بسم الله الرحمن الرحيم
* في البدايه احب ان اشكر الاخ ابو فراج على اهتمامه بهذا المضيف وسؤاله الدائم وانا ماكتبت هذا الموضوع الا تلبية لطلبه
* سوف اتكلم في هذا الموضوع عن شخصيه اشتهرت بالكرم والشجاعه ولاياتي اسم الكرم حتى ياتي اسم محمد (راعي الريشا) اللي هو جدي الثاني من ابوي . فسند السالفه من ابوي عن ابوه عن محمد راعي الريشا
* موضوعي سوف ينقسم الى اربعة اجزاء
الجزء الاول : في الكرم
محمد (راعي الريشا) هو محمد بن رشيد بن فلاح بن نامر بن سعدي بن فهيد بن سالم بن زميل. ويلقب ايضا بمحمد المويس وذلك لشدته في اخذ الحق للمظلوم .
طبعا محمد المويس اشتهر بالعطا فكان يعطي ولايبين لاحد لانه ماكان يبي من وراهن الاوجه الله تعالى ومع ذلك انتشرصيته وكرمه بين شمر, حتى انه لقب بمحمد راعي العطايا.
ومرت من المرات كانوا النمصان رحيل في فصل الربيع من الحزوم الى لينه متجهين شمال واثناء سيرهم تعرض لهم رجل وهم يسوقون الدبش والغنم والمظاهير وكل من رعيته وهم كثير ومن ضمنهم محمد المويس يسوق خلفته ومعه حواره وكان هو الاقرب له من الرحيل, فسلم عليه وقال منهم العرب .قال وش حاجتك . قال ابي النمصان: قال محمد هذولا هم النمصان. قال الرجل ماتعرف محمد ابن نامر (والرجال مايدري انه يحكي مع محمد ) قال محمد : وش تبي منه , قال الرجل : يذكر انه راعي نية حسنه وراعي خير ويعطي (المنيوب ) يعني المحتاج, واناتركت عيالي واهلي ماعندهم شي يسكنون به حاطهم بلي (عنه) والعنه هي مجموعه من الحطب , قال محمد : هذه خلفتي خذه هي وولده وهو يقمز الرجل ويحب راس محمد وهويحب عينه ويرفع يديه ويدعيله, قال الرجل : هو انت محمد ؟ قال محمد خذه ولاتسئل, قال انا اسالك بالله هوانت محمد راعي العطايا . قال محمد : ايه انا محمد , وهو يروح الرجل ولاابعد وهو يرجع , قال يامحمد: عباتك على الخلفه , قال محمد : خذه ماهي اغلا منه
هذه هي قصة محمد مع هالرجل . وانا نشدت عمامي وهالشيبان عن هالرجل منين هو قالوا لي : انه عبدي
والقصيد بمدح محمد راعي الريشا كثير لكن انا اخترت لكم قصيدة صالح بن صلفيق بن رمال لانه تطرق لهالسالفه هذي بعينه....
اسم على مسمى لياقيل زحزيح *** زحزيح زحزيح الرجال ونطيحه
فعل ابن نامر واضح دون توضيح *** والفعل برهان العلوم وصحيحه
يامسندي يابن الرجال المفاليح *** اهل العلوم الوافيه والفليحه
نمصان للعدوان قوم ذوابيح *** قوم عدوها عن حماها تزيحه
من اولاد الازمل مدركين التماديح *** اهل الوفا واهل الكفا والنصيحه
جموع لياشان الدهر له نواطيح *** اهل كريمات الرباع الفسيحه
واليوم يانسل المويس الزحازيح *** جدك بوقته عاش وادرك مديحه
ماهمته دنيا بجمع المرابيح *** بدورن يبين طيبه من شحيحه
عطى العباة وخلفة النوق طحطيح *** للعاني اللي جاه يطلب منيحه
يوم العفون عن اللوازم مدابيح ***ماخصهم والذم ماقوى استبيحه
ماذم خلق الله ولااقول تجريح *** ولاحب ذكر اللي يجيب الفضيحه
اعطي مثل وانا صريح التصاريح *** ولااحب تزويد العلوم السطيحه
اشوف يازحزيح بك هبة الريح *** طيب النبى وللضيف تذبح ذبيحه
على فعل جدك وشبوحك مشاويح *** وياعل حظك دوم في هب ريحه
بليا هدف قلته ولااقول تلميح *** القرم مثلك له تجود القريحه
والاجزاء الثلاثه الباقيه ان شاء الله سوف اتكلم فيها عن شجاعته رحمه الله واخذه للوجب ثلاث مرات وسوف نفصل كل معركه في جزء
هذا وتقبلو تحياتي : الفقير الى عفو ربه
رد مع اقتباس
المفضلات