أحلام الليل يفسرها النهار .؟!
:
كل صبح وعقب ماينصرف كل اللي بالبيت لأشغالهم و مدارسهم
ومايصفا به غير أنا وأمي
أزين الفطور وأفطر معها ونسولف وتبدا هي الحوار وتقول :
والله يابنيتي البارح حلمة هاك الحلم ودي منك بعد ما نقضي من
الفطور وتقومي وتجيبي
كتاب تفسير الأحلام عشان تشوفي لي تفسيرة
وأقوم أيجيبه وأبدا أقراء : أذا رأى .. وأذا رأى .. وأما أذا كان
الرائي رجل
وأما أذا كان الرائي إمرأة .. وأما أذا كانت الرأية في الصيف ..
وأما أذا كانت الرأية بالشتاء
وأذا كانت بالليل .. وأذا كانت بالنهار .... الخ
وبعد ما خلصت من القرأة أحسه ما عجبها التفسير تقول : والله
مدري يابنيتي أحس ما فسر حلمي صح
أقولها : يمه هذا تفسير بن سيرين من قرون طويله وكل علماء
الوقت الحالي يعتبروه مرجع لهم وأساس
مافي فايده مصممه على رأيها ما أقنعها اللي قريته ... فقالت
شوفي تلقي في غرفتي على التسريحه
دفيتر صغير روحي جيبيه ... وأنا أجيبه وأتصفحه
وأنذهلت من كثر الأرقام الموجوده فيه ... وش ذي الأرقام
يمه ..؟!
تخيلوا كلها أرقام مفسري أحلام من المملكة وخارجها ..
وأعطيها الدفتر وأبي أمشي أحسب المهمه لحد هنا أنتهت
والله وهي تمد لي الجوال و تقول : هاك الجوال و يالله خذي
أتصلي على هذا المفسر ..
ونبداء شوط ثاني في محاولة تفسير هذا الحلم البداية كانت مع
العصيمي ... إلى أن أنتهينا
عند الشنقيطي ... منهم اللي مايرد .. ومنهم اللي يقول مشغول يصرف .. ومنهم اللي يفسر
الحلم أكثر من تفسير وحنا ضايعين بالطوشه
وبعد ما أقنعها ..
وأنا أقول لها يمه أنت وش ودك بصراحه يكون تفسير هالحلم ترا
مافي أحد الا أنا و أنت وسرك في بير
تقول تبي الصدق غديه معرس لوحده منكن >>> تبي الفكه
صدق من قال أن المعاريس ماتجي الأ بالأحلام في زمن شح الرجال
حتى خدمات تفسير الأحلام بالرسائل sms أجبرتني أكتب لها
هالحلم و أرسله .. وأنتم عارفين
مثل هالنوع من الخدمات أحياناً في حلم واحد تسحب من الرصيد
50 ريال
على بالكم كل هذا الجهد اللي بذلته معها في تفسير حلمها أقنعها
لا تماداها الراي وقالت : هذولي حقين الرسائل مايردوا الابعد
يومين أو ثلاث يصيفون علينا يا بنيتي
أنا أقول بما أنك تشتغلي على الأنترنت دوري لي إميلات مفسيرين
أحلام خصوصاً الشيخ سيد حمدي
يا أنها مدمنه على هالسيد حمدي اللي على قناة المحور ماتفوت له
حلقه
تخيلوا قضينا ساعتين وحنا نحوس بالحلم من الساعه 9 إلى 11
شي يضحك فعلاً
واللي يضحك أكثر .. مسكت جوالها أبي أشوف مدة هالمكالمات و
كم كلفه تخيلوا صرفنا
في ساعتين 150 بس عشان حلم قد يتحقق وقد لايتحقق .. !!
الله يعينك يا ابوي على الفاتورة أذا كل يوم نحلم حلم وكل حلم نبي
نصرف على تفسيره 150
كم بتطلع الفاتورة بالشهر ..؟!
ههههههه
والله أني أضحك على نفسي مدري وش لون طاوعتها وخليتها
تضيع وقت وفلوس على حلم ..!!
دائماً ما أدخل في نقاش حاد مع أمي عشان هالسالفه أقولها : يمه
صدق أن الرأيا و الأحلام
من الله وفيها تباشير خير أو تحذير من شر وهي رسائل من الله
لكن الأنسان ما يصير مدمن على تفسيرها وتصير هي شغله
الشاغل عن أمور أهم
هالـ 150 اللي صرفناها في تفسير حلم ممكن نتصدق فيها وتدفع
عنا بلاء أو مصيبه
وتقوم تعطيني محاضرة وتستشهد بأدلة من القرآن و السنه عشان
تبرر موقفها
أنا ما ألومها لأنها فعلاً صار عندها هوس تفسير أحلام لدرجة
الأدمان على كل برنامج يعرض له
وجمع أكبر قدر ممكن من أرقام مفسيري الأحلام
أمي ياجماعه 1 من بين ألف من النساء مهوسات في تفسير
الأحلام
والنسبه في أرتفاع مخيف مع تركيز وسائل الأعلام على مثل
هالنوع من البرامج للكسب المادي لا أكثر .
[ أسأل الله أن لا يشغلنا عن ديننا الا بما فيه خير لنا و للأمة الأسلامية ]
سبحان الله وبحمده سبحان الله العظيم
:
أهداااب
رد مع اقتباس
المشاركة الأصلية كتبت بواسطة منصور الغايب
المفضلات