لقاء حصري مع : فيصل اللويش

[فيصل اللويش]

الشاعر والمشرف والاخ والصديق والجميل جدا نافع الطواله

تسلم على هذا الحضور الجميل والمميز

اما بالنسبه للاسئله

س1:- ماهي الألقاب التي اطلقت عليك ؟؟ وما هو اقربها لك ؟؟

ج1:- القاب عديده جدا واحصرها لك ( العملاق - شاعر الخفجي - شاعر المليون - قيثارة الشعر - هداج الشعر - فيصل الشعر - الذيب - سنام الشعر ......... الخ)

واقربها لنفسي حاليا هو مااطلق علي عربيا ( سنام الشعر ) وهناك عدة ابيات وصلتني من شعراء ومعجبين تكاد تصل الثلاثمائة رساله عن اطلاقهم لي لهذا اللقب واذكر منهم انت بالذات يانافع وحفظت ابياتك

[poem=font="Arial,6,,normal,normal" bkcolor="transparent" bkimage="" border="none,4,orange" type=2 line=0 align=center use=ex num="0,black""]
علموا فيصل بتقييمي حقيقه = ماهو تقييم التجاره والرسايل
ياسنام الشعر يانبضه وريقه = ماعرفنا الشعر قبلك والجزايل[/poem]

س2:- ذكر الشاعر والاخ بدر اللامي في لقاء معه ان شعراء النسخه الثانيه وقّعوا على اقرار بعدم التصريح ضد البرنامج لمدة ستة سنوات .. ارجوا توضيح هذه النقطه ؟؟

ج2:- الشاعر والصحفي بدر اللامي اصاب ولم يصب في ذلك والحقيقه هي ليس التصريح ضد البرنامج وليست ستة سنوات وانما هي عقد مبرم مابين الطرفين لفتره زمنيه طويله تضرب بثلاث وتنقص اثنين والحدق يفهم وهي عدم التصريح في اي شي لايهم المتابع


س3:- ماتبريرك لتقييم اللجنه المتدني .. بعد ان اثنوا عليك بعد المشاركه ثناءا لم يتخلله اي ملاحظه سلبيه ؟


ج3:- اترك الحكم للجمهور المتابع مع عنصر المفاجأة ممن ساعد في وضع الدرجه


امل ان وفقت في الاجابه

اخوك... فيصل اللويش

[نافع بن طواله]

يالربع سامحوني انا الاسئله بخاطري كثير حاولت اسجل بيوزر ثاني بس ماهي محرزه على قولة اخواننا السوريين

[align=right]
السؤال الاول مكرر : ماهي قصة مشاركة الطريفه في الكويت ؟

السؤال ثاني مكرر : ماهي قصة اختيارك للقصيده المشاركه ؟

السؤال الثالث مكرر : ماهي قصة الساعه الاخيره قبل الجلوس على كرسي المليون ؟

^
^
^
^
^

شفايه من قلب



[/align]

[ابو عارف]

شكراً ابو سلطان على إستضافة شاعر سنام الشعر شاعر المليون شاعر المضايف المميز/ فيصل اللويش .

سبقني نافع الطوالة وننتظر الجواب على أسئلة الشفاية.

شكراً لك فيصل اللويش ومزيد من التألق.

[المطنوخ]

بدايــة أبــارك لنفسي وجــودي وجلوسي مع شخصية كشخصية أبو طـلال

أبــوطــلال شخصية تمزج مابين رجولة الشمري الأصيل ونفسيه جميله مرحه تستاء عند مجرد إستئذانه للذهاب من مجلسك.

/

أبوطــلال حقيقه ..
بغض النظر عن سياسة البرنامج لكن والحق يقال أنه بوابة واسعه للشهره بشكل يغلب أي برنامج آخر معني بالشعر
برنامج يأتي بالشهره على طبق من ذهب للشاعر بشكل يجعل من الشاعر يرتقي أعلى مراتب الغرور .
أبــوطــلال جلست معه بعد البرنامج مباشر فكان والله أشد تواضعا مني لدرجة أني اعتقدت أني انا المغرور من شدة تواضعه

رفــع الله من قدرك يابوطــلال على هذه الخصله التي حُرم منها الكثير!

/

أبوطلال

أسألتي بخليها علشانك 3 أسئله ولا بالدزربه الموت الحمر



سـ/كيف ترى وضع البرنامج الآن وهو يسقط الأسامي الكبار في الشعر وللأسف كنت أنت في مقدمة الركبان
فهل تعتمد اللجنه في تقييمها على الشعر أم المحسوبيات؟




سـ/ برأيك انت كم تعطي نسبة للجنه في اختيارها للشاعر المتأهل؟



سـ/ هل إقصـاء شعراء شمر هكذا بفعل فاعل أم أنهم ليسوا على مستوى المنافسه ؟





/

ومضه!!
ترى ابوثوب ماعطانن شين

[أم نــــــــــواف]

ياهلا والله بالأخ الشاعر وممثلنا هناك ونِعم من مثّل أهله

الشاعر القدير ( فيصل اللويش )

كنّا نتابعك وكأننا نحس معك بأحاسيسك

حتى وصلت الى أننا نحسّك تتحدث معنا وتهمس بــ ( أنا أنتم )

ومانقول إلا عسى بالأمر خيره :

1- حينما صعدت الى منصة شاطئ الراحة صورة مَن مِن الأحبة أتت في مخيّلتك ؟

2- هل توقعت النتيجة بإحساسك ؟

3- من أوّل من إتصل بك بعد إلقاء قصيدتك على المسرح ؟

4- هل ستعيد الكرّة من جديد في دورة البرنامج القادمة ؟ وهل ستدفع أحبّتك للمحاولة ؟

5- ماذا أضافت لك هذه التجربة ؟ وماذا أخذت منك ؟


مشكور وبالتوفيق إن شاء الله


( شكرا مشرفنــــــا العام أبو سلطان )

[الاصمعي]

[align=center]ما شاء الله أبو طلال هنا

حضور للسلام ولتسجيل الشكر لأبو سلطان على حسن الاختيار وحسن التوقيت فأبو طلال هنا وسط محبي شعره وشخصه وكثير منهم يتوق لمعرفة تجربته في هذا البرنامج الشاغل للملايين .

الأسئلة كثيرة ولكن ليس الآن ولكن في وقت آخر وبعد أن يلتقط شاعرنا أنفاسه وحتى لا تتراكم عليه الأسئلة وسأكتفي فقط بالسلام والشكر للضيف والمستضيف

تحياتي[/align]

[فيصل اللويش]

الرائع نافع الطواله

اهلا بك مره اخرى

اما بالنسبه للاسئله :-


س1 : ماهي قصة مشاركة الطريفه في الكويت ؟

ج1:- قصة تسجيلي في الكويت لها حكايه اقرب من الخيال فعلا وكأنها مرسومه بفعل فاعل كان اول ايام التسجيل في الكويت يوم الجمعه ولمدة ثلاث ايام فعقدت العزم بعد مااخذت الموعد بأن اللجنه سوف تكون في الكويت يوم الجمعه في فندق الهوليدي ان وبعد صلاة الجمعه تغديت في الخفجي ( الاخ راعي طويله ) وذهبنا وكلمة ذهبنا معناها الجمع لان كان معي من الغاوين الواجد تقول رايحيين نلعب مباراه تقريبا الساعه 2 ونص طبعا مرينا الفحيحيل وحلقنا لين صارت الساعه اربعه ونص ورحنا الهوليدي ان بالسالميه ونزلنا ويوم دخلنا الفندق لان مابه احد خلي الله وكيلك ماغير هالبنطلونات تخافق ونراعي يامير مامن الوالي وحنا نسئل الاستقبال طبعا قال يالربع اللجنه في الفرع الثاني في مدينة الكويت طبعا الساعه الحين وصلت الخمس ونص طبعا انواع التنكيت في السوبر واحد يقول يالربع والله ان وجهها ماش مير نعود ابرك لاندعم تاليتها ماهي موفقه من اولها طبعا نتوقف في السياره اكثر من مره من شدة الضحك والنغزات وحنا واقفين في الاشاره وقفتنا دوريه طبعا شافونا نضحك ظنوا بنا الظنون وهات عاد ياضحك ويوم نزلنا سولفنا لهم السالفه قالوا الله يكفينا شركم وهات ياضحك في الشارع المهم ماوصلنا الا الساعه السابعه والربع تقريبا للهوليدي ان ويوم وصلنا يامير مالك محط رجل من السيارات والناس قال واحد من الربع يادافع البلا هذولاء شعراء والا حجيج المهم دخلنا الفندق وهنا بدت اليد الخفيه التي تحرك الاحداث وكأنها بفعل فاعل ولسوف اذكرها بالتفصيل مع ذكر الشخصيات وشخصيات هذه القصه من الاسماء المعروفه في عالم الصحافه والانترنت المهم دخلنا يامير العالم واحد ماله خلق الثاني والناس واقفه في الهول حق الفندق مامن كراسي اصلا ماكفت الكراسي واحد لاصق بالثاني قلت يالربع خلونا ناخذ زاويه وننتظر لين نشوف الوضع المزري هذا فعلا خذينا زاويه وجبنا قهوه ( راعين طويله الشعب ) وجلسنا نسولف ونطالع هالناس والا فيه واحد اسمه ماجد المري من اهل الخفجي وانا اصوت له قلت تعال ياماجد وش الوضع قال الوضع سجلنا اسمائنا من الساعه تسعه الصبح وانا رقم 22 ومايقبلون اليوم غير 37 اسم فقط وبكره كذلك وللحين ماسجلنا يافيصل حتى رقم واحد موجود ماسجل للحينواللي مسجلين لقائمة بكره 37 وبعد بكره 37 يعني خلاص وكلها تمت الساعه تسعه الصبح قلت وين اجل صليتوا الجمعه قال بالمسجد القريب هذا جنب الفندق تقريبا قلت امحق ليل وحنا متغدين في الخفجي وجايين ومحلقين تقول حنا اللجنه مو جايين نسجل المهم راح الرجال وفجأه يأتي الى رجل عرفني بنفسه قال انت فيصل اللويش قلت ايه قال يمكن ماعرفتني قلت اي والله ماعرفتك قال انا رعد الشمري صاحب موقع شعر نت قال وربي اني ادورك من سنه ابيك وماحصلت لك تلفون وش هالصدفه المبروكه وش عندك جااي قلت اسجل في شاعر المليون قال معقوله قلت اي نعم قال لحضه وفجأه الا رايح وجايب لي شهاب الاحمد صحفي في مجلة وضوح وعرفني عليه وقال شهاب الاحمد ايه مايحتاج فيصل معروف وشعندك قلت له نفس السالفه قال انتظر راح وجاب لي اوراق وعبيتها وماجد المري صور النماذج اللي عبيتها وللحينه في جواله قال تدري ليش يافيصل صورتك وانت تعبيء النماذج قلت لا قال انا حاس انك راح تكون ضمن الثمان واربعون احساس من شفتك قبل شوي على العموم عبيت الاوراق وانتهت مهمة شهاب الاحمد لان الاوراق ماتحصل عليها بالساهل
وقال لي الباقي عند فايز الزعل مدير تحرير مجلة وضوح قلت فايز الزعل هالاسم موغريب علي كأني اعرفه قلت وين هو الحين قال هناك قلت لايكون اللي عنده خلق الله ذا على العموم رحت له وسلمت عليه وقال مو انت فيصل قلت ايه ماتعرفني قلت من غير قصور مااذكر قال انا مسوى معاك امسيه بالجهراء قبل عشر سنوات قلت ياهلا وربي مااذكر وقام يرحب الرجال ويقول لي اني متابع كتاباتك في مضايف شمر طبعا وحنا نسولف الا في رجال عنزي وشمري واقفين جنبنا وكان معاهم واحد صغير سن وهم يسلمون علي ويعرفوني باسمائهم ( فيصل العنزي - بن لهيميد - وليد ذيب الشمري - ابن الشاعر المعروف ذيب الشمري ) المهم عزموني على قهوه واخوياي بزاويتهم للحين قلت يالربع الله يعافيكم طبعا الحين صارت الساعه تقريبا ثمان ونص المهم قالي فايز الزعل والله يافيصل انتهى التسجيل لليوم لكن راح احاول انزل اسمك بكره عطني الاوراق قلت شوي لين اشوف وكأن شي منعني من التسجيل او اعطاءه اوراقي ورحنا وجلسنا وشوي الا يجي بدر الضمني ويسلم علي ويجلس معانا وشوي وينادون باول خمسه اسماء مسجله لدي اللجنه للتسجيل وراحوا فوق الدور الرابع وحنا جالسين نسولف لان قولة ابن لهيميد ياولد انا شكلي استخرت عندي شغل بروح واجي بكره او بعد بكره ورقمي 35 ابي احط اسمك مكاني قلت لا الله يعافيك قال والله يافيصل مادام انت موجود موجود ليش ماتاخذ مكاني لاياخذه غيرك وهنا بدت المفاجأت وبعد هذا الكلام الا نازل شخص يدعى حسين من المصورين من الدور الرابع وراح له شهاب الاحمد وقاله فيه واحد بيمشي ورقمه كذا ونبي نحط واحد مكانه قال منو قال فيصل اللويش قال فيصل ماغيره قال ايه قال وينه وجا وسلم علي سلام معرفه وبحراره وقال انا من اشد المتابعين لك في الانترنت ماعليك اصبر شوي وراح وغاب تقريبا ساعه وحنا جالسين بمكانا وربعي في لازالوا في الزاويه ونزل بعد ساعه وقال سجلت اسمك رقم 37 لان فيه واحد انسحب وفعلا طلعت وطلع ابن لهيميد وسجلنا كلنا ورجعنا تقريبا الساعه 2ونص وكان فيه واحد قبلي سجل رقم 36 متنا عليه من الضحك ياهو خذا من اللجنه مايكفيه قبلي ( تبون الصدق بغيتي اهون من التسجيل بعد هذا ) لكن الله وفق وتأهلت للمرحله الثانيه واعطوني استمارة التأهل للمرحله الثانيه 0

تعبت

[فيصل اللويش]

س2 : ماهي قصة اختيارك للقصيده المشاركه ؟

ج2:- طبعا قبل التسجيل بشهر تقريبا وبعد طرح الفكره من اكثر من صديق وعلى راسهم سلمان النبهان وانا الفكره اصبحت شغلي الشاغل وكل يوم اجيب من هالافكار واقطع واكتب واحذف لين خلصت اكثر من كرتون اوراق لين جأتني ثلاث افكار تقريبا

الاولى الجوع والثانيه الحيا اللي تتبعه الناس والثالثه الامثله الشعبيه

وفعلا كتبتها بطريقه جديده لم تطرق من السابق ورجحت بين القصايد لين استقريت على الحيا اللي تتبعه الناس والفكره جديده طبعا وتتلخص في ( البدو لازم لهم حيا يتبعونه والحيا جايه من الحياه فحياة البدو عليها وكان الحيا اللي تتبعه العالم اول هو المطر الحين البدوي يفتح الحنفيه يصب الما وهذا من فضل الله ففكرت ونقبت في الافكار الا ان استقريت على الحيا اللي تتبعه الناس الان وكتبت القصيده حول هذا الموضوع وبهرت اللجنه لدرجه انهم منحوني ممتاز لانها فكره بكر جديده جدا


س3 :ماهي قصة الساعه الاخيره قبل الجلوس على كرسي المليون ؟

ج 3:- قصة الساعه الاخيره قبل شاعر المليون مامرت على بشر وربي يوم اختارونا ضمن الثمان لاول حلقه بعد ظهورنا جميعا على الهواء مباشره وماكنت متوقع اني راح اكون اول حلقه فكنت مصخن درجة حرارتي فوق التسعه وثلاثين ويوم طلعنا للمجلس الخارجي الاربعه الاخيرين لان رقمي سته بعد اليليلي وانا جالس الا فيه مصور مصري عنده كوب قهوه تقول راس بعير ومر من وراي وانعثر الخبل وكب القهوه كلها فوق غترتي وصارت تقول غترة اماراتي لونين بس والله حلوه الغتره لونين وابتلشت الله لايعافي عدوه وذهبت للحمام اغسلها ماكان عندنا وقت وباقي لي عشر دقايق اطلع على الهوا مباشره وانا رايح الحمام الا ومهدي ال حيدر طالع من الحمام قال عسى ماخلاف قلت ابي اغسل الغتره قال يارجال خذ غترتي مادامك طالع على الهوا مباشره وانا البس غترتك وفعلا استحسنت الفكره ولبست غترته بيض الله وجهه ( وكانت نحس علي ماله خاتمه المهم وبعد ماسجلت اصر قال مثل ماسجلت بغترتي وكانت فال ماش عليك ابي اسجل بغترتك بدوري وفعلا رفض اعادة غترتي لي واصر انه يسجل فيها وفعلا سجل بها في حلقته وتأهل وكل حلقه وهو يلبسها ( بنا بركه ياشمر )



امل اني وفقت في الاجابه


اخوك... فيصل اللويش

[فيصل اللويش]

شكراً ابو سلطان على إستضافة شاعر سنام الشعر شاعر المليون شاعر المضايف المميز/ فيصل اللويش .

سبقني نافع الطوالة وننتظر الجواب على أسئلة الشفاية.

شكراً لك فيصل اللويش ومزيد من التألق.

تسلم بابو عارف والله من الشفايه اللي عندك لو توزع على اهل المضايف لكفتهم

[فيصل اللويش]

الاخ والصديق

المطنوخ

بيض الله وجهك على هذه الالتفاته الكريمه منك

فمن تواضع لله رفعه - هذه حكمه طبعا ولن احيد عنها وعلى فكره واحد قالي تدري ليش طلعت من شاعر المليون قلت لا قال والله من حكمتك ( اللي مايقسم عسير ) قالوا هذا من اولها يدري انه ماراح يقسم له شي

اما بالنسبه للاسئله :-


سـ/كيف ترى وضع البرنامج الآن وهو يسقط الأسامي الكبار في الشعر وللأسف كنت أنت في مقدمة الركبان
فهل تعتمد اللجنه في تقييمها على الشعر أم المحسوبيات؟

ج1:- يطول الحديث في هذا الموضوع وكل انسان تظل له وجهة نظره الشخصيه ونحن بدورنا نحترم جميع وجهات النظر ولكن وجهة نظري الشخصيه ان البرنامج يخدم من يخدمه بغض النظر عن الشعر ونجح في الاثاره والتشويق وتوقع غير المتوقع فبرنامج مثل هذا لاتعرف ماسيكون فيه ولاتستطيع ان تجزم الى اين يريدون الذهاب به واكتفى بتلك الاجابه وحاول ان تفهم مابين السطور


سـ/ برأيك انت كم تعطي نسبة للجنه في اختيارها للشاعر المتأهل؟

ج2:- اللجنه عدة اشخاص وليسوا لجنه ولجنه ولو وزعنا النسبه على العدد لااعطينا كل واحد 15% لكل منتسب للجنه وواحد منهم 10%عاد كم هم احسبها


سـ/ هل إقصـاء شعراء شمر هكذا بفعل فاعل أم أنهم ليسوا على مستوى المنافسه ؟

ج3:- من وجهة نظري الشخصيه ان لايستطيع شاعر الدخول للثمان واربعون الا شاعر متمكن ولكن يبقى التوفيق في الخمس دقايق المباشره امام الجمهور وفي الاختيار للقصيده وفي الاسلوب واضرب لك مثل بسيط حتى استطيع التقريب مثلا فالح الدهمان لو تجلس معاه في استراحه اكثر من ساعه ماتطيح غترته من راسه اطلاقا ولكن في هالخمس دقايق طاحت وش معنى باختصار هي في التوفيق وشعراء شمر سوا كانوا الاولين او الذين في النسخه الحاليه جميعهم شعراء على مستوى رفيع جدا من الشعر ويشار لهم بالبنان وانا بوجهة نظري ان من بينهم من هو اهل للحصول على البيرق بدون منازع


امل ان اكون وفقت في الاجابه


اخوك... فيصل اللويش