ابغى نبذه عن فخذي الجرذان والمختار من شمر

[عـــابر سبيـــل]

كيف حالكم اخواني عساكم كل يوم براحة وبعافية .

ودي اللي يعرف بالانساب يتكلم عن فخذ الجرذان وفخذ المختار من شمر , ويعطينا مساكنهم وشيوخهم

وأفعالهم في الزمان الماضي .

ننتظر الطنايا والله يعطيكم العافية .

[ghosty]

السلام عليكم ورحمة الله وبركاته

حسب معلوماتي المتواضعة بالنسبه للحجم هالأسم فاني بادلي بدلوي وعسى الله يوفقني

بالمفيد واعذرونا مسبقا عن التقصير

اللي اعرفه عن الجرذان انهم منحدرين من الرمال او انهم بني عم لرمال يعني اقرب ما للرمال (غفيلات)

والجرذان هم (المياق و الفروان والمعاكلة والمزيريب)

وعلى قلة عددهم بزمانهم الا انهم تميز بهم عدد كبير من الاسماء التي اعتبر ان التاريخ ما انصفها حقها في زمانا هذا

وعسى الله يوفقني بذكر شي من علومهم الي تنومسني وانا ماني سنجاري

نبدا بدون تمييز بالبداية

****المياق
ينتخون بالعليا

**منهم من سميوا بالخياله لانهم ثلاثة فريس ردوا القوم لحالهم بدون فزّع هم (عقيل وعواد و وارد)

**وعيال عواد (معزي و فرحان)فريس ماهم بسيطين للهم مغازي واكثر مالهم الحنشله ثنينهم جميع وسبحان الله كانت ميتتهم جميع

حيث انهم كانوا ناوين ديار الرولة من ورى سكاكا والجوف وهم يتلاقون بسربة لاشعلان غزياية(بالشويحطية)

وهم يتحامسون بالرمي تمترسوا بلهم حزم المهم نفضوا الاخوان محازمهم وخلصت

ذخيرتهم من الفشق هم وسربة الرولة وردوا الفريس للسيوف !!!وهم يتظاهرون الكل منهم يفك ظهر اخوه وكل ما اهوى بهم احد جدعوه

عجزوا عنهم القوم (الا بجدع الرضم قعدوا يرجمونهم لين ذبحوهم واللي سمعته ان حديهم زاحفن يم اخوه ومنبطح عليه يبي يفكه)لكم الله كل

ما طرت علي هالسالفه بالذات يتطافرن دموعي غصب عني (رحمة الله عليهم)

كل من سمع بذبحتهم تأثر وسمعت ان أبن جبرين شيخ المفضل من اليحيا من عبده يوم سمع بذبحت فرحان ومعزي قال :نعنبوا حيكم كل ما قضبتوا رويلي

أذبحوه وسموا باسم فرحان ومعزي بالثواريات

**صبحوهم مطير والنزل خالي لانهم كانوا غزوا ولا حاضرن الا عواد بن زاكي (ابو فرحان ومعزي)وهو شايب نطحهم خيال وهو يعيقهم لين جوا الفزع

وكسروا مطير وبكليوم جدع عواد ذبحوه مطير بعد ما فك حلال المياق(رحمة الله عليه)

**وصبحهم عوده ابو تايه والحضره عقيل(حدا الخياله اللي انا ذكرتهم سابقا)وكانت يده عايبه !!! تطابحوا القوم يقلدون الكسب لانهم يشوفون النزل خالي وممنين

بنتك ياعقيل بوسط النياق وهي تركب الذلول وتصيح عليه وهي تشلع نياق ابوه وركايب القوم بعد !!على حضرت عقيل وهو يحتمي دونهن وهوياهم لين وصلوا الفزع

فزع النمصان ويا حضرت السعد ويكسرون القوم والقوم عقب ماهم كل على ذلول ردوا مراديف ورجليه

قال عقيل للنمصان والله الا تاخذون قلايعكم ركايب القوم يوم فكيتوا نياقي(رحمة الله عليهم جميع)

**صبحواهم على (لوقه)الرولة مقدمهم ابن شعلان وخذواهم وانهزموا(أقفوا) بالكسب فزعوا شمر اللي حولهم وبنفس الوقت لحقهم الطلب من المياق والجرذان اللي بالنزل

يوم وصل ابن شعلان للفيضة (العامرية) وهو ينوخ يبي المغدى الضحويه !! حذروه اللي معه قال مهم لاحقيننا ولا حولهم احد !!وهو يذبح له جزور قال غداكم

ياقوم !! الا القوم بظهورهم (الطلب) اولهم سعيد الظيف الله المايق وهموياهم ضرب مخلص لين شلع سعيد ابن شعلان وجدعوه قتيل وخذا البيرق منه

الا الفزع من شمر يكتب عليهم من كل اتجاه وهم يذبحونهم جميع ولا يرد منهم رطب الحلق الا اللي ارسله ابن شعلان يوم ينوخ ارسل له مرسال للربعه انهم كسبوا

يقال ان المبشر ما امداه يبشرهم الا خبر ذبحتهم واصلٍ لهم

وهي به قصيده لاكن صارللي كم يوم احاول اتذكر شي منه عجزت الظاهر اني شيبت ولاني قاضبن منه الا هالشطر ليت من يجيبه كامله او بعضه عساني اتذكره

نوخوهم لابتي بالعامرية

((((سعيد بن ظيف الله هو وعواد بن زاكي وعقاب بن عجل أرحام خالهم ابن زويمل )))((والبيرق اللي خذاوه هو ثاني بيرق للشعلان مع شمر ولاول ماني متئكد

من اللي خذاوه))

وشيخت المياق حاليا للاسود العصمان المايق (الله يطول بعمرة ولا يخلي من أمثاله)
****الفروان

بهم اسماء مهي بسيطه من فريس وعقدا ما حاضرن ذاكرتي الا روضان عقيد ودليله

وبوه قصيده هو ودبوس المايق:

[poem=font="Simplified Arabic,5,white,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
ليا مد المايق وابن فروان=ذود المعادي يشلونه
عاداتهم جيبت القطعان=ورجم الوعد مايتيهونه[/poem]

****المعاكله

منهم خزعل عقيد واشتهر بانه دليلة قوم

ومنهم سعيد المعكلي عقيد سجن بالعراق بسبب المغازي وهو من من لم يستجيبوا وغزى ومسك وسجن

قصد وهو بالسجن يو شاف له طير يحوم بالسما وبعد يوم او يومين وهو يموت (رحمة الله عليه)

[poem=font="Simplified Arabic,5,white,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
ياطير ياللي من طيورٍ قرانيس=وقع لنا ياطير وفهم وصاتي

أنخا لنا زوبع هم والسناعيس=الكل منهم يحرج الطايلاتي

تر الوجاهه عندهم مابها بيس=توجهوا بعيالهم والبناتي[/poem]

مشت شيخان شمر يبون اغديهم يطلقونه يوم جوهم الا هو ميت له مدة

****المزيريب

منهم الشقاوي بن مزيريب فارس وقع صويب بحدى المغازي على الرولة وهو منيع للبن شعلان عالجوه لين طاب بعد مده مهي قليله

سمحوا له بانه يرجع للشمر(اللي ما أدري هلي هي بتبادل ربطا او بفدوو او انه سماحه بدون هذي وهذي)

المهم من تميز هالرجل بالاخلاق والمرجله وكذالك الوسامه عاشقته له بنت من الروله يوم ارخصوا له بالرحيل وهي تقصد ماحاضرن الا بيت مجبوع

[poem=font="Simplified Arabic,5,white,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
حط البيت بقصر البيت لاتبعد يالشقاوي=احط ؟؟؟؟ عبدٍ لك و؟؟؟؟لك فداوي[/poem]

ومن مارثت الشقاوي خليف الضبيان له علم غانم

وكذالك منهم العقدا شوردي ودمنان

****وهالقصه خليته للاخير لان القصيده تعدد اغلب عقدا الجرذان وهي

ان الجرذان اغلب مغازيهم شمال على الحويطات والروله وغيرهم من نزالة الشمال وكل ما غزى عقيد منهم يمر على شخص من اهل الجوف

بله مكان متطرف على له ماء يسقون ركابهم ويكملون دربهم وبرجعة يمرونه ويبركون عنده من الكسب ناقة من اطيب الكسب

وباحد مغازيهم يوم تعدوا من عنده وحسب وقت رجعتهم على المعتاد قال للعبد أرقب غديك تشوف الربع !! أرقب العبد وقال للعمه ما اشوف الا

زول ردفا(اي اثنين مترادفين ذلول وحده)وهذي اشاره اول ما يتبادر للذهن انهم منكسرين اي مهزومين وان هازول هم الشريده(الناجين فقط)

خاف وارتبك صاحب القصر خوي الجرذان وهو ينطح الزول الي جاي من بعيد ضننا منه انوه من الغزاة

يوم تلقاهم الا هم رجال مردفن له مرة خلفه (ارتاح خوينا وتطمن ان ربعه مابهم خلاف)وهو يسلم على الرجل وينشده من انت ومنين انت جاي؟؟

قال انا اسمي عيد وجاي من حوران (وادي بسوريا يمتد من جنوبها والاردن الى شمالها للاكراد) وهالمرأه هي مرتي من اهل ا***لاد(من اهل حوران)

وينشده وش اسمه قال اسمه عسيلة (الا عسيله بنيت حلال حليل قوم على قولتهم وهذا عاني كل هالعنوه وصيدته عسيله)

المهم صاحبنا طلع شاعر وتقل من السويد بتنكيتهم وهو يقصد له قصيده ما حاضرن منه الا كم بيت:

[poem=font="Simplified Arabic,5,white,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
يا عيد وا كسبك صوابر عسيلة=لا عاد يومن كنت به يم حوران

وينك عن المايق ما تجود شليله=ولا تولّج نادر العين روضان

لا صار ربعك كاسبين النفيله=يا شين ماتتبع شوردي ودمنان[/poem]

*****اما بالنسبه للمختار علوهم غانمه لكن اعذرن يا بناخي ما يحضرن منها شي قلبي مليص من تاللي

الا ان مقدمهم ابن دهيثم عبدالله

الا انهم أقرب ما يكونون للجرذان او انهم بجرذان وعسى فيه من الاخوان من يفيدنا جميع

واعذروني على الاطاله بالرد ما بغيت احطه بشكل موضوع لان القصايد اللي ذكرتهن ماهن كاملات

لاكن اوعدكم ان عندي لي سفره للشمال واخبر للي شيبان الله يطول باعمارهم من الجرذان وابي اخذ معي كم شريط

لان علومهم تطرب القلب

وعسى باللي ذكرته فايده يالبناخي

تقبل تحياتي

[خالد الشمري]

والف نعم بالجرذان والمختار وعموم الغفيله ...

هذا الرابط عن بعض رجال المعاكله
http://www.shmmr.net/vb/showthread.php?t=40722

احب اضيف ان المختار شيوخهم الدهيثم
http://www.shmmr.net/vb/showthread.php?t=30451

الاخ ghosty بالنسبه لكون العامريه تلقاه على هذا الرابط
http://www.shmmr.net/vb/showthread.php?t=29536

[عـــابر سبيـــل]

بيض الله وجهك يالغالي ghosty ع المعلومات الجميله والقيمة والمنصفة التي عجز أكثر الرواة

من جلبها لنا , ولكن من اليوم أنا اعتبرك راوي شمر يالعزوة لأنك جبت قصائد ومعلومات لم نسمع

أو نعرف منها إلا القليل القليل .

فأنتظر تزويدك لنا إذا أردت الإظافة ونفخر بشمر جميعا .

عساك على القوة والله يعطيك الصحة والعافية .

[مصيول]

بيض الله وجهك يا ghosty ورفع شانك

ويوم عندك هالعلوم عن الجذان وانت على قولك مانت سنجاري !

اكيد عندك علوم اكثر عن بعض فخوذ شمر ـــــــــ نورنا الله لايهينك

يعني لازم احد يسأل


لا خلى ولاعدم

[عـــابر سبيـــل]

ماقصرت يابعد حيي ياخالد الشمر كفيت ووفيت يالذيب

[عـــابر سبيـــل]

أخوي مصيول عزالله أخونا ghosty ما ينفوت فهو عارف ماشاء الله عليه .

قله الي تبي تراه ما يقصر ..

اشوفه بعد شيب على قولته بس الله يعينه .

[ghosty]

الاخ خالد الشمري

بانسبه للكون العامريه انا اوردت اللي سمعته من بعض الشيبان ولا دققة عليه بمتابعه للقصه كامله

وقد يكون اللي انا ذكرته عن العامريه مجرد جزء من القصه كامله وانا ذكرت الجزء اللي هو قبل حضور الفزع من شمر(قد اكون غلطان مصيب) اما بالنسبه لدهيثم فانا ذكرت انهم مقدم المختار

واشكرك على توجيهك بالروابط في ردك

الاخوان عابر سبيل ومصيول الله لا يخلي منكم خليتوني راوي وراعي قصص وانا كل اللي عندي كم سويلفه طرن علي

وذكرتهن وليتهن كاملات قصايدهن بعد(لو ان الجرذان انا جازم بان لو نكتب الف صفحة ما كفت فعولهم وذكرهم الطيب)

الله لا يخلي منكم جميع

[عـــابر سبيـــل]

بيض الله وجهك أخوي على الكلام الرزين والرائع .

[الراوية المخضرم]

ردا ًعلى صاحب هذا المعرف ghosty عن المايق الحقيقي
اليك هذا الرابط
http://www.shmmr.net/vb/t53604.html