يقول ( خشان بن دغش بن جحفل من الرمال من شمر ) كنت صغير عمري حوالي 11 او 12سنة
واشوف عمامي الجحفل وابوي يغزون وودي لو اغزي مثلهم يقول بيوم من الأيام نبّه عمي عبدالله
بن جحفل بالمغزى قلت لبوي يايبه انا ابي اغزي مع عمي قال ياولدي انت صغير وتوك على هالأمور
يقول وانا اصر الا اغزي قال زاد هاك ذلولي ( العرفا ) اغز عليه قلت عطن البارود قال البارود شفه مع
راع البل ياجيتوه خذه ولدي منه يقول كأن ابوي هزبن بهالكلمه يقول انا عقب هالكلمه خلاص ما
ابي فود ما ابي الا بارود راع البل اجيبه واثبت لبوي اني رجل واني اقدر على مراجل الرجال واني
شجاع يقول يوم مشينا قال ابوي ( دغش بن جحفل ) لعمي العقيد ( عبدالله بن جحفل ) افطن
ياعبدالله لبناخيك تروه صغير ولا يعرف بعض الأمور لا يتدربى على اهل البل يذبحونه يقول وحنا
نمشي يقول يوم جينا ديار القوم ياوالله هذي البل يقول وحنا نغير عليه يقول ياوالله هذاك راع البل
عليلوه ذلول حمراء وهيذك البارود تلوح معه معلقه بغرابة الشداد يقول وانا اطلبه ابي البارود يقول
وانا اجانبه يقول ما قربت له يقول وانا اقعد امنعه باسم عبدالله ( جاي عند عبدالله بن جحفل ) يقول
عمي عبدالله اطلبن يوم شافن مطلبه يقول انا ونّعته شوين تقل بغى المنع ياما لحقنا عبدالله
يقول وهو يمنعه وهو يمانع لعبدالله قال عطن البارود وهو يمده له يقول يانا عندوه وانا اطلبه عمي
قلت الحذية ياعمي البارود تر ابو هزبن وقالي بارودك مع راع البل وانا والله ما اطلبتوه الا علشان
البارود ما ابي الفود من البل يقول وهو يعطينن ياه يقول وعقب ما خذينا البل وقسمنا اعطانن من
البل يقول يوم روحنا لاهلنا كاسبين وجيت ابوي ووريتوه البارود قلت تشوف يبه جبت البارود اللي
انت تقول يقول انا مكيف اني غزاي واني جبت البارود والكسب يقول قال ابوي ادري انك تجيبه ولا
كان معطيك البارود . يقول بعد ما كبرت عرفت معنى كلام ابوي كان قصده اني ما اقدر على البارود
وان صار كون او مرامي بيننا حنا واهل البل يخاف اني ارمي مع الرجال واحول مع اللي يحولون
واهلك او اذبح وانا ما اقدر على البارود .
السالفه نقل عن صاحب القصه نفسه سولفه علي قبل 15 سنة . هو توفي قبل 11 سنة رحمه الله . ارجو
ان تحوز على رضاالجميع . حرصت ان انقلها بأسلوب الراوي
وتقبلوا تحيات المطني
رد مع اقتباس
[/align]
المفضلات