~مشكلة وهم~
والله ياجماعة الخير مادري وش اقول لكم ولاادري شلون ابدأ
موضوعي هذا المفروض احطه بمضيف هموم ومشكلات لكن قلت احطه عند ربعي اهل الفلة اللي فاهميني وفاهمهم ويحسون بمعاناتي
السالفة وما فيها نجيماتي الخمس اللي تحت اسمي واللي تعبت وشقيت يما جمعتهن
واللقب (فارس المضايف) اللي ماجا من فراغ وما خذيته إلا بعد غزوات وحروب ومعارك في سبيل مضايفنا
كل هذا يبي يروح بعد كم مشاركة وبكل بساطة إذا وصلت 2500مشاركة!
وبدال الخمس نجوم يبون يحطون لي نجيمة وحدة لا وزرقا بعد يعني ياليته الماسية كان تنبلع
وعقب ما انا فارس المضايف الذي لايشق له عجاج ابي اسير من حيالله ويحطون لي لقب (مضايف شمر)
وش هالظلم ياناس وش هالقهر
هذا بدال ما يرقوني!!!!!
تصدقون طرا علي قول الشاعر:-
(عقب الكدالك وتشكيل الفرود~ في زحمة السوق سرت امشي قدم)
والله مادري وش اسوي لكن الظاهر إني ابي اوقف مشاركاتي حفاظا على نجيماتي ولقبي اللي هن كل ما أملك بهالمضايف
إلا إذا ابوسلطان حطلي خمس نجوم زرق أو عطاني (خمس ورقات زرق) وعوضني بلقب يليق بمقامي وشخصي الكريم
بالله وش رايكم وش الدبرة
مابي احد يقول ههههههه أو خخخخخ ابي شورن طيب بهالمشكلة اللي طيرت النوم من عيني وطلعت براسي نخلة
وسلامتكن وتقلدوا تحية الشبث مع تحيتي
شفتوا من الغبن نسيت أقول السلام عليكم في بداية الموضوع
لكن يالله مع السلامة واسمحولي بالقصور
:
رد مع اقتباس
المفضلات