بسمـ اللهـ .. توكلتـ على اللهـ
الليل عدّا ولادري كيف قد عدّا
أذكر بديت القصيد وعفت مرقادي
لي زفرة ن من شديد الضيم تشتدّا
تسمع صداها بلاد الروم والهادي
ما مر في شاطي الآمال من مدّا
الجزر دايم عناوينه بالارصادي
حزني مفارق عيونه منبع الودّا
مزن الوله في خفوقي دوم رِِعّادي
الحال بَعده طريح الهم يتردّى
ما فاد به طبّ ن ولا حاجم ن فادي
أحفر بدمعي حروف اسمه على الخدّا
وارسم بصدري ملامح وجهه الهادي
أشوف زوله بعين أمّي ويمتدّا
على شريط ن بدا من يوم ميلادي
أعذب من الصبح في نيسان لا ندّا
هادي ينادي عليّ ومبسمه بادي
أشوف زوله ودمع العين ما هدّا
يسيل سيل المطر في غبّة الوادي
أشوفه يمد لي من شوقه اليدّا
تسبقْه يدّي من الأشواق تنقادي
أثْره سراب ن تلاشى هدّني هدّا
قمت اتحرّاه كود يعود .. ولا عادي
يا بوي بنتك على طاريك تنهدّا
كنْها بفرقاك تاطا جمر وقّادي
يا بوي يومي بدونك مظلم ن جدّا
وينك يـ شمسي يـ أمسي يـ اسعد اعيادي؟
يوم الفرح .... والفرح محجوب منسدّا
كنك حرمته بموتك ريحة فوادي
لبست ثوب الفرح .. والحزن يتعدّى
حلم اليتيمة بثوب ابيض وأولادي
الليل عدّا ... ودمع العين ما هدّا
من بعد ما غبت كيف اهنا بمرقادي؟
رد مع اقتباس
المشاركة الأصلية كتبت بواسطة كحل المحاجر
المفضلات