لا تنــام ..!
لا تنام
هذي آخر ليله معنا ... لا تنام !
قم أولّع لك خفوقي
(عُود) في عين الظلام
وأحرق أنفاسي فتايل
و(المصابيح) العظام
ولا تنام !
،
خلها الليلة تضوّي
لاحقين
وش عليه .. مستعجلٍ زود العتام ؟
(لا تنام)
خلّ نقهر في (أراضينا) .. الغمام
كان شايف حاله إنه بالأعالي ../
علّمه ../..
في صَدِرْ هالكون نِتعلّق .. وسام !
،
قالوا .. (أرض)
ولو يلفّ طولٍ و عرض
ما سمع
لا (بحار) .. ولا (سما) ..!!!
تدري ليش ؟
لانّك (أرض) .. ولأنّي (أرض)
و التقينا
و ما بقى من شي يُذكر
لا على العالم طرينا !
،
و آآآآآه
ليش نمت ؟
وآنا فيني حيل أسهر
وآنا توّي نومي غضّ
والنواظر تشتكي لك
والأماني (ترتجي لك)
لا تنام .. ولا تنام
،
حلو ( نحلم ) وأنت صاحي
بس في نومك .. ( لحالك ) !
مدري عنّك ليش نمت ؟
وماهي لمثلك عوايد
بالخصوص
لا تواعدنا ايتحوّل كل ما حولك أرق
ولا تأخرت بغيابي
يمتلي شاي القصايد في فناجيل الورق !
و ماهي لمثلك عوايد
ليش نمت ؟
،
صعب حيل
لا يفوت الفوت ما ينفع كلام
وأصعب أكثر
جيت أودّعْك .. (بسكوتي)
و أودِع قليبي أمانة
مَعْك في عيشي و موتي
،
ولا وصلنا في لقانا
غصب عنّا ... للختام !
ما بَسَلّم .. !
وراح أمضي في (سكوتي)
راح أمضي ...
و راح أمضي ...
و (تنطق) دموعي .......... سلام !
تنطق .. دموعي .. سلام
رد مع اقتباس
المفضلات