زبنت دارك يا وريث الحـــــــلاحيل = والمشكله وشلون ناصل ديارك
زبنت طيبك والوفا والــــــــفناجيل = ودلالك الرسلان ونشوة بهارك
زبنت وجهك يا ربيع المخـــــــاييل = ما خاب رجل ٍ من عطاك استجارك
جيتك وانا خيولي غريبه وعواجيل = فوق الورق تحكي لكم عن مهارك
جيتك وانا طيارتي خاوت سهيل = تبي الاذن منك الهبوط بمطارك
يا ملهمات الشعر فزعة هل الخيل = نبي البكار اللي تظاهي بكارك
سلام يا شيخ به الطيب كالنيل = وأستغفر الله ما يرد اعتبارك
النيل نجهل ليه يجري شماليل = والا انت تروي سيرتك عن مسارك
( ابوطلال ) اللي طوالي المحاحيل = تعتق ضمانا رشفة (ن) من بيارك
انتم سندنا لا طوتنا الغرابيل = يا حي فال اللي عنالك وزارك
يا مركز ( ن )حوله تدور الرجاجيل = مثل الكواكب تزدحم في مدارك
جيتك وانا خلفي من الموت والويل = كلي امل القى وطن في ديارك
وما قلت شعري يشهد الله تمثيل = في شانكم او في الرجال نتبارك
ما قلته الا في (الوجاعا ) المشاكيل = ذا مجدهم تاج (ن)على الراس بارك
ذا صيتك اللي فايح(ن) فوحة الهيل = تزكم انوف اهل الردى بأنتشارك
ويا بن الوفا مالي على الناس تحميل = شفت المصاعب تضمحل في مسارك
ويا بن الوفا ماني سواة المجاهيل = اللي سوالفهم حوالي المبارك
حنا ليا من يصفق السيل بالسيل = تلقى بشاشتنا بعجاج المعارك
( عوارف ٍ) صيداد من نسل ال (عجيل) = من راس صبحي ما نهاب المدارك
ونذر(ن) علينا ان جابها الله على الميل = اني لحّج البيت وآقف بدارك
وسلام يا طود (ن) من الجود حلحيل = متعطّر (ن) منا بعمّ وتبارك
من ديرتي لدار الوجاعا المداهيل = الله يقرب ديرتي من ديارك
بقلم/ ثامر بن أعجيل
رد مع اقتباس
المفضلات