بــاركــوا لي .. ناجحه مع مرتبة ..الأســف..

**بالمختصر..** · 26-06-2007 23:57

.
.

اولاً / السلام عليكم ورحمة الله وبركاته

ابشركم نجحت .. نجحت .. وعطوني الكليه هديتين

يغلووووني بالحيــل ومايقصــرون ..

المهـــم /

ماودكم تعرفون وش هداياي ؟؟

مــدري من وين ابتدي !! بس راح اقول والله يعين

[ 1 ]

أول يوم من الإمتحانات قالوا لنا أستاذكتم ( ..... ) اللي تدرسنا تاريخ الأدب الأنجليزي

سافرت لـ ديرته .. عفواً أقصد سفّروه

لييييييييه ؟؟ ومتى ؟؟؟؟ ومليوووون علامة إستفهام ؟؟؟؟؟؟

طلعت مزوره شهادة الماجستير !! شنهو .. ماني مستوعبه !!

تدرسنا سنه كااااااامله وآخرته تطلع .......

لاحول ولاقوة إلا بالله

طبعاً اللي حطت الأسئله أستاذة ثانيه ماتدرسنا !!

<< وسقطت بالماده هاذي أول هديه !!

[ 2 ]

أستاذتنا اللي تدرسنا ( قواعد اللغه الأنجليزيه )

دايمــاً تغلط اثناء المحاضره .. تغلط وبالقواعد مايصير هالكلام !!

وانا من لقافتي اقول له غلط والصح كذا وكذا ..

وناشبتن له ماأفوت له نص غلطه ..

وماهان عليه اني انجح بدون لاتحط له بصمه

فـ أهدت لي الماده كله .. تقول لازم تشيلينه معتس

وانا قبلت الهديه .. جــزااي ..واستــاهل .. ليه اتكلم ؟؟

لااااااااازم نسكت عالخطأ .. مو حنا ( عـــــرب )

بالمختصر..

يعني نجحت ومعي مادتين عفــواً اقصد هديتين

.
.

**شام** · 27-06-2007 00:14

مبروك النجاح

اختي بالمختصر

و إن شاء الله تقدمي المادتين في الدورة التكميلية

أو الفصل القادم و تكونين من الناجحات

و المتفوقات

وأما ما حدث في الكلية عندك فهذا شأن مؤلم

و منتشر جداً

و لا نقول الا اصلح الله الاوضاع

وبدل هذا الحال بحال أفضل منه

ومبرررووووووووووك النجاح مرة اخرى

**ابو ضاري** · 27-06-2007 00:24

مبروك النجاح

اختي بالمختصر

و إن شاء الله تقدمي المادتين في دوره الحواري اسف الصيفي

بعدين بس المدرسه ياما دكاتره ومدرسين بالهبل شيل بس وين الرقابه وياما راحت انفس والسبب الدكتور

فلان يكبرون شانه وهو طرطنقي بديرته

اين الذمه والضمير ====================================

مبروك بس شدي حيلك

**الدم الأزرق** · 27-06-2007 00:36

يعني ماجبتي عيد واحد ... صار العيد عيدين

وين نودي وجهينا بيت العربان<<<المنتيدات

وبعدين وش قضية التزوير اللي صايرن نسمع فيه ذي الأيام

كل من قال انا دكتور دخلناه يدرس في جامعاتنا!!!؟؟؟

يانااااااااس هاذي جامعه مو بمسرح او ملاهي

شطارتهم في التدقيق علينا حنا وبس...!!!

وبعدين تعـــالي هنا...بالمختصر

كم مره كتبنا وعلقنا وقلنا إذا شفتو غلط أسكتو وأتركو عنكم الفلسفه!!!

الظاهر الطيييب والنصح ماينفع معاكم...

ياليت المشرف العام يقرا موضوعك وينزل فيك أشد العقاب

مادتين...!!! لا وبعد وتعلمينا

بالمختصر...

تبين الجد...

انشالله تعوضينها في الأختبارات القادمه

وأنشوف موضوع عنوانه

باركو لي تخرجت وهالمره نبيها من جد

ومشكوره على الموضوع الجرئ والصريح والمحزن والجميل

**مهاجرة باحساس** · 27-06-2007 01:20

الحمد لله نجحت وماعلي شي

هداياتس (( المواد اللي عليتس )) هذولا مصيبتين

:stressed7 مسكينه والله ... الله يعوض عليتس , لا يعوض على اهلتس >>> كل بنات الكليه اقصد

الانجليزي عندهن مدرسات خصوصيات الا انتي وكل امتحان تطلعين اول وحده من اللجنه وهن عيونهن تبي

تطلع من روسهن من الحسد اكيد تبين تصقطين >> ومايصرفون عليتس اهلتس الا اجرة السواق .. وحق

عصير وسندويشه وحده >>> لانها كانت مسويه فيها دبه تشتري اثنين وكل يوم اي ياقولوني

والا تعطيني تقول كولي ياربي انا اسوي رجيم >> واكل هالسندويشه

ابي اونستس والله يابالمختصر .. لايضيق خلقك ترا عندي ماده الترم الاول وعادي

ابوي يوم قلت نجحت باركولي يقول خلاص شالوها عنتس خخخخخ

وبعدين حنا عارفات ان كليتنا كلية مصالح >>>

ياليت اهلتس خلوتس تمشينها كعابي للكليه بدال المصاريف والا عطوتس خمس ريال عشان الفسحه

>>> تقل يكفن >> والله الصراحه بالمختصر .. في شنطتها بطاقتين صراف

**نافع بن طواله** · 27-06-2007 05:37

[align=center]على البركه

أقصد إنتي ماشيه على البركه

وين ديوان المظالم

وين لجان التصحيح

وين الشكاوي

وين موتر الإستاذه وكسري قزازه

بنشري كفراته

بالعربي أرهبيها

ماهو الإرهاب اللي في بالك وتروحين تخطفين طياره وتهدمين بيت الاستاذه لا لا لا

قولي لها عندي إخوان ياكلون الزلط وناس على قولة المصريين يقتلونك ويتاووووون جثتك ( حاولت أكتبها باللهجه المصريه ماضبطت معاي كلها همزات وإنتي ماتقصرين راح تغلطيني بالإملاء بعد إنتي ماخليتي استاذتك تبين تخليني )

المهم عاد أنا أتكلم بجد

إشتكي على الاقل لا يحسبونهن بالمعدل

هذي أقل حاجه لو تسلمين على مادة المزوره

والماده الثانيه خليهم يعيدون التصحيح ويجمعون المعدل ( هذا طبعا إذا واثقه من نجاحك )

<<<<<<<<< مدرس وفاهم هالسوالف[/align]

**أبوطروق** · 27-06-2007 07:49

بالمختصر،،،،،مبروك على باقي المواد

وشدي حيلتس بالمادتين الباقيات وبيضي وجيهنا ولا تفشلينا نبي نفرح بتس

والله يوفقتس وينجحتس يارب ياكريم

**الشاهري العبيدي** · 27-06-2007 22:10

ليس خطئك ولا خطى من معك من زميلاتك

لكن نسأل الله لك ولهن التعويض بخير من ظنكن.....وثقي انه كان مقدرا عليكم ومكتوب من قبل 50 الف سنه

وأسمحى لي بأن أضع نسبه صغيره جدا عليكن ولا تحاسبينى ولكن أرجعي لنفسك
والسبب أننى مريت بمرحلة الجامعه وكنا نشتكى الويلاات منهم الاساتذه الكرام...ولكن الان اعرف أننا كنا مثلهم

أخيرا...أسال الله لكن النجاح وأعرفي أن الان وقت الراحه ومن ثم التخطيط والتحدي لانجاز المهمه بتوفيق الله عز وجل

**مانع السرحاني** · 27-06-2007 22:18

مبروووووك لك ولكل الناجحين

وهذولاُ الهديتين عن عيون الناس

وتعدين انشالله وبالتوفيق

**منصور الغايب** · 27-06-2007 22:21

الف مبروك على النجاح في باقي المواد

واتمنى ان يكون رسوبك في المادتين حافز لك على التعويض

وانا بصراحة مستغرب منك ياختي

شكلك ميتة قلب الله لايبلانا

انا مرة ما جبت الدرجة الكاملة بالرياضيات ايام المتوسط قمت ابكي

انتي راسبة وتضحكين

والله شئ غريب

عموما شدي حيلك وربنا يوفقك

نشوفك بعد الصيفي ناجحة باذن الله .