[align=center]ذكر الرحالة الفلاوي ريالوه بن فسحان بن شانغ زهو الفسحة (ينحدر من اصول صينية) في كتابه ((رحلة على غير سنع)) أنه مر في عام 352 هجرية على قرية تقع بين جسرين ينقاله قرية الفلة .
وسولفوله أهل الفلة عن قصة أغنى أغنياء الفلة ((شاهبندر الفلة)) وشلون صار غني وكيفية جمعه للثروة اللي عنده .
طبعا هذا الثري كان اسمه الدم الازرق ومشهور باسم ((حجي دموي)) وكان الحجي دموي شايب وعايب لاهو شاب ووسيم ولا هو غني وثري .
يعني مضيع المشيتين .....
وكانوا أهل القرية ووغدانه دايما يحذفونه بالرضم ويعيبون عليه ((الشايب الشايب)) ولايعطونه لو هي كسرة خبزة .
في ليلة من الليالي اللي ماطلع فيها ضو القمر قرر حجي دموي انه يهاجر ويترك هذي القرية لاهله ولسان حاله يقول ((قلعتهم))
جمع توالي غريضاته وتوكل على الله ، بعد ماعبر الجسر الاول وبدا يصعد الجبل اللي موجود جنب القرية حس بالتعب يعني ((تليش)) قال خلني ادورلي كهف ابات به الليلة لين يصبح الصبح اتوكل على الله .
بعد عناء البحث عثر على كهف في اعلى الجبل وقف بباب الكهف وقام ينادي : ((ياهل الخير ، ياعرب ياهووو)) مارد عليه احد عرف ان الكهف فاضي مابه احد .
دخل الكهف وطبعا كان مظلم دور على دقمة الليت عشان يولعه ، ضغط الدقمة والا ((انا اخوك)) اثاري الكهرباء مقطوعة عن الكهف .
عندها تذكر المثل الصيني الذي يقول ((عشان ماتنقطع الحل بالترشيد))
وقال في نفسه : ((اييييييه لو فيه ترشيد كان ما انقطعت الكهرباء))
المهم قام يمشي بظلمة الكهف شوي شوي وطاحت ايده على تلفون قال ليه ماتصل بهالتلفون على الطوارئ يجون يصلحون الكهرباء ؟!
بعدين تذكر قال : ((اوخذ يادموي عزالله انك كبران ، مادام مافيه كهرباء وشلون يدق التلفون)) <<<<(ذكي حده)
المهم مالكم بالطويلة .....
نام حجي دموي هاك الليلة ....
ويوم اصبح الصبح توه يفرك عيونه والا يلمح هاك المصباح القديم
قال لا يكون هذا مصباح علاء الدين اللي يقولون عنه ؟!
اخذ المصباح وقام يفرك ويفرك ويفرك ويفرك ويفرك ويفرك
وبعد ساعة من الفرك طلع المارد يصيح : ((آآآآآآآآآآآآي شوي شوي شلعت جلدي يا حجي
فركت مرة مرتين ما طلعت خلاص ضف وجهك))
قاله الحجي دموي : ((اضف وجهي ؟! من صجك انت انا ماصدقت لقيتك ))
ابيك الحين تحققلي طلبي
قاله المارد : ((وشنو طلبك بالله))
قال حجي دموي ((ابي تعطيني فلوس كثيرة كثيرة ماتنعد))
ضحك المارد بصوت عالي ها ها ها ها ها ها ها ها كح كح كح <<<<(شرق من الضحك)
ورد عليه المارد : ولك انا لو عندي فلوس كان ماقعدت بهالمصباح المعفن هذا
مانت شايفه مصباح عربي غرفتين وحوش صغير
لوانه مصباح ثلاث ادوار وسرداب نقول يمكن لك وجه تطلب طلب مثل هذا .
هني نقد حجي دموي على نفسه وقال عزالله انه صاج (مو تنور)
خلاص خلاص ابي طلب ثاني
قاله المارد اطلب خلصني ابي اولي
قال حجي دموي ابيك تخليني الشاب الوسيم والبطل المغوار الذي لايشق له غبار .....
هني ارتبك المارد وقام يتصبب عرق وحطه ايده على خده وقعد يفكر شوي ....
وفجأة قام المارد بسرعة
وحط ايده بجيبه
وطلع دفتر الشيكات من جيبه
وقال للحجي دموي ((قلتلي كم المبلغ اللي تبيه قبل شوي))
وانتهت القصة ياطيبين
وبهذا نكون عرفنا سبب الثراء الفاحش اللي طرأ على الحجي دموي .
ا.هـ كلام المؤرخ ريالوه
ودمتم بكل ود[/align]
رد مع اقتباس
المشاركة الأصلية كتبت بواسطة مهاجره باحساس
المفضلات