأمي تقوم تدور عليه وهو يختفي فص ملح وداب
عاد قالت أميمتي بما أنها بدويه وذات خبرة طفن النور الدود يجي على النور
أول أنا عارضت بس أختي قالت كلام يخوووف خلاني أغير رأيي في غضون دقائق
قالت : يابنت والله الظلمة والخريعة ولا الموت
أنت عارفة أن الدود ليلة الجمعة أذا أكلكِ هنيا حنا وين والمستشفى وين بذا الخلا
ماتوصلي له الأ وأنت خلاص قضيتي
والله يوم سمعت هالهرج وأنا أغير رأيي و أفصل النور بنفسي
وأقعد أضحك على روحي وأقول : الله ماحلا النور الطبيعي على ضو القمر ويكفي يكفي بس
أن هديبا عندكم قمر على الأرض وقمر بالسما و أقوم أغني
( على بابي وأف أمرين واحد بالسما و التاني هديبا يخزي العين تفهم بالوما)
ونرجع لجلستنا الأولى مع أن الوضع فيه توتر وخوف شوي
ونقلط عشانا ونأكل وحنا كل وحده تلفت يمين شمال .. وتحسس بهدومها كل شوي
وعقب العشا جهزنا الشاي وخلاص ودنا نتقهوا الأ وأسمع صرخه تدوي في أرجاء الوادي
وأختي تردد الشبث الشبث هجن هجن
وانا يطير عقلي وعلى طول أدور أقرب سيارة أركب فيها
وأمي تقوم تهدي الوضع مهنا شي مهنا شي أرجعن تقهون والله وحنا نعي معصي نرجع
وحريم أخواني كل وحده خايفه على عيالها ونقوم على العفش اللي بالونيت ونزله
ونفرش حصريتنا بحوض السيارة وجلسه و لاطاري علينا المقعد بالأرض عقب اللي شفناه
وأقوم أهوجن أنا و أختي لكسر حاجز الصمت والذعر ..
ياملـي قلـبً تتلـه نـوف × × تل (ن ) على غير مصلوحي
تل الرشا والمقـام هـدوف × × تعرضـه كـل سامـوحـي
- وش رايكم بالصوت -
وأخوي يمر و يشوفنا وهذي قولته : الحــــمـد لله والشكر
الحين كل هالحماده مو ماخذتكن غير تجلسن بالحوض صدق ناس غجر
قلت : أنت هااااي يالحبيب بلاك ماشفت اللي حنا شفناه
وقال وش شفتن بالله ذيب عيونه حمر ولا ضبعه مسعوره ولا السعلويه اللي تمشي برجل وحده
>> يتطنز مسوي فيها بدوي ومتعود على البر
قلت لا والله الا شفنا شبث وش كبره تهجم علينا مرتين وأذا ما أحترم نفسه
الحذا قريبه وأنتم بكرامة << وين راحت هالشجاعه من شوي
يقوم يضحك و يضحك
قالنا هذا الحين يفطس علينا من الضحك
قال ما أقول غير مالت عليكن وعلى للي يأخذكن معه البر ..
ساعه بالكثير وحنا نسمع صوله عند الرجال
وانا أرسل واحد من عيال أخواني روح شوف ياابن أخي وش عندهم
ذوالي صحوا الورعان بصوالتهم وقولي
جا بالعلم ابن أخي فديته
قال عمه هديبا يقالون دوده مدري وش هي تولجتهم
وبعد نص ساعه الا والله قااايمين وكل واحد مشغل سيارته و ينوروا على مقعدهم
وزوج أختي سالب ثوبه ينفض فيه على الضو وينفض فيه وينفض فيه
أثاااري الشبث ملقي ثوبه هههههههههههه
وحنا نترقب الوضع من بعد كان عندي ولد أخوي ملسون قال :
الحين عمي فهد الدوده تضيع وسط ثوابه من كبره
وانا كاتمه الضحكه وأهاوش فيه عيب عيب عليك هذا في مقام أبوك
عقب هاليلة القشرا اللي ماذقنا فيها طعم الراحة من شبث رايح و شبث جاي
روحنا الفجر والصبح بعد مانزلنا العفش وقعدت أعزل فيه الأ وشبيث صغير
قاعد يتمشا بالصالة ويتعرف البيت الأخ
أثارينا ناقلينه معنا بالعزبه هههههههه
- ما يستفاد من هذه الليله القشرا:
1- أياكم والخروج للبر ليلة الجمعة وفي أماكن يشتبه بكثرة الدود فيها كالحمادة اللي كلها رمث
2- لاتسوي فيها حضري وتولع النور حتى ما يجيك الدود عليه ومافي أحلا من النور الطبيعي
3- لاتشمت بالغير ترا الشماته عاجله خصوصاً في موضوع فيه حياة وموت
4- لاتكذب على روحك و تدق الصدر - انا بدوي عزمي قوي - و أنت من جنبها
5- عقب أي قيله عليكم بنفض العزبه جيداً حتى ماينشب فيها أي كائن من هذه الكائنات المتوحشة
ودمتِ سالمين
رد مع اقتباس
...!
ياهاهاهاهاهاها
المفضلات