عاد انا جايكم متحمس
أول رد قبل حتى المشاركة أتمنى أن تقبلوني بينكم
الله يسلمكم كلكم عاهات ونكبات وانا اتحمد ربي أنوه مو لحالي بهالدنيا مقرود
عشان تسذا أبقعد على تسبودكم بهالمضايف
هذا ياجماعة الربع والربيعات يوم كنت بالمتوسط ويجون الادارة قالوا صف ثالث متوسط ننقلهم لمدرسة ثانية ....
ياشينين ليه ؟؟ مستانسين ومسوين ارواحنا شيوخ بهالمدرسة !! قالوا : لا قشوا عفشكم وروحوا للمدرسة الفلانية.
وحنا نتزهب وناخذ غريضاتنا يالله لك الحمد ونتوكل...
وندخل المدرسة الجديدة تسننا جايين من امريكا على هالمدرسة اللي اصغر واحد بهم عمره عشرين وشوي.
ويوم دخلنا يمار هالجذعان كلن يقول تعالوا هذا صفكم وحنا نستاحش
ومن زين هالمدرسة يقولك مرتبين عزلونا كل اربعة بصف مع هالمتعافين.
واجي بصف يالله لا تعيد هالدراسه اللي يندرس بهالصف .... مجموعة ملونين ومجموعة مشوربين ومجموعة وغدان خخخخخخ اللي هم حنا بالنسبه لهم.
عاد محاتسيكم لسانه فتيلة لاحد يقولي انزح وراك
يمار اكا الصبي اللي يقول لي قم هذا متساني .... وانا اقول بقلبي وش هالاحراج هذا مايفهم والا متعمد يبي يجس النبض ( تعرفون اول يوم كلن يبي يصير عمدة الصف )
وانا اقوم واقولهبكل برود : يابيي دورلك على متسان اخر تقعدبوه ضاقت عليك الوسيعة؟
قال لالالالا هذا متساني وانا ابقعدبوه.
توهقت الحين لا أقدر اطارحه ولا أقدر اسكت والا اصير مضحاكتهم.
قلت اسمعن زين بعد الحصة اقوم وانت تجلس بهالمتسان بس خلن الحين مدرس الرياضيات جا
قال زين
وهو يدخل مدرس الرياضيات هكالسوداني اللي معه عصا كبر امس واليوم.. وانا اطلع كتابي ودفتري ( زعمني متزهب للدراسة ) وهو يقوم حدا هالطلاب اللي أطول من المدرس ماشالله عليه وياخذ المسطرة ويقسم اللوح ثلاث اقسام ويقعد.
وهو يقول المدرس : قووط موورننج قالوا الشباب قوود مورننج ( وانا اقول بنفسي هذا رياضياته بالانجليزي الظاهر ) ... قال : ووط أزز تووداي؟ وانا ينلحس مخي هذا وش يبي وأطالع الا الشباب مطلعين كتاب الانجليزي قلت لا هذا من اولها...
أثاريه الماخوذ مدرس انجليزي وانا بعقليتي الفذه استنتجت انه مدرس رياضيات وانا معي عذر اولا سوداني وانجليزي ماتركب ( حفاظاً على الذائقه العامه للمستمع ) ثانياً المسطرة.
مالكم بطولة السيرة وهي تنتهي الحصة وهو يجيني رفيدزي اللي مشوين قال عاد الحين تقوم والا(قوية الكلمة ) خخخخ
المهم وانا تركبن الحيونة اكا الصباح واعيي قلت معصي وهو يرفع يده الا جايتن تمشي ستين عقدة بالدقيقة ووووووو أدددددددددددبج
وانا اقوم علية وهاتك يادبج كلن يضرب باليد المليانة ( طبعاً ما أبي أقول كمخن ) فرقوا الشباب وهو يدخل علينا اكا البعير ويقول : وينهم وينهم؟؟؟
الوكاد أشروا علينا وهو يطالع بي بنص عين قال: انت يالنتيفة اول دوام لك مسوي شغب ؟؟ يالله برا على الادارة.. وانا اتحلطم مدري وش اقول المهم طلعت برا وهو يجيب رفيدزي معي ونسنتر عند الادارة من صباح الله خير لين جت الفسحة ويوم جت الفسحة وانا اروح واشتري فسحتي وقرقت سوالف لين خلصت الفسحة وارجع لمكاني.. اثاري خوينا جالس ينتظرنا وحنا معطينه ابو لباس ورايحين نتفسح ..
يمار نفسة براس خشته قال : ماشالله عليكم انا ماقلت انتظروا هنا واجيكم وانا انبر بصوتي الحسين قلت جت الفسحة ورحنا ندور عيشة
قال : على شحم. وهو يبرد وجهي واغدي تسني قوطي ببسي من الفشله .
وهو يمشي رفيدزي قاله لا تعوده قلت وانا ؟ قال: انت انثبر بمحلك لين اشوفلك صرفه( ايا الحظ الاقشر )
الحين يمشي هالمتحر وانا اللي تسني بثاني ابتدائي يخليني واقف عند باب الادارة تسني راعي سوابق
الوكاد مالكم بالطويلة وهو يجيني على صلاة الظهر قال يالله مشينا نصلي قلت : الحمد لله الحين يلين قلبه ويعفي عني.
ويوم صلينا يمار هكالمدرس جايب كرسيين وعصا تسني شايفهن قبل وهو يأشر علي خويي قال : تعال وهو يعلن أمام الملأ اني مسبب شغب وما أستحي وهلما جرا ( عاد هلما جرا مدري وش تبي )
الوكاد وهم يجلدونن فلكه لين مطقن رجليني وانا أقوم متثيقل تسني شايب عمره ستين...
أثاريه يبي يضحي بي قدام هالعالم عشان أصير عبرة لمن لايعتبر.
ومنه وأنا أقول أقرد من على الأرض : الكنبيوتر
سلام
رد مع اقتباس
ياحي الله ريال 
المفضلات