[align=center]
القطفه الأولى :
حنا مركبين قناة المجد ،، وهكا اليوم ، ماطلعت الصوره ،
قالت بنيتي : يبه ، الرسيفر خربان من السطح !!
يبه تكفا اصعد وصلحوه ( الوقت : 9 بالليل )
قلت جيبو الدرج ( السلم )
وهي تشيلوه وتحطوه عند الجدار ،
وقلبها يرقص فرحاً ( صوره بلاغيه واستعاره تصريحيه في محل رفع خبر محذوف ):480r:
بدأت الصعود ، ،
يالربع ، يوم وصلت للدرجه الرابعه ، ونا أدوخ !!!
يابعد القاع بعداه ،
ونا أنزل ،، قالت البنيه ،، يبه : ليه نزلت ؟؟
قلت : يا بوتس ،، خفت
قالت : خلاص يبه ،، باتسر نجيب الكهربائي ،،
صراحه : كسرت خاطري ،، ونا بغيت أبتسي ،، لكني خااااايف
البنيه : شالت السلم بحزن عمييييق ( صوره بلاغيه لصعود فاشل تقديره : من خاف ... نزل )
هنا ..راودني شعور مؤنب للضمير ،،
أفا يابو ثوب .. تخاف من الصطح ؟ ياحيييف ياحيفااان ياحوافيييف !!
.
.
قلت : ياسويره ،، هاتي السلم ،،
ونا لك أجمع قواي .. قلت : والله لأصعد أصعد لو إيش
صعدت ..
وأنا بين خوف الانرضاخ على ظهري وبين آمال سويره التي ترقبني من القاع ،
يالله يالله ،، درجه درجه إلى أن رقيت .. وكأني فوق سطح بلوتو ..
أنجزت المهمه ..
جيت أبي أنزل ،، ليوالله الطامه الكبرى ،،
مدري شلون أحول ،،، أواحلولات يالقاع !!!
المهم ،، فزعت ام العيال ،، قالت : سو كذا وحط رجلك وو
قلت : أخاااااف
وبعد جهد جهيييييييد .. لامست قدمي طرف السلم ،،
وعندها شعرت بالسعاده الغامره التي غمرت
جون هيوارد عندما وطأت قدمه .. سطح القمر
*************
القطفة الثانية :
وصلت خدامتنا من الهند ،،
قالو ، رح جيبه من المطار
رحت ، وخذيت معي خدامة أختي لأنها تعرف الخدامه الجديده
وخذيت ابناخيي عبدالرحمن ( سنع محرم )
وصلنا للمطار ،، لقينا خدامتنا ، مشينا
يوم ،، قظبت الدايري السادس ..
وهي لك تعب وتفوح ريحة مطبخ متنقل
أي ثوووم أي بصللل أي فلفل حار أي كنافة ليالي الشرق
والله ... روااايح تلوع التسبد !!!
وينتس يالجهرا ..
حنا بالشتا ،، برررررررد
لكني اضطررت لفتح القزاز اللي عندي
وهنا بدأت المصيبتان :
الأولى : البرد اللي يقص الخشم !
الثانية : الروايح تمر من عند خشمي في طريقها للخروج من القزاز
وهنا .. لم أجد بداً من السرعة التي أكرهها ..
ونا أدووووس الكامري ،، ( 110 كم / ساعه ) حتى وصلنا للجهرا
عقب ماصفطت الموتر ،، خليت القزاز مفتوح ،، لعل وعسى أن تخرج
تلك الترسبات الهلاميه الناتجه عن أكسدة المحلول السيامي .
**************
القطفة الثالثة :
كان لي مراجعه في إحدى الدوائر الحكوميه ،
قلت ،، خل أمر على سوق الخضار ( التشبره ) وبعدين أروح للمراجعه
رحت السوق ، اشتريت ،من طماط من بطاط من فواكه من من من من
عقب مارتسبت السياره ،، خذيت طماطه من الصندوق ،،
ونا أمسحه بيدي ( من غير ماء ) يعني حريص على الصحه !!
قلت : بسم الله ،،
الفقشه الأولى 100%
الفقشه الثانيه ،، وهي لك تطشر علي ثوبي وعلى إيدي وعلى سيارتي
وصرت حوووووووسه ،،،
لاحول ولاقوة إلا بالله .. هذي دعوة مظلوم
( ماني خابر إني ظلمت أحد غير : طنخان وريالوه والمشرف العام وعجايب والمهيني والاصمعي
وراعي الوقيد وكم واحد من الزقرت والزقرتات !! )
المهم ،،
بوه مسجد قريب ،، ونا لك أدخلوه ، وهات ياغسيل
الثوب والكم وصدري وغترتي ،،
طلعت ... أخررررر ماء !!!!
رتسبت السياره ،، ورحت للدايره الحكوميه ،
دخلت ،،
أول مادخلت ، شفت إن طرف غترتي به بقعه طماط يشوفه العمى!!
والمصيبه إن الموظفات حرييييم ( يافظيحتنا فظيحاه )
لفيت غترتي مثل المتلطم ،، وحنا بالقييييض وحرررررر ،،
واللي يشوفن يقول : هذا أكيد مضروس ...
طلعت من الدايره وقلت :
تووووبه إني آكل طماط ألا بعد الغسل
*************
القطفه الرابعه :
كل ليله بالمخيم ،، أجلس برا ،، عندي حطب ، وأشب الظو
ياما حلا الفنجال مع شبت الظو ** في مجلسن مافيه طنخا وطنخان !!
( صح لسانك ،، ونت من أهل الخير )
أجلس للساعه 12 ،، ثم أروح للبيت ،،
طبعاً .. ثوبي وغترتي وريحتي (( حطب )) تشمه على بعد ميل !!
يوم روحت ،، اتصلو أهلي ، قالو نبي كركم وبزار وليمون من الجمعيه
مريت الجمعيه ( مفتوحه 24 ساعه )
على رف البهارات ،،
يوم دخلت .. واجهت شخص ماشفته من ( 5 ) سنوات !!!
ياااااو ،، إحرااااج ،،
سلمت عليه ، وهو يحبن
يمار تقل حاب لوه جذع سمر مخلوط بإرطه
وهو ريحتوه كله عطورات فرنسيه ،، ماركااات .
قظيت من هذا ،، يمار الآخر بالرف اللي بوه الأجبان ،،
وهو يمطقن مطقه ،،
حسيت إنه دخل بخشمه عود حطب من اللي كنت أشب به
صراحه ،،، إحرااااااااااااااااااااااج
************
القطفه الخامسه ،،
قالو لي العيال :
فلان يعزمك على العشا بالبر ،، عنده تمايم ( عقيقه )
كشخت ،،
دخلت المجلس ...
سلام ، عليكم السلام
مشيت مشيت إلى أن وصلت لصاحب العزيمه ،،
بزعمي فاهم الأصول قلت : مبروك اللافي
قال : الله يبارتس بك
جلست ، تقهويت ، سالفه وقصيده ، جاء العشا
يوم حطوه ،،
قال : قم يافلان على عشاك !!!!!!!!!!!!!!!!!!!!!!
سمو سمو .. ياهلا ببو فلان !!!!!!!!!!!!!!!
يخرب بببيت العدو،،، أثري العشا لضيف مهو تمايم !!!
المهم ،، أنا انقص وجهي ،،
عقب العشا ، قظبت المعزب ، قلت يابو فلان
السموحه ،، ترا العيال قالو لي إن عشاك تمايم
قال : يابوثوب ،، عادي يابن الحلال ... ( دونت ووري )
صراحه ،، عندها ،، حسيت إني من غير ثووووووووب .
************
القطفه السادسه :
قالو أهلي ،، نبي لحم مفروم من القصاب ، للمحشي والملفوف ووو
رحت للشويخ ،، لقيت مصري ، أهلا يابيه ، اتفضل
دخلت ،،
تسم هالخروف؟؟ ،، قال بـ 26 دينار
قلت : أبي تفرموه كلوه فرم
قال : تحت أمرك ياباشا
بدا القصاب بالشغل
..
أنا جلست ،،أتابع مباراه الزمالك والهلال السوداني
بعد لحظات ،، بغيت أقع من الخوووووف
أنا خابر إن معي 40 دينار
لكني نسيت أني شريت دجاج وأغراض بـ 18 دينار
يعني ،، مامعي ألا 22 دينار
والخروف سعروه ( 26 ) دينار ..
والقصاب قم يصلخ ويقطع ويفرم ،،
ياااااااااووووووووووو
يابوثوب ،، شالحل ؟؟؟
أخاف يزعل عليك هالصعيدي ،، ويعلقك مكان الخروف ، ويبيعك بالكيلو
قلت : يالله يالله لاتخليني ( دعوة مضطر من قللللب )
ونا لك أطلع البوك والخردة والربع والنص
22 دينار
وهذا دينار وهذا دينار
وهذا نص وهذا نص وهذا نص وهذا ربع
وهذي خردة حديد ،، ميتين وعشرينات ووو
المهم ،،
جمعت : 26 دينار بالضبط
ولو تعصرن أنا وثوبي وبوكي مايطلع معك فلس وااااحد
العمر ياشامااان
**************
القطفه السابعه :
في سفرتي الأخيره ،، رحت لخويي بالزلفي
وكان عندهم ملتقى الزلفي الربيعي الثاني
قال : تخاوي ، قلت مشينا
وهكا الليله كان برنامجهم ،، شيلات ، ومحاورة عقب الأخير
المهم ،،
يوم وصلنا العصر ،، جلسنا بخيمه ،، سنع شراع
ونا ماأعرف أحد
وهو يجي هكا الرجال معوه كيس
قالو بعض الموجود ،، عط أبوثوب من هالقدوع اللي معك !!
وهو يجدع الكيس دزدامي
يالربع
وهو يطلع هكا الداب !!!!!!!!!!!!!
أنا بردن رجليني !!!
هالداب التسلب .. ترك هالموجودين وتوجه علي ( إي وربي )
ليوالله طوله مترين !!!
قال راعيوه ، لاتخاف ،، هذا مايقرص ،، هذا يعصر الفريسه عصر
وبعدين هذا فرخ ،، توه صغيّر ...
يالربع ،، أنا الحين أبي أهلي ... ماأبيهم ولا أبي محاورتهم ،،
والرجال ،، كل مايقظب الداب ويهدوه ،، يتوجه علي ملعون أبوالجدف
يوم .. قمت أبي أطلع من الخيمه ،،
قال اللي بجنبي ،، شرايك يابو ثوب ،، تبي تمسك الداب ؟؟
قلت : لاوالله ، أبي أمسك الخط
إلى الرياااااااااااااااااااااااااااااااااااا ض
***************
أخيراً : أدري إني دبلت تسبودكم
لكن
الظاهر إن مضايفنا طبت الفيضه
والإداره نيمه
اليوم دخلت المضايف وهي تطلع رساله:
(( هذه الرسالة تفيد بأنك غير مشترك في مضايف شمر. لتسجيل الرجاء اضغط هنـا))
تسيف ماني مشترك ونا أبوثوب ؟؟!!!!!
ياإدارتنا الكريمه
انتبهو من الهكرز ... قامو يلعبون بمضايفكم
وين الدعم الفني والتواقيع والحمايه وووو
إلى اللقاء[/align]
الله يستر 
فش ل هـ بس عادي اهم شيء الاخلاق 
المشاركة الأصلية كتبت بواسطة كلي بكم إعجاب
المفضلات