النهارده الساعه 3 العصر وانا فى طريقى للبيت والدنيا زحمه وقفت فى اشاره مش عاوزه تفتح ابدا
زهقت قلت اطفى العربيه اصلها بتسخن واسمع الراديو اهى حاجه تسلينى
فتحت الراديو لاقت المذيعه بتقول اسيبكم مع اغنيه رزان مغربى الجديده قلت مش مشكله اى حاجه
ولاقيت حد بيغنى بس الظاهر انه عيان عنده برد
طفيت الراديو وقلت اغمض عنيه لحد ما الاشاره تفتح
غمضت عينى لاقيت حد بيخبط على الايزاز فتحت لاقيت عسكرى مرور طيب و كبير فى السن قلتله نعم؟
قالى انتى رابطه الحزام كده ليه وشكلك مخنوق
قلتله اعمل ايه ياعمو ما انت عارف المخالفات ومخنوقه من الى بيحصل
قالى انتى مجنونه انتى مش عارفه بالى حصل ولا ايه
قلتله حصل ايه يعنى
قالى افتحى الراديو بسرعه قلتله خير ايه قالى افتحى بس يابنتى
قلتله حاضر ياعمو
سمعنا المذيع بيقول:
بيان القمة العربيه رقم واحدتم توجيه ضربات قويه وعنيفه للعدو الاسرائيلى والامريكى ولقد تفاجا العدو بعدة هجمات متفرقه واضطر للاستجابه لمطالب الوطن العربى
بالانسحاب من القدس وغزه والعراق وتسليم الجولان لسوريا
انا مش مصدقه قالى على الراديو يابنتى
عليته على الاخر اهو ياعمو
بيان رقم اتنين
تم توحيد العملات العربيه الى عملة الدرهم العربى وفتح الاسواق العربيه والغاء الحدود بين الدول وسيتم العمل بهذا باكرا
بيان رقم ثلاثه
فى حالة توجيه اى مساعدات من الدول الاوروبيه لامريكا او لاسرائيل يتم منع تصدير البترول الى هذه الدول
انتهى ........انا مش عارفه اتكلم
ولا مصدقه معقووووووله قلت انا بحبك اوى ياعمو
انت مصدق ؟ قالى صدقى يابنتى خلاص ولى عهد الظلم ولى عهد الخزى والعار
ولاقيت الناس حواليه فرحانين وكانه عيد
قالى عمو صدقتى بقى فكى الحزام ده انتى بتمشى على سرعة 20 كيلو بالكتير فرحت ونزلت قلتله احكيلى بقى الى حصل ده
قعدت على العربيه وهو قعد يحكيلى
قالى امبارح بليل القوات الامريكيه فى العراق فؤجئت بهجمات عليها من الجيش العربى
ولاقت الصورايخ الايرانيه متوجهه ناحيه اسرائيل وقواعد امريكيه
اما بقى مصر فادمرت كل البارجات البحريه وحاملات الطائرات الى فى المياه الاقليميه بتاعتها
والخليج يابنتى وقف انتاجه من البترول والغرب قلبهم هايوقف خايفين مننا لحسن مش نديهم بترول تانى
امريكا واسرائيل لموا الدور وعند طلوع الفجر مش هتلاقى لا اسرائيلى ولا امريكى فى الوطن العربى
قلتله عند طلوع الفجر؟
قالى اه ادخلى بقى عربيتك من الشمس بكره الحاجات ترخص وتصلحى التكيف ده
انا من الفجر رايح ادور على ابنى فى العراق
دخلت وانا هاموت من الفرحه
وعماله اقول عند طلوع الفجر
شغلت الراديو لاقيت اغنية وطنى حبيبى الوطن الاكبر يوم ورا يوم امجاده بتكبر وانتصاراته ماليا حياته وطنى بيكبر وبيتحرر وطنى وطنى
غمضت عنيه وانا بحلم امتى الفجر يطلع يااه
ده انا اول حاجه هاعملها هاطلع على القدس اصلى ركعتين شكر لربنا
ايوه ماهو خلاص هاقدر اخد الباص وكام ساعه وابقى هناك
وهاقدر اروح العراق اسلم على اخواتى الى اعرفهم من المنتدى واساعدهم يبنوا بلدهم تانى
ده انا كمان هاروح سوريا اسلم على احبابى الى هناك اكيد هايقللوا سعر الطيران ماهو بقى خلاص طيران داخلى جو الوطن العربى
فضلت مغمضه وانا عماله اسمع اغنيه الوطن العربى
لحد ما لاقيت تخبيط جامد على الايزار ببص لاقيت ظابط
قلتله ايوه وانا مبتسمه قالى
صباح الخير ياستى
ضحكت قلتله لا انا ماكنتش نايمه حضرتك
قالى الاشاره فتحت من سنه وانتى نايمه؟
قلتله معلش فرحه تحرير القدس خلينى اسرح
قالى تحرير ايه ياختى ؟
قلتله ايه ده انت ماسمعتش البيان بتاع القمه العربيه
عند طلوع الفجر امريكا هاتخرج من العراق كمان
قالى والله؟
طب انزليلى بقى واركنى على جنب لما نشوف حكايتك ايه
استغربت اوى هو بيكلمنى كده ليه
قالى ايه ده الفانوس ده ماله مكسور ليه
قلتله مش انا الى كسرته ده اتوبيس نقل عام بس انا جبته ولزقته كده لحد ما السوق العربيه المشتركه تشتغل والحاجات ترخص
قالى كمان سوق مشتركه؟
بصيتله باستغراب جداا
قالى هاتيلى رخصك بقى
جبتهاله ولاقيته بيسحبها وبيدينى وصل قلتله لييييييه
قالى امن ومتانه
متانه ايه وامن ايه انت شايفنى ماشيه ب 3 عجلات ايه يعنى فانوس ملزوق ماهو بينور برده تفرق معاك ايه الشكل حرام عليك
قالى القانون كده
وسياتك بقى مش رابطه الحزام لييييه
قلتله ده انا فى اشاره والشارع اصلا واقف
قالى ادفعى غرامه فوريه
قلتله طب هاتقبل الجنيه المصرى
قالى ليه بتمشى بدولار حضرتك
قلتله لاء بس خلاص الدرهم العربى هايشتغل من بكره
قالى اااه درهم
انت بقى شربتى ايه النهارده
قلتله عيب حضرتك صدقنى القمه عملت كل ده
حتى اسال عمو الى كان هنا هو الى قالى خلاص عهد الظلم والخزى والعار هاينتهى عند طلوع الفجر
قالى وعمو ده كان لابس ابيض فى ابيض
قلتله لا كان لابس اسود فى اسود
قالى انتى هاتشتغليلى
قمة ايه الى عملت كل ده
ده الشمس هى الى عملت كده فى دماغك
ايدك على الغرامه والرخص
اديته الفلوس والرخص وانا مذهوله
هو فى ايه؟
هو انا كنت بحلم كل ده
يعنى اسرائيل لسه فى فلسطين
والامريكان فى العراق
والجولان مش رجعت لسوريا
ايه ده وفين عمو بتاع المرور الى كان بيكلمنى انا اتجننت ولا ايه ياربى
بركب العربيه وماشيه لاقيت عمو عسكرى المرور قاعد بيبع مناديل وهدومه مقطعه وحالته صعبه
قلتله عمو عمو انت فيييين
مش انت قلتلى عند طلوع الفجر امريكا واسرائيل هاتمشى والدرهم العربى بدل الجنيه ساكت ليه
راح بصلى من فوق لتحت وقالى امشى يابت من هنا
ركبت العربيه وشغلت الراديو تانى يمكن اسمع حاجه تاكد انى مش مجنونه
لاقيت اغنية بحبك يا****
سكت وعرفت انى كنت بحلم ومشييييت فى الزحمه والحر وانا بسمع بحبك يا**** و رابطه الحزااااااااام
يارب يجى اليوم الى ما يبقاش حلم
يارب تعجكم قصتى الى رسمتها بامانى مستحيله وواقع مرير لازم نرضى بيه
ولا ايه رائيكم
رد مع اقتباس
المفضلات