سؤال للأستاذ فواز الغسلان خاصة وبقية الأعضاء عامة

[عاشق الوطن]

سمعت من كبار السن ان الي ماجعل العواجيه والرشيد يتقاتلون المعروف الي عمله شيخ ولد سليمان رحيل العواجي بعبدالله بن رشيد يوم نزوحه الاول من العلي يم العراق .
وهناك اختلاف بين شيبان شمر وعنزه شمر يقولون ثلاث سنين والعنوز يقولون سبع سنوات
هذا الله اعلم .

[الغفل ضيغم]

الله يبيض وجهك يا أبو فهد

أنت والإخوان اللي ما قصروا كلن أدلي بدلوه

بس عندي سؤال يا أبو فهد ووكاد انك راح تفهم معزي سؤالي أنت والإخوان

بعد متابعتي ردودكم وتفاعلكم الشيق علي هالموضوع والذي اعتمد علي التحليل والاجتهادات في كثير من الاحيان .

من هذا الباب يا أبو فهد أبي اسئلك عن الوقعات والمعارك والغزوات اللي صارت لشمر ما راح أقولك وعنزة لا بين شمر وكل القبائل بشكل عام . أبو فهد بما انك راوي الجبل وعندك هالكم الهائل من القصص والروايات اللي صارت بنجد وعلي شمر

هل يا ابو فهد هل هناك ترابط في جميع أو اغلب الغزوات والمعارك اللي صارت علي شمر بمعني هل كانت هناك معارك تتجدد بمكان مخالف وزمن مخالف ولكن السبب واحد بمعني ولا خلن أقولك مثل :

علي سبيل المثال /// اللي أعرفه ان حصل خلاف بين الامير حمود العبيد الرشيد ،، الامير ركان بن حثلين

وهنا قال الآمير حمود العبيد الرشيد يرد علي أبن حثلين

قصيـدك اللي يابن حثلين دهواك=تضرب علي طاش البحر ماتراوي

وأذهبت ( يامن ) في قصيدك وحمراك=وبعتـه برخصعقب ماهو غلاوي

وقولن بلا فعلن بها الناس تقفاك=والحكي ببلاشن وشـرب القهاوي

غديت مثل أفداوي الله يبلاك=وعرضت ( يامن ) للمحن والبلاوي

كم وأحدن في جرتكيتبع أرضاك=من عقب ما هو من كبار الهقاوي

لولا (أخو نـوره) جابلك يوم جلاك=تموت وأنت مع الاجنابجلاوي

وقصيدك اللي تذكر الطيب خلاك=تحت نحورالخيل مثل الحذاوي

وأخبر تري ما جاك من فعل يمناك=معه كثير الحكي هو والحداوي

وأن طعت شوري حط حكييبمعناك=لا تصير في كل الاحوال فداوي

تريالفداوي ذمه الله لشرواك=والهذر مذموم وكثراللغاوي

وقول رجلن ما يخافك ويدراك=لا هوهتيمين ولا هو حساوي

في ظل شيخن بالمراكيض خلاك=بالمجمعه بظلال عطب الاهاوي

أحرص من اللي يوم حاما تنصاك=وخلاك تمرح في شعيبن خلاوي

وأن كان تبغي النصح حنانصحناك=ماهي كثير الهذرمه والحكاوي

هذي قصيدة الآمير حمود واللي انا متأكد أنه له مثل ماني متأكد من أسمي

ومن خلال أبيات القصيدة راح بتين الشي الكثير علي سبيل المثال :

وقصيدك اللي تذكر الطيب خلاك=تحت نحورالخيل مثل الحذاوي

وهنا يذكر الآمير حمود ، الآمير راكان بوقعة وما حصل بهذه الوقعة الظاهر أنه واضح ومفهوم من البيت

وأخبر تري ما جاك من فعل يمناك=معه كثير الحكي هو والحداوي

وهنا يذكر الآمير حمود ،، الآمير راكان بما حصل له وان ما جاوه من فعل يمناه

وقول رجلن ما يخافك ويدراك=لا هوهتيمين ولا هو حساوي

في ظل شيخن بالمراكيض خلاك=بالمجمعه بظلال عطب الاهاوي

أحرص من اللي يوم حاما تنصاك=وخلاك تمرح في شعيبن خلاوي

وهنا يذكر الآمير حمود الآمير راكان بالرجال اللي ما يخافه ولا يدراوه وهالرجل في ظل شيخ يعني بحماية شيخ ، والشيخ اللي يقصده الآمير حمود (( الجرباء )) . ويذكره ما حصل بالمجمعه ويذكره يوم خلاوه يمرح بشعيبن خلاوي عقب اللي حصل بالمعركه ،، ويتضح أن هالرجال جابته الحميا ==> يعني به سالفه خاثره

وهنا احب أذكرك يا ابو فهد ولا يهونون الاخوان انه حصل معركة بين الآمير راكان والشخص اللي يذكره الآمير حمود واللي انتهت بهزيمة الأمير راكان كما هو واضح بالقصيدة

واللي أعرفهم أن قبل المعركة صارت معركه وبعده صارت وقعت الصريف المعروفة

هذي توضيح لسؤالي وعلي فكره هنا الكثير والكثير من المعارك اللي صارت وتوالت ولكن الكثير من الناس يجهل انها لنفس الاسباب فيا ليت يا أبو فهد توضح لنا مثل هذه المعارك والغزوات ولو بشكل مختصر او ذاكر مسميات علي الاقل

أما ما يتعلق بهايس القعيط وأخذه لثار الشويهري اللي اعرفه انا ان هايس ليس المعني بأخذ ثار الشويهري

لكن الظروف والأحداث في هذاك الوقت هي اللي حكمة أن هايس هو اللي ياخذ بثار الشويهري اللي شرف شمر ورفع راسه بعيال شمر معه وتوقع انه تبي نقاش طويل

[خلف الرويتع]

اشكرك جزيل الشكر يابو فهد والشكر موصول للاخ الرويتع
بس ابي افادة عن جملة وردت في سياق الكلام السابق وهي التاليه
زعل بسبب قعود
النفيشي وهو حربي مع التومان
انا كنت اعرف ان اصل النفيشي من الاسلم والي صارت له قصة الشياه مع اهل العشواء
ارجو التوضيح ياخوي العزيز ابو فهد

اخي شاعر مبتدي اسف على التاخير بس توني اشوف الموضوع بعد ان رفع

نعم انا اسف اقصد النخيشي من حرب

اما سالفه النفيشي فهو من الاسلم وسالفته مع العايش معروفه للجميع

وحدث ذلك بغلطه مطبعيه ابي حرف الخا وضغط الفا

[خلف الرويتع]

اخي الغفل ضيغم في تعقيبك تقول

أما ما يتعلق بهايس القعيط وأخذه لثار الشويهري اللي اعرفه انا ان هايس ليس المعني بأخذ ثار الشويهري

وجهة نظرك احترمها واختلف معك فيها من وجهة نظري ان الشخص عندم ينخى فخوذ شمر فخذ فخذ وينخ شيخ من شيوخ شمر بالاسم من وجهة نظري اعتبره معني حيث خصه خص من جوف الشيوخ الا اذا مانسمعه من كبار السن غير صحيح والم يخص هايس وطبعاً ماقلته يعتبر واجهة نظر وليس حقيقه تاريخيه قد اكون مخطي في واجهة نظري



لكن الظروف والأحداث في هذاك الوقت هي اللي حكمة أن هايس هو اللي ياخذ بثار الشويهري اللي شرف شمر ورفع راسه بعيال شمر معه وتوقع انه تبي نقاش طويل

انامعك في هذا الاعتقاد ولكن لايمنع ان هايس كان معني واتمناء ان تذكر بعض تلك الظروف والاحداث لكي نستفيد

[الغفل ضيغم]

وجهة نظرك احترمها واختلف معك فيها من وجهة نظري ان الشخص عندم ينخى فخوذ شمر فخذ فخذ وينخ شيخ من شيوخ شمر بالاسم من وجهة نظري اعتبره معني حيث خصه خص من جوف الشيوخ الا اذا مانسمعه من كبار السن غير صحيح والم يخص هايس وطبعاً ماقلته يعتبر واجهة نظر وليس حقيقه تاريخيه قد اكون مخطي في واجهة نظري

نعم أخي خلف الرويتع أنا أتفق معك فيما قلت وهنا كما قلت وقالوه الشيبان أنه نخي فخوذ شمر فخذ فخذ وخص شيخ بالاسم الا أخر من نخا من شمر
هنا أقولك يا أخي أن الشويهري هو أعلم بضروف فخوذ شمر وشيوخه إلا أخر من نخي من شمر وهو أعلم بالاحداث في تلك الوقت وبذلك كانت منخاته علي النحو التالي كما ذكرت أخي //

وبهذا قلت أن هايس ليس المعني بأخذ ثار الشويهري ولكن عموم شمر ولكن الظروف هي اللي خصت هايس القعيط بشرف الاخذ بثار الشويهري وتشريف شمر عااامه بفله

أخي خلف الرويتع ياليت فهمت قصدي أما الاحداث اللي صارت في هذاك الوقت فهي احداث كثيره واعتذر عن ذكرها في الوقت الحالي وذلك لما اراه من أنفعالات بعض الاخوان في ردودهم ،، ولكن أتوقع بل متأكد يا أخ خلف أنك لو جلست مع نفسك وحاولت تربط ما مرت به فخوذ شمر في هذاك الوقت راح تاصل لنتيجه

[الدرع العربي]

الأخوة الأعزاء
استاذنا القدير فواز

لاحظت ورود اسم عنزة كثيرا والحقيقة أن اللي قاوم شمر هم فحذ ( الجعافرة من ولد سليمان ) أما عنزة الباقية لم تدخل مع العواجية في صراعهم مع شمر إلا شخص أو اثنين فهذا من الظلم ذكر عنزة

[المطني]

الأخ العزيز / الدرع العربي

ولد سليمان جميعهم شاركوا مع العواجي كيف ما يشاركون مع العواجي وهو شيخهم يقول عليهم كلهم الا

شاركوا كلهم بمافيهم المرتعد واليمنه وحتى الأيداء شارك ببعض الغزوات . اما انا نقول عنزه فهذا من باب

التغليب ولا ندري انهم ولد سليمان لكن مثل قولنا شمر وهم بس الدغيرات من عبده وبعض سنجاره مثل

السويد والتومان والأسلم شاركو مره ماعمر شمر شاركوا كلهم لكن نقول شمر من باب التغليب

اخوك / المطني

[فواز الغسلان]

الأخوة الأعزاء
استاذنا القدير فواز

لاحظت ورود اسم عنزة كثيرا والحقيقة أن اللي قاوم شمر هم فحذ ( الجعافرة من ولد سليمان ) أما عنزة الباقية لم تدخل مع العواجية في صراعهم مع شمر إلا شخص أو اثنين فهذا من الظلم ذكر عنزة

حياك الله اخوي العزيز واشكرك على مداخلتك الرائعه00

والحقيقه ان مبيريك التبيناوي في مساجلاته مع سعدون العواجي يقول:

جونا عيال الولد مثل التهامي=رود(ن)يريدون الفياض المعاشيب
وابن مريخان(ن)تزبن ردامي=عقب القسى ما فك فرقه من الذيب
جبنا حلاوي حشوهم والجهامي=مع حلية اليديان هم والمغاصيب

والقصيده توضح افخاذ قبيلة عنزه وشيوخها الذين كانوا مشاركين في تلك الجموع000

ولكننا نقول قال العواجيه وفعل العواجيه لكونهم على زعامة تلك الجموع مثلما نقول غزى ابن

رشيد ورجع ابن رشيد مع كونه يسير بجموع بعضها ليست حتى من قبيلة شمر00

ولا اعتقد ان هناك معركه جمعت كامل عنزه وكامل شمر اطلاقا بسبب تباعد الديار والاختلافات

الداخليه وغيرها وانما تقال للتغليب عندما تكون الاغلبيه من قبيله او فخذ معين تجد ان اسم

الجمع يكون باسمهم 000

اشكر مرورك ومداخلتك الكريمه يالغالي