ركني الهادئ ،، بشير اللويش

[بشير اللويش]

،،،
،،

،

كان البياض برحلتك ،، فاذكريني

ذكرى جميله بين تلعات الارقاب

قولي لهن يا بنت : ... ( لا ما نسيني )

لكنها الدنيا ... متاهات وانشاب


الراسي

[بشير اللويش]

...
..

لا تنتظر ان كان ودّك تسافر

لأني معك من وين مارحت خذني

الراسي

[بشير اللويش]

،،
،

بعد غياب اضطراري بسبب ظروف العمل والدراسه

عدت والعود احمد ،،، وان شاء الله سأكون متواجدا هنا

..
.

" سـِكـّة الغيّـاب "

حاضر على شان المعزّه ولا غبت

وان غبت غصب وكلّ قرم ٍ درابي

البعد قرّبني لذاتي وقرّبت

ديمومة ٍ هلـّت شعر في كتابي

هتـّانها اروى ظما يابس النبت

حتى نما فكري بزهرة شبابي

تشهد ملامح سيرتي وان تغرّبت

تبقى المراجل والقصايد زهابي

في سـِكـّة الغيّاب مهما تعذ ّبت

اصبر واكافح وآتناسى عذابي

ولو قالوا العذّال عني تغيّبت

يكفي حضور اللي سأل عن غيابي

اصدق معه بالوقت ما قد تلاعبت

وصيّة الوالد على اللي هقابي

( لا تخيّب العاني ولا تندم إن طبت )

والطيب يبقى في عزيز الجنابي


بشير اللويش

[بشير اللويش]

حايل ،،، غلا شمـّر (سامريه)

،،،
،،
،


حايل غلاها بالضلوع

محد ٍ قواه وزعزعه

في غيرها ماني بقنوع

نفسي بها متولـّعه

دار ٍ بها كل الربوع

شمـّر يا عز اللي معه

من يومها فقر ٍ وجوع

بالنايفه متربـّعه

الشمري ما هو بجزوع

من ضيق والا من سعه

الاصل ثابت والفروع

فوق النجم كالاشرعه

حاتم ترك فيها طبوع

مضرب مثل ما اروعه

الموقده تدعي الجموع

بين الجهات الاربعه

للضيف كيف ٍ مع قدوع

وصدور دوم مشرّعه

بـشـير اللـويـش

[بشير اللويش]

ذكرى الملهمة

،،،

،،

،

أخشى مع الايام تدله وتنسان

وانا الذي ما يوم رحت ونسيتك

حتى ولو حالت مسافات واوطان

( تركت كل الناس لا جلك وجيتك )

في دنيتي ما فيه غيرك ولا انسان

انت الوحيد اللي حياتي عطيتك

قلب ٍ سكنته ما به أيـّاة سكّان

قبلك ولا بعدك وهـالبيت بيتك

يحق لك لا صرت بالعرش سلطان

تامر وتنهى فيه كلـّي فديتك

عهد ٍ علي والله لو كان ما كان

ما أتركك والله يوم ٍ لقيتك

الهامي النابض باحاسيس وجدان

بوحي تفجر جم مهما رويتك

واقع مع الاشعار ورده فـــ بستان

صدري .. وفي اقواس صدري حميتك

مشاعرٍ ترجح على كل ميزان

يا قمـّة الدنيا وحيـّك وميتك

تكفى طلبتك لا يجي يوم تنسان

( يكفي تركت الناس لا جلك وجيتك )

بشير اللويش .. ابو سلطان

[بشير اللويش]

،،
،

سمّـي علي .. بعد البطا لا لفيتي

خايف اطيح من الفرح في قبالك


الراسي

[بشير اللويش]

صمت المطار
،،
،

الرحلة اللي طوّلت في وصولها

ابنتظر هتأّنها من هطولها

آحث وقتي وآترقّب عقاربه

شابت مداراته على اوّل خيولها

في صالة ٍ ما شدّة العين يمّها

ماهمّها عرض الاوادم وطولها

عيني على بوّابة ٍ ما تشرّعت

متى آتبشـّر تنفتح لي قفولها

ابي آتنفس شوفت اللي تحرّيته

بعد الملل والصبر كلمه بآقولها

ان سافرت وان جات تبقى حبيبتي

من ليلها الحالك لطقـّة حجولها

بشير اللويش ... الراسي

[بشير اللويش]

،،،
،،
،

نامي على كف الأماني والأحلام

وكانك صحيتي عيشي الحب فيني

فارس تحدّاه الليالي والايام

آقف لها لو عاندتني سنيني

في عون ربي والعزيمه ،، والالهام

بوح ٍ تفجّر بين قلبي وعيني

بشير اللويش

[بشير اللويش]

،،،
،،
،

وتقول: لا يا بعد حيّي

ملّيت من ناسك وناسي

الحر لا هب على فيّي

ما فيه غيرك على راسي


بشير اللويش ... الراسي

[بشير اللويش]

،،،
،،
،

وتقول: لا يا بعد حيّي

ملّيت من ناسك وناسي

الحر لا هب على فيّي

ما فيه غيرك على راسي


بشير اللويش ... الراسي