من قصص الأباء والاجداد - سنة البنشر
[align=center]المقدمه../
يقول الشيخ العلامة الفطحل وسيد المعلمين (ابي شنخر القرمزاني)في كتابه الكبير والمطعم بالفيروز (سحر الضبان في طرد الذبان) والذي ربح به جائزة اوسكار عن افضل موسيقى!! يقول فيه الشيخ الجليل:
الكرم كرؤية البقل (الاقط) وانت بلا اسنان وقد مغصك الجوع,فلا انت قادر على اكل البقل ولا انت تملك اسنانا ولا تقدر ان تسد جوعك)) رحمك الله ياشيخ فقد كنت شيخا نكته
//
من تاريخ وقصص الاباء والاجداد الوجه الاول سيكشن ثيرتين (درن درررن)
يرويها لكم الراوي والعلامه الاطخم واحسن واحد بالعالم( عنتر بن ال باتشينو بن بيليه آل المطنوخ)
//
بعام 1218 فكان هناك شيخ قبيلة يقال له (الفسافيح) وكان شيخهم الشيخ /ريال فسحه ريال هذا رجالن شجاع وبوه ونخوة وبوه شهامه ولاهو خلي من بعض النحشات ويقال ان مابوه اصفى من جبهته وعلباوه تقل قزاز مضروبه برضمهولما سُأل كيف ياشيخ ريال علابيك مكصمه وحنا نخبر اللي علابيه مكصمه انه ذروق وطقوع؟
استعدل الشيخ ريال وهو يقابل عمود البيت وقال ياشليويح ياولدي يمار اللي بوزن الشيخ ينغزه من كوعه يقوله تراك تحاتسي العمود ياملا اللخه التف يسار ((يمار الشيخ / ريال من كثر معاركه وكثرة ضرب علابيه انحول وماقام يميز اللي دزداموه))ننكس عاد للي ينشد الشيخ ريال
فرد الشيخ عليه وقال ياولدي هذي ماهي علامات النحشه
هذي سلمك الله لما نضرب القوم ونذبحهم وشفناهم متسدحين موتى نمشي ونخليهم اثريهم يتسذبون ويقومون اليا منا مشينا ويحذفون الرضم علينا وحنا ننحاش عاد يصوبونا من ورى . انتهى
كان الشيخ ريال الفسحه شيخ الفسافيح من اكرم العرب هكالحين وناروه ماتطفي وكان عنده نجر يقولون اليا دقوه امريكا تسمعه وفي مصادر اخرى قالوا ان الشيخ مركب سماعات ماركة سوني ورى الرواق وموصل اسلاك للنجر هاليودع امريكا تسمعه
وكان عنده من الالقاب العديده اللي تدل على كرمه
منها المهايطي و المقصّه و ابو دوك و ابومخبا مسرود و ابونجر كهربائي
وكان اذ كل مره يأتي اليه ضيف حتى يذبح ماعنده واذا لم يجد شيئا اتصل على مطعم قبيلة المطانخه وطلب منهم سندويسات على الحساب ولايسدد هههههههههه
وكان مضرب الامثال بين العرب في الكرم والجود
فكان يذبح ويصلخ حتى افنى كل حلاله وابتعدت عنه قبيلته تنكيلا بهم من كثر مايتسلف منهم ومن كثر ماكانوا عياله ينطلون شرطان بلاي ستيشن من جيرانهم
فأصبح وحيدا بهالخلا لا انيس ولا جار ولا خوي وحتى الشيخه راحت عليه بسبة كرمه الباذخ واللي عرشوه عشران الضحا وخلوه
ماغير هو وراس مرتوه وعيالوه اللي ما ظنيت ان وراهم صلاح
فكان يوم من الايام مادرى الشيخ ريال الا وهكالضيفان اللي نزلوا عليه
-سلام عليك
-عليكم السلام اقلطوا يامرحبا والله ومسهلا
ورح ياريال لمرته وقال لها يامره ماعندتس شين اتسل منا ولا منا
قالت مابوه الا اندومي ابيه للورعان
قال لا اطبخيه للضيفان
قالت لا يرحم والديك الا الاندومي عاد
لكن شف انا ابعلمك بامر
قال الشيخ وشو
قالت (مستغربه ) هالضيوف وين رتسايبهم ؟
يعني جايين مشي؟
قال الشيخ مادري والله
قالت وش معهم يوم يجونك
قال الشيخ تلفونات نوكيا
قالت المره وجعة جدي
الا مامعهم لاب توبات ؟<--وتبين ان القبيله ماظلموا حظهم يوم يتركونهم
قالت المره شف انا ابعلمك هالعلم وانت جود العلم ...خشمك ياشيخ ><
قال وشو
قالت المره شف ثيابهم اذا هن متعرفطات تراهم جايين على ذلول لكن منوخينهن بعيد وجايينك لشي الله يستر منه
وان تسان ثيابهم ماهي متعرفطه تراهم جايين مشي
قال هداية الله ثم شورتس
قالت المره طس بحفظ الرحمن
وهو ينهج الشيخ قال ياعيال عدسة عين مرتي طاحت قوموا وقفوا ابي ادوره واخاف انكم تدوسونه مير لاتحركون
قاموا الضيفان وهو يقعد الشيخ يراعي لثيابهم يمار متعرفطات من ورى بس!!!!
قال ها وشلون صارت هذي؟(يحاتسي روحه)
قالهم الشيخ ابشركم خلاص لقيته
وطلع الشيخ يعدي ياما وصل للشارع يمار سياراتهم الشبحات سافطه
وهو يدلك يدزعي على ركبه ويبنشر كفرات الضيوف
وانكس يم ضيوفه واثريهم طالبين تاكسي ومنحاشين عقب مادريوا انه كفشهم
وسميت هالسنه سنة البنشر
ويقول الشاعر ابادزاسي
يالله ياعالم الاسرار//ياجالب المطر والخير والربيع
نشتسيك ياربي من شيخن خبل//مهايطي واسمه ريال فسحه
سعلوة صعلوك ويبي يسوي من روحه اسكت//وهو مايسرح مع التاليه من الغنم
ياحلات من وطى رقبتوه //طراخ طراخ طراخ هاللون اتوطاها
هههه هههه هههه هاللون اضحك بوه//وامحق والله من شعر وامحق من شاعر
وهذي يااخوان سالفة الشيخ ريال بن فسحه اللي ما ابطى ومات مغبون من ويش مايدرى حتى الان
وسلام عليكم
واسمحوا لي على المصاله والخثاريدز اللي فوق مير تخبرون مستحي منكم وقلت اجيب اي شين[/align]
رد مع اقتباس
المشاركة الأصلية كتبت بواسطة المطنوخ
المفضلات