سالفتي مع الخطابه ... ام عباس

**قلم شمر** · 21-05-2007 03:08

طاااط ... طاط
لا تخافون ماهو بوري سياره
هذي نغمة الرسايل الوارده لجوالي ( نوكيا وارد عرواي )
يالله مرسول خير
وافتح الرساله
ومير
نص الرساله (انا الخطابه ام عباس وهذا رقمي وتوصيل الطلبات مجاناً
أنشره جزاك الله خير )
حشا ماصارن حريم صارن بيتزا توصيل
واقوم تقل مسمار مثبتن بلوووه جدار من خمس طعش سنه
والبس شماغي وعقالي واتكشخ تقل عريس
ماشاءالله علي .
والله واتزين وانا أدق
ام عباس : الووووو ( صورة شهادة ميلاد عام 1350هـ)
انا : هلا
ام العبس ( صرنا نمون ) : هلوين
انا : مرسلتن رساله
ام عباس : ايوا ياولدي
انا : وش عندتس من المعروووض
ام العبس : عندي ارامل ومطلقات وبنات حمايل وبنات مو حمايل
انا : بعدي والله ام العبس موفره لجميع الأذواق
ام العبس : اش تبغى انت
انا : والله ودي بلي مطلقه مامعها عيال ويكون زواج مسيار او زواج مطيار( يعني اذا سافرت بالطياره اجيها بالسياره لا )
ام العبس : احاول ابحث لك انا والله كل المعروض عندي شريكة حياة انتا فين
انا : من الرياض طال عمرتس
ام العبس : انتا ولد حموله
انا : اي والله يابعدي
ام العبس : يعني عاوز حموليه
انا : مابه شك
ام العبس : احاول ابحث لك رقمك عندي وراح اتصل فيك
انا : عاد ام العبس لا توخرين ترا اهم ماعلى الشاب مستقبله
ام العبس : ابشر ياولدي
انا : مع السلامه
ام العبس : ربنا يوفقك ممكن بطاقة سوا
انا : ياما لتس من البطاقات بس ليلة الدخله
ام العبس : شكلك ألعوباني
انا : افااااااااااااا يام عباس ماهقيتها منك
ام العبس : هقيتها ما هقيتها بلا بهلالا
انا : اقول دبرينن بعروس ومالتس الا اللي يرضيتس
ام العبس : دام الدعوى فيها رضى ابشر مع السلامه
انا : مع السلامه

انتهت هالمكالمه قلت عاد وليه مانشر الرقم يمكن تجيني لي دعوه خير ويابخت من جمع راسين بالحلال
والله وأرسل الرقم لواحدن من عيال عمي .
يوم خذيت شوين يوم دق

انا : الوووووووووووووو
تلفون ولد عمي : سود الله وجهك
انا : افااااااااااااا فلانه ( اثريه مرتوووه )
فلانه : الله لا يوفقك ياملا الماحي
انا : عيني خير وش جاتس مني
فلانه : ومرسلن رقم خطابات ياقليل الحيا
انا : افاااااااا اثريه راحت لوووه
فلانه : وين تبيه تروح ياريحتن معاليدز تسبدك
انا : والله اني مرسله لفلان ( زوج وحدتن أخبره ماتدانيه )
فلانه : ماتعرفه
انا : اخبروووه حول هالرقم
فلانه : لا سجل رقموووه عندك بسرعه
انا : هها يالله
والله واسجل الرقم ووادعه

والله وارسل الرقم للثاني
يوم كلمن ويغسل شراعي
واسمع زوجتوووه عنده تعلمه كل الشتايم
المهم قلت يابن الحلال انا ابرسلوووه لولد عمي وارسلتوووه لك بالخطا
واسمعه تملي عليه رقم ولد عمي

المهم ام عباس سببت مشاكل هي ورسالته
والى هاللحين ماحصل ترد علي رغم ان الموضوع طول لوووه اكثر من ساعتين
يعني ماهنا فوووود

**مهاجرة باحساس** · 21-05-2007 03:19

ههههههههههههههههههه

والله مالي مزاج اضحك بس عشان ام العبس اضحك

انت مو تدربي راسك اطلب صورة البنيه والا اطلب تشوفه

اخاف عليك ياوليدي تنغش وانا مرضى عليك انت خوش وليد بشهادة ريال الفسحه وهذا لياشهد اعرف

انه شهادة زور

**قلم شمر** · 21-05-2007 03:24

المشاركة الأصلية كتبت بواسطة مهاجره باحساس

بشهادة ريال الفسحه وهذا لياشهد اعرف

انه شهادة زور

لا هذا باتسر تبين تشوفينه باللوك الجديد وش عليه ريالوووه لبس ثوب العيد بدري

وبعدين ليه تضحكين ماهو وقتن للضحتس الحريم متشابكاتن الشوش الحين
وام العبس واعدتن بصورة وسائط لمس قلم

ام العبس محترفت خطابه ومطلوبه بأوربا بمليون ريال
حريفه هالعجوز
تحياتي مهاجره

**صدى الشمال** · 21-05-2007 05:55

كان ودي ارد قبل مهاجره احساس مدري شعور

عاد خطابات هالوقت كثرن
الله يستر منهن

تلقا المسجلين<<<<<<<<ركزو مسجلين
عنده من الحريم ست طعش الف
والرجال إن كثرو سلسو ميه

يعني اي مره عند رجله لا تبدل تسبدوه
ماهنا اسهل من الزواج

دمت مضحك<<<<<<<<<<<<لا تشره على هالجمل اللي تخرج من فمي

**الأصيل** · 21-05-2007 09:08

[align=center]أنا ماجتن رساله

ليه ،، ناس وناس يعني

المهم ،،

تسان عندك الرقم ،، كزوه لي

وإذا تعرف خطابه غيره .. حاول تطلب لي طلبيه خاصه سبشل

أبي :

الطول : متر وثمانيه وثمانين سنتي

عرض : متر وأربعطعش سنتي

اللون : أدعم

المديل : 2006 أربعه سلندر

السعر ،، أهم شي السعر : 10 آلاف ريال فقط لاغير

وقصر الأفراح عليهم[/align]

**عبدالله الجعيثن** · 21-05-2007 14:24

^
^
كمـــــــــــــــــــــــــان خل الرقم يتجشمن

اشي انجز علينا

ابي بنت حوامل...قصدي حمايل

وما تنعبذ وغدان ....يعني ماتجيب

واهم شي تكون احلى من "فريصه" >>>وحده جارتن لنا مزيونه.

**الـعـمـدة** · 21-05-2007 15:09

فلانه : وين تبيه تروح ياريحتن معاليدز تسبدك

ولو المريّة تولجتك ههههههههههههههههههههههههههههه

ماعليه يا قلم شمر

هات الرقم ارسله لي

انا عزوبي وماهنا الا الخير

هع هع هع هع هع هع

والله يا ام العبس هذي رهيبة

موفرة جميع الاذواق

انتظر الرقم <<<

**بالمختصر..** · 21-05-2007 15:20

.
.

ههههههههههههههههههههههههههههه

<< هاذي ام عباس

.
.

**الـعـمـدة** · 21-05-2007 15:25

^
^

الله يستر اذا ماهي انتي !!

**أبوطروق** · 21-05-2007 16:18

وانت وش ملقفك يوم إنك ترسل هالرقم تقل تبي تجرب على عيال عمك الحين أشرب فعايلك.

حلوة ياقلم شمر
أنا جتني رسالة وهذا نصها
)بنات يبحثن عن الستر بزواج المسيار البكر6000ريال والثيب3500ريال للإستفسار الإتصال بالخطابة أم نمر( وبعدين حاطة رقم تلفون بيت من الرياض. وطبعا الرسالة جاية عن طريق النت يعني مافيه رقم ، مكتوب بالإنجليزي "فروم خطابا"

شكرا وتحياتي