وصف يوم الجمعة في مصررررررررررررررررررررررررر
السلام عليكم ورحمة الله وبركاته
سوف أبدأ بأذن الله الكتابة مع بداية كل يوم من أيام الجمعة ... حيث أن يوم الجمعة هو أفضل
الايام عند الله تبارك وتعالى ... وهو يوم يحمل فى نفحاته مشاعر الدفء الاسرى ...
حنان الام المضحية وهى تجهز الافطار وترتب البيت من جراء مذبحة سهرة يوم الخميس حيث
تناثرت مخلفات السهرة فى كل مكان بالبيت ..( لب .. سودانى .. اللى أتعشى وساب طبقه ..
واللى كان سايب كتاب كان بيقرا فيه ) بل وتقوم بتجهيز طعام الاسبوع كله ( حيث هى المرأة
العاملة المظلومة المطحونة والتى والله لو يشعر الرجال بكم المجهود الذى تبذله لوضع كل رجل
لزوجته تمثالا فى البيت ) !!!
** أصحى يا محمود ... الساعة باقت عشرة ... طبعا سهرانين للساعة 2
** لا .. سهرنا للفجر
** وطبعا نمتوا من غير ما تصلوا ؟!!!!!!!!!!
** يا ماما .. ليه الهجوم اللى على الصبح ده .. الحمد لله .. والله صلينا
** طب يالا قوم
** يا ماما ما تروحى تصحى البشر التانية الاول .. اشمعنى أنا اول واحد ؟؟!!!
** لا طبعا .. أنت الاول ... أنت الكبير
** لا انا لسه عيل.. أنا اصغر واحد وأعيل واحد فى البيت ... بس سيبينى نص ساعة كمان
** قوم يا محمود بلاش دلع ... عايزين حاجات الفطار .. الساعة بقت عشرة
وأنهض مستسلما لقدرى فهى طقوس أفطار يوم الجمعة .. احضار العيش والفول والفلافل والجرائد !!!
ثم يأتى صراع أفراد الاسرة على من يفوز بالعدد الاساسى من جريدة الاهرام ليكون له السبق فى
قراءة بريد الجمعة للاستاذ عبد الوهاب مطاوع ... ويستسلم أصحاب النفس القصير فى هذا
الصراع بالتصبر بالملحق أو بملحق اخبار السيارات !!!
** ياولاد يالا ... الفطار جاهز ... سيبوا الجرايد دلوقتى وابقوا كملوا بعد الفطار !!
وكما تعودت الاسرة .. نفطر سويا.. وهذا لا يتحقق الا فى هذا اليوم المفترج ... وما يلى ذلك من
توسل الاب بسرعة النهوض وعدم التأخر لان ثواب صلاة الجمعة ( قبل الخطيب ما يطلع على
المنبر )
**.. قوم يا محمود يااالا .. الصلاه حتبدأ .. قوم كفاية هزار مع أخواتك ... الثواب قبل الامام ما يطلع على المنبر!!!
**.. حاضر يابابا .. روح بس أنت أتوضا وحتلاقينى جاهز
** أنا رايح ألبس ... ولو مخلصتش حسيبك وأنزل !!!
** أول ما أنت تجهز حتلاقينى أنا جاهز
وطبعا ما يحلاش الهزار والضحك مع الاخوات الا بعد الفطار يوم الجمعة ...
**.. أنت لسة ما خلصتش الحكاوى بتاعتك ؟؟ أنا نازل .. سلامو عليكم
**.. أستنى بس يا بابا !!! دقيقة واحدة ...!!! عاجبكوا كدة !!!!
**.. ماما .. يا ماما ... مش عايزة حاجة نجيبها بعد الصلاه واحنا جايين ؟؟
**.. يابنى أنزل الحق الصلاة ... لما ترجع حبقى أقولك !!
...................... ................................ .....................................
أحبائى فى الله
هل أدركتم من اى نقطة أريد ان ابدأ الحوار
لا يسعد الانسان بالمكان ... وأنما يسعد الانسان بالانسان
وهو أول شئ تسلبه منك الغربة
من تحب
أحبائى فى الله
اننى اجهز أفطار يوم الجمعة ... أجهزه لنفسى ... كى افطر وحيدا
أقرأ بريد الجمعه للاستاذ عبد الوهاب مطاوع ... نعم .. فى الانترنت ... ولكن .. أين تعليقات
الاخرين ؟؟ ومع من سأناقش تلك التجارب الانسانية .. علنا نتعلم شيئا ممن علمتهم السنين
وأعتصرتهم الحياة !!!!
أجهز نفسى للصلاة ..
أقول لنفسى ...
ياااالا يا محمود ... بسرعة .. الثواب قبل الامام ما يطلع على المنبر
الله !!!!!!!!
هو انا حنزل لوحدى ؟؟؟!!!
مافيش حد حيستنانى لغاية ما البس وانزل معاه !!!!
ومفيش جرايد ... !!!!
ومفيش حد عايز حاجة أجيبها له بعد الصلاه !!!!
ايه دة .. ياخبر .. التليفون بيرن .. انا سرحت ولا أيه ؟!!!
** ألو ...
** ايه يا محمود .. أنت كنت نايم ولا اية ؟؟
** لا أبدا .. كنت بفطر ونازل أهو أصلى ... أشوفك فى الصلاة أن شاء الله
** جرى ايه يابنى .. انا مش بصلى الجمعة ..أنت نسيت ولا أيه ؟!! أنا عندى سيكشن !!!!
** اه صحيح .. هو مفيش حل فى موضوع السيكشن اللى فى ميعاد الصلاة ده ؟!! البروفيسور مش عايز
يديك ساعة تصلى فيها !!!!
** ما انت عارف ... غلبت معاه ومفيش فايدة !!!
** هو الجو أيه انهارده ... ؟؟
** درجة الحرارة 5 تحت الصفر ... ما تنساش تاخد الجوانتى والكوفيه
** أيه ده ؟؟ 5 تحت الصفر ... أزاى ..؟؟ ده انا كنت بحسب الجو دفا !!!!
** دفا !!!!! محمود .. أنت نايم ولا أيه ؟!!! دفا أيه يابنى !!!!! أنت فى ألمانيا
الدفا هناك ...
الدفا فى مصر !!!!!
** عندك حق ... الدفا هناك .....
الدفا فى مصر !!!!!
رد مع اقتباس
المفضلات