دفاعا عن بعض رموز شمر { عقاب بن عجل ، غضبان بن رمال ، هباس الهرشان } رحمهم الله

**الفضيلي.** · 01-07-2008 22:04

الأخ الســـرور تسلم وماقصرت يابن العم
وذكر افعال أمراء وشيوخ وفريس شمر واجب على كل من يعرف التاريخ
كل الشكر لمن شارك وشاهد الموضوع ودمتم بحفظ الله ورعايته

**الفضيلي.** · 02-07-2008 22:27

الاخ عبدالله العيسى

انا جلست ابحث شهور تقريبا سبع شهور او ست شهور ابحث هل بس عقاب سوى تاريخ للعجل ام كان فيه قبله احد
وذلك رداً على كلامك :

ولو أننا نعترف أن عقاب سوى للعجل تاريخ زمن الرشيد.

وجدت بعد بحث شاق واتصالات مباشرة وغير مباشرة
ان عقاب فيم من كان قبله
اولا :
جد العجل محمد الملقب بالعَجِل قال فيه الشاعر نومان الحسيني وهو من المنتفق كان مع ابن عريعر في غزوته على لينة

يقول :
والله مامس الضمير وأهواتي *** وايماننا تدي على كل مقدور
أنا أردها لابن عجــل محمــــد *** خيالكم يازرفل المظهـــــــور

ثم سرحان العجل
يقول محمد أليمني العجل الفضيلي
مهبول ياللي تمثنى رشانا *** يبغي علينا عقبة عقب سرحان
ثم جده علي الملقب بــ الصقال
يقول الشاعر
براي أبو جزاع حبس اللجاجة ** بوجه ربعه طوح الشيخ تطويخ
ثم ابوه جزاع الملقب بـــ خضران
يقول ابوجري فيه ويقصد السنان والفضيل والليحيا :
يتلون من يصبر على العسر واللين
*** شيخن على عسر الليالي يلاوي

للقاسي اقسى من صفا الضلع قاسين
*** وللعاني الين من القماش الحساوي

جـــــزاع شوق اللي تحط السباهين
*** له منزلن بين ولاهو دناوي
ثم اخو هيا عقاب بن عجل وعلمه معروف بايام الرشيد وبعد الرشيد

وتقول :
ولو أننا نعترف أن عقاب سوى للعجل تاريخ زمن الرشيد.

عقاب سوى تاريخ للفضيل ككل بل لكل اليحيا وعبده وشمر
عقاب شال بيرق شمر طليفيح بجراب يومن طاح البيرق وقال البيرق لكل شمري
عقاب يوم جراب الناس تكسب حلال وسلاح وهو كسبه بيارق
عقاب رجل سياسي رجل دوله ماهوبسيط يجب على الانسان ان يعترف بالحق ولا يضره ارتفاع علم ابن عمه بالحق طيب ابن عمك لك ورداه عليك

الاخ عبدالله العيسى
ان كنت تجامل او تريد ان تحط من قدر عقاب لمصلحة ابن فلان او الفلان او تكره ظهور علمه فهذ نقصان بالعقل الشمس ماتحجبه الغيوم
انا من عرض الفضيل والأولى ان يردون عليك اولا العجل او من يكتب منهم ثم انا لاني فضيلي ثم المسؤولين

أخيراً رحم الله إمرءٌ عرف قدر نفسه
تمنياتي التوفيق للجميع والامانه والصدق والدقة في النقل

**يـــوسف** · 02-07-2008 23:23

فيوم جراب لم يترك هباس خويه الملك وقاله الملك :ياهباس ليه مارميتن وعارضن عند أميرك ويعفي عنك قال هباس حنا مانخون خوينا قال الملك هنيكم بالحظ
وهذه ليست سبه لهباس بل من شيم العرب

ياليت توضح لنا وش جاب هباس مع أل سعود بحرب ضد شمر ؟؟؟مع العلم انه لاجيء عنده بس هذي حرب ....وليش موقف مع أبن سعود ضد ربعه ؟؟؟
وياليت توضح لي هل خويك اللي ماأدري وش هالخوه ....أولى بالفزعه ولا ولد عمك لحمك ودمك !!!!!!!!

بالنسبه للأخوان اللي معروف أن نص شمر راحو مع الأخوان وللأسف ان البعض مايذكر الحق مابي أذكر أسماء وانا عندي حساسيه من هالقسم لأن فيه كثير يزعلون من الحق ...

هذا تاريخ ياناس ياتقولون الصدق ولا لاتحرفون به على هواكم ومنتم مجبورين تقولونه

أخوي الفضيلي كل الأحترام لك ..

**الفضيلي.** · 03-07-2008 20:57

اقتباس:
فيوم جراب لم يترك هباس خويه الملك وقاله الملك :ياهباس ليه مارميتن وعارضن عند أميرك ويعفي عنك قال هباس حنا مانخون خوينا قال الملك هنيكم بالحظ
وهذه ليست سبه لهباس بل من شيم العرب

ياليت توضح لنا وش جاب هباس مع أل سعود بحرب ضد شمر ؟؟؟مع العلم انه لاجيء عنده بس هذي حرب ....وليش موقف مع أبن سعود ضد ربعه ؟؟؟
وياليت توضح لي هل خويك اللي ماأدري وش هالخوه ....أولى بالفزعه ولا ولد عمك لحمك ودمك !!!!!!!!

بالنسبه للأخوان اللي معروف أن نص شمر راحو مع الأخوان وللأسف ان البعض مايذكر الحق مابي أذكر أسماء وانا عندي حساسيه من هالقسم لأن فيه كثير يزعلون من الحق ...

هذا تاريخ ياناس ياتقولون الصدق ولا لاتحرفون به على هواكم ومنتم مجبورين تقولونه

أخوي الفضيلي كل الأحترام لك ..

----------------------------------------------------

هلابك أخوي العزيز يوسف العطاوي ومساك الله بالخير والرضا يعلم الله اني أُكِن لك المحبة وانا متابع لما تكتبه وتطرحه في هذا المضيف واتمنى لك التوفيق

ان شالله اننا نقول الصدق ولا نحرف التاريخ
هباس كان رأسه مطلوب عند ابن رشيد وزبن لابن سعود وفكه
الشيء الثاني هل هباس شارك بجراب مع ابن سعود ؟!.
لو شارك كان اقتلوه عبده لانه عار عليهم آنذاك والناس اول غالبهم به شيم.
الروات يقولون بعد ماانكسر جناح شمر الايسر اللي فيه الاسلم وسنجارة تضعضع قلب جيش شمر وهم اهل حائل وبالتالي انكسروا عبده في تلك المعركة كانوا منعزلين وكان بينهم وبين ارض المعركة تل ومقابلهم خلف التل المدفعية البريطانية وترمي لكن الرمي كان بعيد جدا عن عبده .
يقولون ان الملك قال ياهباس انتصرنا هباس مد الدربيل يمار مايشوف خيل عبده بعد مدة اطلعت خيل عبدة من خلف المدفعية البريطانية وارثعتبه وثم ارثعوا بجيش ابن سعود اثناء تقدم عبده هل هباس اطلق رصاصة عليهم او رمى احد بشلفا او سيف ابي احد يثبت .!!!.
قام الملك يبي يركب فرسه قاله هباس خل أشيلك وأظن والله أعلم ان الملك كان مصوب هاك الوقت قاله الملك وهو شاك بهباس لا تعال وخل الحصان بيننا وجر يدي لين اركب عرف هباس بذلك وسكت
لكن اللي ابي اصل له بالله عليكم ايهو افضل ان هباس يذبح اللي حماه من ابن عمه او ينقذ اللي حماه
هل شمر خونه ام اوفياء
ولاتنسون قبل ان تطلقون الاحكام ان العوني يقول :

والله يالولا شمر فلا يذكر الوفا *** ولا للحمية بالعباد مدار

بعد تضعضع وضع شمر هل حارب هباس اهل حائل
هل اخذ بيرق مثل الاخوان وحارب شمر
انا لا ادافع عن هباس ان اقول اللي اعرفه ولاني مجبر احد انه لازم ياخذ بكلامي كلامي ماهو وحي يوحى
ولكن هذا اللي اخذته من الروات الثقات المنصفين

اخوي يوسف العطاوي لكن مني اطيب التحيات وازكى الاحترام ودمت بحفظ الله ورعايته
واذا عندك شيء تبي تقوله انا اتقبله واسمعه برحابة صدر لانك انت من الناس اللي يفرضون احترامهم ومن الذين يبحثون عن الحقيقة .

**يـــوسف** · 03-07-2008 21:11

أحمل لك نفس الشعور الطيب يالغالي ...ومتابعتك لي وكلامك وسام اعتز به واتشرف بوه

وأنا والله العظيم يوم أقول لاتحرفون بالتاريخ مااقصدك أقصد ان فيه الأخوان ومو شرط داخل المنتدى حتى بخارج المنتدى يقولون سوالف ونعرفها زين ولانبي نغالط فيها ... يعني يجيك واحد ويسوي تاريخ والله العظيم لو تسمع شي بسيط منه يوقف شعر راسك ...وهالسوالف هذي مو لنا للأجيال اللي ورانا يعني من الظلم اننا نورث لهم تاريخ مزور زي مافيه بعض السوالف ورثوها لنا شيبانا الله يرحمهم ويسامحهم ..

وأسمح لي أرد عليك ... انت تخيل وحط نفسك بهالمكان ....

صارت مشكله بينك وبين عيال عمك ... عيال عمك القريبين خل شمر عامة اقصد الفخذ اللي انت منه ...
بذمتك وين تزبن ووين تروح إذا هدرو دمك ؟؟؟
تروح لعدوهم ولا تروح لديره ثانيه ؟؟؟
يعني الشيخ الامير/ضاري ابن طواله الله يرحمه ويغمد روحه الجنه وين راح يوم تصير مشكله بينه وبين أبن رشيد ؟
هذا مثال بسيط بس

وغير كذا انا والله العظيم مابيني وبين أحد إي مشكله وأحب أعد الصحيح لو هو علي وعلى ربعي ....

وفيه نقطه أخيره .. شيبان هالوقت اللي المفروض ينقلون لنا السوالف الصحيح يستكون إذا سئلناهم ولا يردون علينا ..
يخافون احد يسولف ولا شي وتصير مشكله ..

ويالغالي بعض شيوخ شمر هالوقت إذا مو الأغلب صارو مصيبتن علينا ...يعني تستغرب إذا أجداده زي مايقولون لنا بهم من الشيمه والفزعه والحميا والنخوه و,,,,,,,, شلون يجيب ناس رديين لااصل ولافصل ويحطهم من ربعه ماهو ؟؟

أنا مابي أتكلم حيل والله أن تكلمت خربته ههههههههههههههههههههههه

الغالي الفضيلي تسلم والله على سعت صدرك وتحملك لكلامي وتفهمك له ...وكثر الله من امثالك ...

**الفضيلي.** · 03-07-2008 21:26

هلابك اخوي يوسف العطاوي ومثل ماقلت الله يعين على وقنا الحاضر البعض قام يخلي جده او جد ابوه اسطورة زمانه وانه ولا ابوزيد وذياب بن غانم لكن مهما كثروا يبقى الصدق
الصدق يبقى والتصنع جهالة والناس تدري بالجدايد والاسمال

ضاري اخو صلفه صح انه ماراح لابن سعود ولكن كذلك ماذبح رجال ابن رشيد
هباس طوالله عمرك ذبح رجل من رجال ابن رشيد وهرب وذلك فك ابن عمه او اخوه من الذبح وهرب لابن سعود لانه وين ماراح راح يبقى مطارد من قبل ابن رشيد الا جهة ابن سعود لانه خصم منافس لابن رشيد وعندك سالفة ساجر الرفدي وين ماراح مطارد من قبل الرشيد وحتى وهو في العراق كان مطارد فماكان من هباس الا اللجوء لعدوه وعدو ابن رشيد

هذا الذي اعرفه
ولاهنت اخوي العزيز يوسف العطاوي

اعتقد انك من المردان ( العطا )

**يـــوسف** · 03-07-2008 21:57

عليك نور والله ياواحد يسولف هكاليوم وعنده ناس من ربعه .... تخبر شلة ثبتلي وانا اشوت منافقين

وهو يتسرخ سوالف وهم مااسمع منهم إلا والنعم كفو كفو وأول ماأقفىا قطعوه تقطيع ..
يعني هذا لو قايل له رجل يافلان متى صار هالحتسي ماسمعناه منك كان يسكت بس المشكله تلقىا من ينافق عندهـ ..
وأحلىا شي هالوقت الواحد يترك الناس هي اللي تتكلم عن فعل جده وجد أبوه ...

الله الله من المردان ..

**الفضيلي.** · 03-07-2008 22:34

والف نعم من المردان

مردان مردهم بالسيف حلقهم

حياك الله يابن عمي ومثل ماقلت بالوقت هذا مافيه رادع يردع هالكذبان
والناس لو قالت يارجل على هونك متى هالحكي صار ومتى فلانان سوى كذا
صح يسكت
بس لو راح لغيره يقول : والله اليوم وانا اسولف فلان سكتن وقال كلامك ماهو صحيح
يردون له الناس اللي يبون نقل الحكي : لا فلان غلطان ماله داعي يسكتك ومن ثم يبدأ بنفش ريشه مرة اخرى
هذا اللي يلبس على الناس بالتاريخ والله يستر.

**وافي الزنيدي** · 04-07-2008 04:29

ولحقهم الإخوان ليقتلوا هذه الرموز الشريفة التي ذكرتها
فعلم عقاب بن عجل أن الأخوان قريبين من عرب غضبان بن رمال فركب فرسه وحاما مع غضبان فصوب عقاب وإبن غضبان فحتارغضبان أيهم ينقذ فاختار عقاب وقال ولدي بمبيت ليله إن الله قسم يجي ولد بمكانه ولكن عقاب تعجز نساء شمر عن إنجاب رجل مثل عقاب
__________________________________________________________

[align=center]
الحمدلله على السلامه اخوي الفضيلي وان شاء الله معك الغنايم كلها عقب هالغيبه والمعذره تراي تلقفت ببعض مواضعيك بس طول الغيبه هو اللي خلاني والحمدلله اللي ردك سالم

بالنسبه للموضوع
ذكرتني بايام الطفوله كنت عند الوالد بشبة الفجر ومليان المجلس ويسولف عليهم الوالد وجاب سالفة عقاب بن عجل مع الاخوان وانا اصب قهوه ومركز مع السالفه يوم قال هاللي باللون الاحمر فوق عجزت افهمها (مدري وش السالفه) يوم جى الضحى وطلعوا اللي عنده وانا أسأله عنها قال وش لك بهالسؤال قلت وشلون قال يارجال قم رح بس واذا كبرت تعرف.
الله يرحم الشيخ عقاب فعلاً تعجز نساء العرب تجيب مثله
[/align]