حبني والله مهو نفس بقعاوي

**فواز الغسلان** · 02-12-2007 07:00

(( حبني والله ماهو نفس بقعاوي ))

في عام 1411 للهجره كنت راكب مع الاخ العزيز بايق بن سعود الخمسان الذي عرفه

الكثيرون بمواقفه المشكوره في الاصلاح وحل اختلافات الناس لما يمتلكه من حسن منطق

وحسن تصرف حفظه الله وكنا نتمشى داخل مزارع بلدة القاعد شمال مدينة حائل فمررنا من

عند مزرعه وفيها شايب كبير بالسن كان معه مخلب ويجرد احدى الغرايس من النخل فتوقف

الاخ بايق وقال ابوفهد هل تعرف هذا الشايب قلت لا قال هذا مقبل بن حشاش التبيناوي اللي

يقول ( كان لك بي يالغضي مثل مالي بك000حبني والله مهو نفس بقعاوي ) قلت جابه الله

ابي اسمع منه سالفة هالبيت اللي اشتهر مع الناس كله000

كنا بالشتاء وعلي فروه وعندما اقتربت منه تلثمت وتقنعت بالفروه وعندما اصبح على بعد عشرة امتار

قلت له - اللي ببطنه شي للناس مايطلع للمزارع وهو يخبرهم وراه - وهو يلتفت يراعي لي فأذا

هو يرى شخص متخفي واكيد عنده شر فقال وش في بطني لك يارجل قلت وش تخبر ببطنك لاهل البلدات

اللي حولك فقال والله مااخبر غير طلب واحد لاهل بقعاء يوم اقول-الله ماهو نفس بقعاوي- قلت وصلت

على خير وهو يضحك فقال انت ابن غسلان قلت ايه نعم فتسالمنا-وهي اول مره اراه-ودخلنا نتقهوى فقال:

عشقت زوجتي ام فواز -وهذي هي وراء هالجدار وتسمعك-وحنا شباب وتفضخ راسي معها وكنت ودي اشوفها

واسولف معها لو ساعه ولاحصل0 ويوم من الايام طلعت هي مع الغنم وقلت فرصه وانا اروح وراها ويوم جيتها

سلمت وهي ترد علي وكلمه مع كلمه صار وجهي وسيع شوي وقلت ابيك تعطيني حبه-بوسه-قالت انزح وراك

قلت ماهي ضارتك هالحبه قالت الا وقلت ليش قالت ننشاف يقول وانا اراعي يمين ويسار ماحولنا احد فقلت وشلون

ننشاف وحنا ماحولنا الا هالمعزى والصخول فقالت لا انا اخاف من رب المعزى والصخول يقول قلت -يابنت الحلال

الله غفور رحيم ماهو بقعاوي ادنى ماازعله-يقول وهي تسوق غنمه وتمشي وتتركني واقف فقلت:

[poem=font=",7,orange,bold,normal" bkcolor="black" bkimage="" border="none,4," type=2 line=0 align=center use=ex num="0,black""]
مـن جـوابـك ياحبيبي وترحـيبك=اشهد انه طاوي(ن)حالي الطاوي
اشـهـد انه مانوى القلب تجـنيبك=لو يقولون الـعـرب تـايه وغـاوي
كان قـلبك صافي(ن)واهنيي بك=بـس ابـيـك وباقـي الناس للهاوي
البلاء ويـن المـظـاعين تـدوي بك=شيب عيني وان عـوى دونك العاوي
كان لك بي بالـهـوى مـثـل مالي بك=حـبـنـي والله مـهو نفس بقعاوي[/poem]

واشتهر هذا البيت عند الناس وهم يحسبونه ذم وهو بالعكس مدح لان الرجل اللي مايزعل وتثور نفسه مافيه خير00

فضحكنا على هالسالفه وقام يقصد علي لين غابت الشمس وبايق مصلح القهوه في بيته وينتظرني لكني نسيته من الظهر

لين المغرب يوم لقيت السوالف والقصيد00 وتوفي بعدها رحمه الله تعالى ولم اراه سوى تلك المره التي لن انساها ابدا000

**ريم شمر** · 02-12-2007 09:13

كان قلبـك صافي(ن)واهنيـي بـك
بس ابيك وباقـي النـاس للهاوي

قصه وقصيدة بغاية الجمال /

تسلم فواز الغسلان //

**صلفيق** · 02-12-2007 12:30

بيض الله وجهك يابو فهد على هالسالفة اللي حلت رموز وطلاسم.

بالفعل كثيرا ماسمعت بهذا البيت الأخير ، ولكني ماكنت أعرف السالفة.

إيضاح وطرح أكثر من رائع يابو فهد ... لاهنت على هالسالفة.

**الضيق** · 02-12-2007 14:50

السلام عليكم.......... والله حنا دايم نقول تقل نفس بقعاوي اذا زعل منا احد بسرعه... تسلم يافواز

**راعي الوقيد** · 03-12-2007 00:01

[align=center]نفس بقعاوي

تسلم يالطربة

وزين اللي ماجردك بالمخلب

لك التحية والتقدير [/align]

**سيدة القـــــلم** · 03-12-2007 00:36

وَشَهَدَ شَاْهِداً مِنْ أهْلِهَاْ

الآنْ أثْبَتَ لَنَاْ رُاْوِيْناْ " فُوّاز " انْ عِشق اليُوم لاْ يَخْتَلِفْ عَنْ عِشق المَاْضِيْ
حِيْثُ ان كِبَار السِنْ الآن يَعِيْبُون عِشق هَذاْ العَصَر وَيَرُون إنَهُ عِشقاً بِلاْ " فَضِيْلَة "

ويَزْعِمُون أنَّ عِشق القُدَمَاء عَلَى وَضح النقّاء

<-- تدورْهَا من الله

.

.

قصّه وَقَصِيْدَة جداً رَاْئِعَه
صَحْ لَسَان شَاْعِرْهَاْ ولاْ هَان نَاْقلهَاْ

شُكْرَاً لَك

.

.

**مشــــعل** · 03-12-2007 02:54

تسلم يابو فهد

وسردك اكثر من رائع

بس عاد لو هي حابتوه الله يهديه

حبه وحده ماتضر او لا

يعطيك العافيه

**الجافل** · 04-12-2007 22:03

يعطيك العافية ياخوي وصج امتعتنا بهالقصة والقصيدة

**الوسيطي** · 04-12-2007 22:17

[align=center]بيض الله وجهك يا ابو فهد.....يا حبي لك يها البقعاوي ماش والله يا ابو فهد بوه سالفه أغدي احتسيها لك حاولت أرسل لك رساله خصوصيه بس عاد رفضن طلبي بداعي أن مشاركتي قليلات..يكثرن أن شالله وثمن أدز لك رساله الله لايعوق بشر...[/align]