[align=center]
يالربع والله اني فقدت المضايف ـــــ لي سبوع كل مادخل عليه يعطيني الموقع غلط !
كنت ادخل عليه من الرابط shmmr.net/vb
بس يعطيني خطأ بأسم الموقع وعلى بالي المضايف له صيانه !
ويوم سيرت على قوقل وانشده ــــــــ قال الربع ماهم على خبرك غيرو العنوان !
قلت افاا ـــــ قل غيره !
وليه ماعلمونا ولا راعي هالمحل اسم !!
وهو يعطيني http://www.altanaya.com/vb
8
8
يالليد يقال انهم فاتحين مضيفن للشكاوي ـــــــ يالله ورنا عرض كتافك وتلقاو على يسارك من يمين <<<< لالا ماهو شكوى بس تبرير انغطاع!
الساعه 5:30 م ــــــ هدوووء ماتسمع الا وزيز المكيفات !
ماعدا عدة نغمات تنبيه ـــــ تتهافت على مسامعك من هنا وهناك !
في مكان مظلم وموحش ــــــ لتنتهي لحظة الصمت هذه على صوت عدة قطاوه!
لتعرف ان المكان تدب فيه الحياة !!
وين انا ياريت ؟!
مايبي له ـــــــ فأنت حتما في عمارة عزوبيه!!
لتسمع عدة هتافات تتهافت عليك من الدور الثالث !
فكل ماعتليت السلالم بدرجه ــــــ اصبح الصوت واضح ومميز اكثر
فتتوقف عند جمل ــــــــــ
يالدحمي اخلص علينا غابت الشمس !
ياعيال وين الزيت !
لعنبو حيكم الملح خلص والشوربه على النار !!
اويحي نسيت اللقيمات بالزيت <<<< غدن لك تقل فحم !
ياعيال خشمي دلى يدرج الله والعالم اني انزكمت!
يالربع وش بلا الشوربه غدت تقل شاهي نعناع !
قل غيره ـــــــــ اجل لوتشوف فحم مرزوق قصدي لقيماته وش تقولــ!
ياعيال هالفطاير الله والعالم اني ابقرطهن ــــــ والله مايقلطن ختى للبساس !
ياشباب والله كله كوم وسمبوسة مصيول هاللي تقل صرة عجوز كوم !
مصيول ــــ اقول انثبر انت وحلاياك متحالي هالنقانق وش عليه !!
وبعدين ياخي هالسمبوسه شيبت بي !
ماهو نلفه مثلثات زي عمل الحريم تغديلك على الكيف ــــــــ وليا سدحته بالزيت انفكت ياعله ماعاده <<<< اعرف واحدن من العيال يدبسهن بدبوس !
عاد يقولون الحاجه ام الاختراع ـــــــ قلت لازم مثلثات سلامات جبن كيري هي <<< كيري مربعات !
قلت يالربع شين غير السنه والقران يجوز تحريفه!
ازهلوه بس ـــــــ والله ونا اقعد ادلقمهن !
لفه ياماتغدي لك تقل كورة تنس وبعدين اربطه !
ومن تطلع من الزيت الا وهي تقل كورة سله!!!
الدحمي ـــ طيعوني يالربع وخلونا نجيب شغاله
مرزوق ـــ اي والله صدقت يالدحمي يوم انا عند اهلي ماعمري طبخت!
مصيول ــــ اللي يسمعكم يقول اني جايبكم على ذمتي ـــــ خلصو اللي بيديكم خلصت ايام العدو!
و
بعد لحظة صمت ــــــ تسيطر عليه "قرشة المواعين" اي اصوات الصحون والقدور !
فجأه تسمع صوت الدحمي يتوغل ويتخلخل من بين دخان المطبخ اللي اشبه مايكون بسحابه راداته جبال الهدا ــــــــ فتجدها بحيرةً من امرها !
فليس امامها الا عدة خيارات ـــــــ ايسرها امرها !
فـ لتتوغل من عمق الجبل او تزيحه عن طريقها ان استطاعت ــــــ لتعبر !
وهنا تتمالكها حالةً من الحزن الشديد ــــ ونوبةً من الغضب العصيب
فتجدها تصرخ برعدها ـــــ وتبرق عيناها حيرة والم امتزجت بشعور الغضب !
لأنه لم يتبقى لها سوى الخيار الاخير والاحتمال الاكيد ـــــ وهو ان تتلاشى عبر قطرات المطر !!
فتنزل مافي جعبتها بغضب متمثلة بقطرات ماء ــــــ ترميها من السماء بشكل مستفز لهذه القطرات !
فتتجمع قطرات المطر من اعالي روس الجبال من دون سابق ميعاد بعدما انتقلت نوبة الغضب اليها بأهانتها
ورميها بالطريقة المهينه
وتبدأ لتشكل مجرى ماء ـــــــــ يجرف ما في طريقه حتى الصخور !!
ورراح الدحمي وقلايته كأحد ضحايا سيلها!
بينما مرزوق يقاوم ويتمسك بما رأت عيناه ــــــ ليسجل ضمن عداد المفقودين!
ومصيول اشبه مايكون بكرة اسكواش !!
يخم كل جدار عدة ثواني لينتقل منه للأخر ويعطي كل جدار حقه!
فأصبح الوضع كما في فياضانت الفلبين
او ان انجاز التعبير وصح ــــــ كاتسونامي مصغر او <<<< اقول اخلص علينا يوم توغل صوت الدحمي وش عنده وش يقول !!
مالكم بالطويله <<<< هو به اطولـ !
الوكاد صرخ الدحمي اقول يالربع ــــــ ويتفاجأ بأن الجميع يردون بصوت واحد لا لا تقول وخلص هاللي بين يديك !
هنا يشم ان فيه ريحة خيانه واتفاق مسبق من قبل المجموعه !
فيصرخ لا لا ابي اقول وكلن يضرب راسوه بالقدر اللي معه !
فاصل بسيط <<<< تخبرون برمضان لا زم تكثر الفواصل !!
لا والله يالربع بس خلونن انكس للأسلوب الشمري بالسرد ــــــ لا بارك الله بهالسحابه جرفتن مع سيله للفصحى <<<< عاد دوبكم ودوب الفصيح يافيدين الفله !!
ا
لوكاد قال الدحمي ياشباب طيعوني وخلونا نجيب قدر كبير مثل اللي عند جدتي ذبحه فيد الذبايح ـــــــــ ونجمع هالبلاوي كله به !
الشوربه واللقيمات والسمبوسه وحتى الشربات والتمر وان حليناهن بالقهوه ماهي كش وجه !
وخلوهن يطبخن على رخاهن من العصر ياما يقول الله واكبر المغرب !!
وان جيتو للصدز هن مختلطات مختلطات ــــــ مار بهالقدر هذا ولا بقدور بطونكم !!
يازقرت طيعوني تكفون والله غدينا تقل قش صلبه !!
فجأه مايقطع هالحديث الودي الا صوت ابوجهاد المذن !
مصيول ــ افاا ياعيال هو اذن وكااد !!
مرزوق ـــ لالا خلونا نتمكن من الوقت اصبرو شوين !
الدحمي ــــــ ياعيال افطرو والله سمع اذني ابو جهاد يقول افطرو !!
مصيول ـــ سمع اذنك يقول افطروو لالا لا والله الا بليس يتحوفك يالمروح !
مرزوق ــــ وشوو هالبليس اللي برمضان هذا مواصفات خاصه !!
علمي بالشياطين مصفدات !!
قلت يابن الحلال والله متطلقات دقن الخلق بهالشوارع !
الدحمي ــــ يالربع اذكرو الله !
مرزوق ــــ الله والعالم يتصفدن شياطين هالخلق كلهم الا شيطانك يامصيول !
الدحمي ــــ هذا طلبيه خاصه ماشاءالله عليه !
مرزوق ــــ لا وازيدك من الشعر بيت يالدحمي فل كامل بس به طعجه مع الرفرف !
هاه يامصيول راح براس ماله !!
واللي يضحك واللي يشمت واللي يقول عينو خير !
الدحمي ــــ يالربع اذنو المساجد والخلق افطرو ـــــــ وحنا داقنا الجوع افطرو
مصيول ــــ افاااا ياعيال نسينا قشطة الصافي !!
مرزوق ــــ اوووه قل غيره !
الدحمي ــــ اويحي لا والله الا افطرنا !!
وبعد تقاذف الاتهام نرضخ للامر الواقع وناكل التمر لحاله !
يالله ياعيال قلطو الفطور ــــــــ وهذي شوربه تقل مكرونيا من كثر الشعيريه!
وهذي لقيمات من زود الفن تلقاهن على اشكال كل الحيوانات !
الا وحده بلشنابه على شكل مخلوق غريب!
مرزوق ــــ هذي الله والعالم انه على شكل اورل ضاربته سحكيه !
الدحمي ــــ يابن الحلال ان ماخاب ظني انه على شكل ديناصور!
قلت لا والله الا على شكل دينا متخالفاتن عكوسه !
مرزوق ـــ ههههههه مصيول هالدينا فاضختن قلبك ــــــ
انت صادز تخبر يوم تنطحنا على طريق جبه!!
براسي الشهاده وابي اقول مرزوق تجود قلت مرزوق تهجد !
الدحمي ـــ اقول افطرو ولا يكثر بس !
وبعد الصلاه بنص ساعه هذا بطنه يمغصه !
وهذا ماسكن راسه!
واللي يتلوى من ركبته <<<< رباط صليبي !!
واللي سردادي لهالحمام ـــــ ضاربه سهال !
واعفانا اللي يقول اه ذبحن الحرقان !!
ونهاية اليوم بالمستشفى ــــــــ اللي تنفس صناعي
واللي طاقينه ابره !!
واللي شابكينن مغذي بيده !!
واللي حاطينن سريره بدورة المياه !
ياما عممو على شقتنا ــــــــ قبل لانطبخ لا زم نتصل على الدفاع المدني والاسعاف !
لأن النهايه حتما ــــــ ياتسمم او حريقه !!
" معاناة عزابيه "
واتعزز لحال كل عزوبي ً ادركه رمضان !
لا يجي احد ويقول المطاعم ماليتن الديره ــــــ اقول اللي يده بالما مش زي اللي يده بماء النار !
هذا وتقبل الله من ومنكم صالح الاعمال واعاننا واياكم على العمل في رمضان[/align]
رد مع اقتباس
المفضلات