شيخة عبدالله ابن رشيد

[فواز الغسلان]

بسم الله الرحمن الرحيم

شيخة عبدالله بن رشيد والتي اعتبرها انا حسب تقديري المتواضع انها افضل قصيده لقبيلة شمر عموما لما تحتويه من عقيده ومكارم اخلاق وشجاعه عند الحاجه والغريب انها قليلة الانتشار مع الناس ومن قالها لايأتي بها كامله وخاصة ان الابيات العشر الاولى منها كلها عقيده وتوحيد ويتجاهلها من يريد القول ان ذاك الوقت كانت العقيده مهتزه لدى اهالي حايل وأميرها رحمه الله والغريب انني عندما سجلتها لدى دارة الملك عبدالعزيز لحفظ التاريخ قال لي المشرف ان هذه اول مره يسمعها بالرغم انه يسجل من الرواة منذ عشرين عام0000

ومناسبة القصيده ان الامام فيصل بن تركي ارسل يعاتب عبدالله بن رشيد بعد موقعة بقعاء على الذبحه اللي صارت لاهل القصيم ومن معهم عام 1257هـ وذلك بحكم الصداقه التي تجمعهم وهناك وقفه مشكله لدي وهي ان الامام فيصل مأسور في مصر خمس سنوات من عام 1254 الى 1259 ويكون وقت وقوع المعركه بالسجن وهذه التواريخ مجمع عليها الا ان كان العتب ارسله الامام بعد سجنه ومرور عامين على المعركه00 ارجو افادة من لديه افاده 00 المهم ان الامير ابن رشيد اراد ان يشرح للامام انهم صالوا عليه بديرته ولابد من الدفاع عنها وأنه ماجاهم بديرتهم وتوضيح لمكارم شمر من جميع النواحي واسمعوا هذه الجوووووهره :

الحمد للباري فزع من شكى له = والحمد له ثاني على كل الاحوال

والحمد له ثالث بقدرة فعاله = حمدن كثيرن عد ماقايلن قال

وعداد مافوق الوطى من رماله = او ساح ضلن بالعوالي والاسهال

او عد ماترمي الوقايع خياله = سحن و تسكابن وديمن وهمال

كل الثنا والشكر له والجلاله = سبحان منهو كل ماراد فعال

رب السما رزق الملا من نواله = محيي الهشيم الميت الدارس البال

مولاي عازل شمسها عن ظلاله = سيدي ومسنادي ليا ضكن الجال

كم ضيقتن من منته جت وزاله = وزاده بعزن ماهقيناه بالبال

والحمد لله ماكرهنا لقاله = إلا تصير عقوبته عز وقبال

ومن قال ذا فعلي فهو من هباله = الفعل فعل اللي ليا راد فعال

وخلاف ذا يامن يودي الرساله = في صف مصقولن عليه القلم سال

سلام لمنهو له على الشوف واله = ومشاهد اللي للثقيلات حمال

سلم عليه ولا تقول له مقاله = إلا لكان إنه نشد عني او سال

وقال اخبرن عن صاحبي كيف حاله = عطه الجواب اللي كتبنا والامثال

وقله يقولك ياخلف من غداله = من الحي والميت ومن العم والخال

ركبو على عوص النجايب رجاله = يبرالهم يابو سمي كم خيال

وجونا الضحى ياشيخ ماهي نطاله = وسارو لما رادو على كل مشوال

وعادات راع الزود واللي مشى له = يرميه بالميدان من غير خيال

شف حالفن بالزور شف وش جراله = ياعونت الله مامن الحي عقال

زادو وبادو من هبايب شماله = كلن له الله يوم يعرضن الأعمال

ويوم انهم عجزو عني بالغياله = شبو لنار الحرب بالقيض صوال

ومن شب نارن حرقت باشتعاله = وصارت عقوبه فاعله ذل واذلال

وان كان ما شافو وعافو نواله = وصارت بقاياهم هذولاك جهال

فالسيف للتايه سداده حناله = وندل به منهو عن الجاده عال

وليا كبى لونه محشنا صقاله = ولاهو من القلطات والضرب ملال

وعبيدن اللي لاعدمنا خياله = حطه لهم مولاي نجمن وزلزال

هذي علوم ديارنا وماصفاله = مايذاق ماه إلا بقصاف الاجال

لما صفت بالسيف ماهي جماله = وثنيت للرثاع بالقيد وعقال

ولا نفوز إلا نروي سلاله = من دم هامات العدى عل وانهال

وحقن علينا الجار نرفى خماله = ونفزع لمن جانا عن الضيم دخال

وللضيف نقري حين تبرك رحاله = ومن غير من المحتري مانهج خال

وأن جاء صديقن من عدون صياله = رفيقنا نرخص له الحال والمال

يامن بنا سرحه وضايع حلاله = ولا بات في قلبه من الخوف ولوال

والشر ندفع جانبه بالسهاله = ولانا لتقريبه من الناس قبال

وانا ليا ركب الرشا للمحاله = واستثقلت مانا من الحرب ملال

ارسي كما ترسي رواسي جباله = ماتنهزع من وطي حافي ونعال

يمناي ماترضى زوايد شماله = واعطي الحقوق اهل المعالي والأرذال

شهودي بجلدي والعدو به بداله = والناس تدري بالجدايد والأسمال


هذه قصيدة الأمير عبدالله ابن رشيد (( يرحمه الله )) وكثيراً ما تتداخل مع قصائد مشهوره على نفس القاف مثل قصيدة ابو زويد مطلعها :

دخيل خذ من والدك لك مساله = مسالتن مايفهمه كل رجال

وقصيدة القاضي مطلعها :

الصمت به سر سعد من يناله = والهذر به شرن وشومن وغربال

وقصيدة ابن لعبون مطلعها :

يابادي بالقيل هذا بداله = قولن بدل قولن ومالن عوض مال

وقوله (( عجزو عني بالغياله )) يقصد الشخص اللذي ارسله اهل القصيم لأغتيال عبدالله ابن رشيد و اسمه ابو هادي والذي يقول فيه :

القلب مصموعن وبالكف قاطوع = ماهي حكايا رقصتك يابو هادي

علماً ان عبدالله ابن رشيد لم يخوض معركه غير هذه لأنها دفاع عن البلد وهو المبدا اللذي سار عليه رحمه الله

والسلام عليكم ورحمة الله وبركاته

ابن غسلان ((الراوي))

[سعد الأزمل]

يعطيك العافية ومشكور عد رمال النفود وماسال شعيب في حائل

ولا تحرمنا من الدرر التاريخية يا الراوي الغالي

[ابن جشعم]

رحمك الله ياراعي الشيخة رحمة واسعة

وهناك وقفه مشكله لدي وهي ان الامام فيصل مأسور في مصر خمس سنوات من عام 1254 الى 1259 ويكون وقت وقوع المعركه بالسجن وهذه التواريخ مجمع عليها الا ان كان العتب ارسله الامام بعد سجنه ومرور عامين على المعركه00 ارجو افادة من لديه افاده 0

الإمام فيصل بن تركي يوم انه هرب من مصر ومعه اخوه جلوي عام 1261 هـ توجه لحايل لصديقة عبدالله ابن رشيد بحكم ان عبدالله بن ثنيان مستولي على الحكم بنواحي نجد.
محتمل انه اثنا تواجد الامام فيصل بن تركي بحائل وأخذ الاخبار وعلمه بمعركة بقعاء انه لام ابن رشيد وبعد استقرار الامر للأمام ارسل له هذه القصيدة يوضح له الامر.

وانا ليا ركّب الرشا للمحاله = واستثقلت مانا من الحرب ملال

هالبيت هذا فيه ضرب مثل بس مافهمت المغزي منوه!!



لاتعبت يالراوي يابو فهد

عز الله ان الطيّب مايجيب الا الطيّب والجلب الزين
مشكور يالطربة على التوضع وإدراج القصيدة كامله.

[خالد الشمري]

الاخ الفاضل فواز الغسلان الف شكر على ماتقدمه لنا ولاخوانك وتسلم على كل ماتتفضل به
اتمنى منك يابو فهد انك تسمح لنا اننا نورد سبب اخر لللقصيده وهي اني سمعت روايه اخرى لسبب القصيده وهي الاحداث التي جرت بين ااماره حائل واماره عنيزه من عام 1261 هجري الى عام 1263 هجري ومقتل عبدالله ابن سليم بعد قصه الاسلميه وهي كامله على هذا الرابط ((والله اعلم ))
http://www.shmmr.net/vb/showthread.php?t=27050

والف شكر مره اخرى على تواصلك واثرائك للمنتدى

[شموخ]

تسلم يابو فهد على ايراد هذه القصائد النادره

والغريب انني عندما سجلتها لدى دارة الملك عبدالعزيز لحفظ التاريخ قال لي المشرف ان هذه اول مره يسمعها بالرغم انه يسجل من الرواة منذ عشرين عام0000

حلاة الشي يوم يكون نادر محد قد سمعه ومن ثقه


تحياتي
شموخ

[راعي الوقيد]

ومناسبة القصيده ان الامام فيصل بن تركي ارسل يعاتب عبدالله بن رشيد بعد موقعة بقعاء على الذبحه اللي صارت لاهل القصيم ومن معهم عام 1257هـ
ارجو افادة من لديه افاده 00

ياحي الله راوينا الفاضل

الغالي وغيرك المعلم

مناسبة القصيدة هي غارة الامير عبيد ابن رشيد على اهل عنيزة صباح يوم
عيد الاضحى من سنة1261هـ..

في عام 1261هـ كانت وقعة عبيد بن علي بن رشيد على أهل عنيزة ، وسبب ذلك أن
عبدالله بن سليمان بن زامل [ ابن سليم ] أمير عنيزة اغار على اطراف شمر واخذ حلالهم ،
فطلب منهم عبدالله ابن رشيد ارجاع الحلال ولكنهم رفضوا كما طلب من الامام فيصل ان يتوسط في الموضوع وبالفعل قام الامام وارسل شخصان واحد اسمه فرحان والثاني يقال له بن سبيت ،ولكن اهل القصيم قاموا يماطلون مع مراسيل الامام مما اغضب عبدالله وقام وارسل اخوه عبيد على راس سرية الى اهل القصيم فسار إليهم عبيد في مائتين وخمسين مطية وخمسين من الخيل ، فأغاروا على غنم أهل عنيزة وكانت قريباً من البلد ، ففزع عليهم أهل عنيزة ، وكان ابن رشيد قد جعل لهم كميناً ، فلما نشب القتال بينهم ؛ خرج عليهم الكمين فانهزم أهل عنيزة ..
وتعرف هذه الوقعة بـ[ وقعة الجوى ] ...

الراوي العزيز ..

يمكن التبس عليك الامر بسبب البيت التالي :-

وجونا الضحى ياشيخ ماهي نطاله = وسارو لما رادو على كل مشوال

والصحيح :-

جوه الضحى ياشيخ ماهي نطاله = وسارو لما رادو على كل مشوال

وهذهـ ابيات القصيدة التي احفظ :-

[poem=font="MS Sans Serif,5,white,normal,normal" bkcolor="teal" bkimage="" border="none,medium,gray" type=4 line=0 align=center use=ex num="0,black"]
الحمد للباري فزع لمـن شكـى لـه =والحمد له ثاني على كـل الاحـوال

والحمـد لـه ثالـث بقـدرت فعالـه=حمـد كثيـر عـد ماقـايـل قــال

او عد مافـوق الوطـى مـن رمالـه=او ساح ظـلّ بالعوالـي والأسهـال

او عـد ماترمـي لـواقـح خيـالـه=سـحٍّ وتسكـاب ٍ وديـم ٍ وهـمّـال

كـل الثنـا والشكـر لـه والجلالـه=سبحان من هـو كـل مـاراد فعّـال

رب السماء رزق المـلا مـن نوالـه=محيي الهشيم الميّت الـدارس البـال

مولاي عازل شمسهـا عـن ظلالـه=سيدي ومسنادي إليـا ضكّـن الحـال

كم ضيقة ٍ من منّتـه جـت وازالـه=وزاده بعـز ٍ مـا هقيـنـاه بالـبـال

والحـمـد لله ماكرهـنـا لـقـالـه=إلا علينـا عقوبتـه عــز وإقـبـال

ومن قال ذا فعلي فهـو مـن هبالـه=الله معاوني علـى مـن علـيّ عـال

وخـلاف ذا يامـن يـودي الرسالـه=في صفح مصقول عليه القلـم سـال

سلام من منّه علـى الشـوف والـه=لمشاهـد اللـي للثقيـلات حـمّـال

سلّـم عليـه ولا تقـل لـه مقـالـه=إلا ّان كان هـو نشـد عنـي وسـال

وقال اخبرن عن صاحبي كيف حالـه=عطه الجواب اللـي كتبنـا والأمثـال

وقل له يقول لك ياخلف من غدا لـه=من الحي والميت ومن العم والخـال

ركبوا على عوص النجايـب رجالـه=يبرا لهـم يابـو سمـي كـم خيّـال

جوه الضحى ياشيـخ ماهـي نطالـه=وساروا لما رادوا على كـل مشـوال

هذاك حق اللي خطوطك عصـا لـه=فرحان وابن سبيت ماألقى لهـم بـال

يوم الخطوط أقفـت وجـت ماقرالـه=جـاه المقّـري وألحـق الأول التـال

عيّا يطيـع اللـي بنصـحٍ حكـا لـه=من عقب ماكزّيت لـه كـم مرسـال

وعادات راع الـزود واللـي مشالـه=يرميـه بالميـدان مـن غيـر خيـال

عادة حلاف الزور شف وش جرى له=ياعونـة الله مامـن الحـي عـفّـال

البغي كم ناس ٍ خلـت مـن رجالـه=ياما هفا بالبغي من مـاض الأجيـال

زادوا وبـادوا مـن هبايـب شمالـه=كلِّ لـه الله يـوم يحسبـن الأعمـال

يوم انهـم عجـزوا عنـي بالغيالـه=شبوا لنار الحرب بالقيـض صـوّال

ومن شـب نـار ٍ حرقـه بإشتعالـه=وصارت عقوبة صاحبـه ذل وإذلال

وإن كـان ماشافـوا وعافـوا نوالـه=وصـاروا بقاياهـم هـذولاك جهّـال

السيـف للتايـه ستـاده حنـى لــه=وندل به من هو عـن الجـادة مـال

وإليـا كبـا لونـه محشنـا صقالـه=ولاهو للقلطـات والضـرب مـلاّل

وعُبْيدنـا اللـي لاعدمـنـا خيـالـه=حطه لهـم مـولاي نجـمٍ وزلـزال

هذي علـوم ديارنـا مـن صفـا لـه=مشروب ماها إلا بقصّـاف الآجـال

إليا ما صفت بالسيف ما هي جمالـه=وثنّيـت للرثـاع بالقـيـد وعـقـال

ولا نفـوز إلا ّ نــروي سـلاالـه=من دم هامات العـدى عـلّ وإنهـال

حـق علينـا الجـار نرفـا خمالـه=ونفزع لمن جانا مـن الضيـم دخـال

والضيف نقري حين تبـرك رحالـه=من غير من المحتري مانهـج خـال

وان جا صديـق مـن عـدو صيالـه=رفيقنا نرخص لـه الحـال والمـال

ويامن بنـا سرحـه وضايـع حلالـه=ولابات في قلبه من الخـوف ولـوال

ومن جا يريد الزيـن يعطـى سوالـه=وعن عانـي الله ماقطعنـا الاوصـال

والشـر ندفـع جانـبـه بالسهـالـه=ولانـي لتقريبـه مـن النـاس قبـال

فان كان هو ركـب الرشـا للمحالـه=واستثقله مانـا مـن الحـرب مـلال

ارسي كما ترسـي رواسـي جبالـه=ماتنهزع من وطـي حافـي ونعّـال

فان كان تبغي اليوم قصـرت طوالـه=فاعزم ولاتنظـر لراضـي وزعّـال

يمنـاي ماترضـى زوايـد شمـالـه=واعطي الحقوق اهل المعالي والارذال

شهودي بجلـدي والعـدو بـه بدالـه=والناس تـدري بالجدايـد والاسمـال [/poem]

اما الاسلمية فموضوعه مودجود على الرابط هذا

http://www.shmmr.net/vb/showpost.php...80&postcount=1

ومشكور يابو فهد لأنك اعطيتنا الفرصة بالإفادة والتعليق

لك التحية

والسلام ...

[فواز الغسلان]

اشكر الأخوه سعد الأزمل وراعي الوقيد وخالد الشمري و ابن جشعم و الأخت شموخ على مداخلاتهم على موضوعي السابق واما الملاحظة اللتي ذكرتوها وهي ان القصيدة كانت بسبب أخذ حلال شمر فأني استفدت من ذلك كثيراً إلا انني استبعدتها سابقاً بسبب قول ابن رشيد :

يوم انهم عجزو عني بالغياله ,,, شبو لنار الحرب بالقيض صوال

وهذا يشير إلى معركه وليست حيافه على الحلال وايضاً ذكره شجاعة اخوه عبيد وشواهد اخرى كلها تدل على ان اسباب القصيدة كانت بعد حرب ومعركه وسوف ابحث الموضوع كثيراً للفائده .

علماً ان الأمام فيصل بعد خروجه من السجن عاتب اهل الرياض ووصفهم بالجبناء لكونهم لم يدافعو عنه وقت اسره من قبل جيش الباشا وهي قصيده جميله ليست مكتوبه في الدواوين الحاليه لحاجتن في نفس يعقوب وسوف اذكرها لكم لاحقاً انشاء الله .

والسلام عليكم ورحمة الله وبركاته

[الصيرمي]

عندما غادر الامير/ عبدالله ابن رشيد الرياض عائدا الى حائل كان لابد له من المرور
بالقصيم ، حيث بات ليلته في قرية تسمى " البُصْر " من نواحي بريده.
مع ان فيصل بن تركي كتب الى اهل القصيم يوبخهم وينهاهم عن التعرض لطوارف ابن رشيد ، فان اهل القصيم ما برحوا يكيدون المكائد فعندما بلغهم زواج عبدالله بن فيصل من نوره بنت عبدالله الرشيد فقالوا في انفسهم:اذا اخذ بنت عبدالله صار معه علينا في كل حال ، ولكن مامن الا نعد لعبدالله رجاجيل يكونون في اطراف القصيم يكمنون من جهة الشمال والقبله ، لانه ماله ممر الا على احدى الجهتين.
فعندما بات بالقريه المذكوره اتاه واحدن من اهل القريه اصله شمري ، قال ياعبدالله انج بنفسك فيه ناس بالقريه يرصدون تحركاتك ، وكان المعزب ايضا شمري من اهل البصر. قال انا ادبر الحيله ، ولم تكن القريه متصله البنيان ، بل كان كل واحد منزله بمزرعته ومنحاز عن منزل جاره . حيث ادخل عبدالله ومن معه بستانه الواسع واعد لهم باب من ظهر البستان ، فقال لهم : ان الرجال يكمنون لكم بهذاك المكان وانتم خرجتوا تعرفون الدرب ، ففعلوا فنجوا .
وقد تعرض هاذا الشمري للاذى من قبل اهل القصيم لان بسببه نجى عبدالله ابن رشيد
من الكمين المعد له.
عند ذلك قام ابن سليم وارسل له عبد معه اثني عشر خيال وركائب وقال لهم: اغيروا على اطراف قرى الجبل ، فأغاروا على قريه " سميرا " فأخذوا معاويد وبقر غير كثيره ، وردوا واغاروا على قريه يقال له " السبعان " .
اما ابن رشيد فلما اتاه الخبر ، واذا عنده جماعته شمر ، فقال : الله يسود وجوهكم ، عبد ياتيكم من القصيم ويغير على اطراف قراكم ، اما لو انهم جمعٌ ما قلت لكم ولا لمستكم ولكن انما هم شرذمه.؟
ولا يزال الشر يسعى بين اهل الجبل واهل القصيم الى ان اتتهم قافله لشمر ، فاخذوها. وعند ذلك كتب عبدالله ابن رشيد الى فيصل ابن تركي يعلمه بما فعل اهل القصيم.
فعند ذلك كتب فيصل لعبدالله : اننا نكفيك اياهم ، ويردون ما اخذوا ولو عقالاً.
فأرسل لهم فيصل رجلين من خدامه ، واحد يقال له فرحان والثاني ابن سبيت ، وقد كان بين ابن سبيت وعبدالله صحبه ، فلما اتاهم ابن سبيت جعلوا يمنونه ويعدونه انهم يردون ما اخذوا! واستقام عندهم ثلاث اشهر وهم يماطلونه ، فلما ابطأ ارسل له عبدالله خط خفيه وقال: اخبرني بالحقيقه؟ فقال : الحقيقه انهم عاصون، ولكني بعد خمس ايام سأخرج من عندهم فإذا خرجت فأنت واياهم بصركم
فعند ذلك استعد عبدالله للخروج اليهم ، فركب غازياً في شمر ، الحضر والبدو ، فلما وصلوا السبعان ، قال له اخوه عبيد وابنه طلال: انه مافيه داعي انك تقوم بنفسك للغزو ، انما نحن نكفيك.
فقال: اخاف انكم تنجزونهم؟ وقد كان حاد الطبع ثم يهوّن رحمه الله.
فقال لهم : ليا صرتوا معزمين على قعدتي اجل اذا وصلتوا حدود البلاد ، اكمنوا ، وارسلوا بركاب يغيرون على غنم اهل عنيزه لانه من المعلوم اذا صارت غاره على السرح ان اهل البلاد ينفرون. ولم يكن عندهم ، اهل عنيزه ، خيل الا الشي القليل.
ففعلوا ما امرهم وارسلوا اهل عشرين ذلول واغاروا واخذوا الغنم. فاتى الراعي يصيح فعند ذلك ظهروا ولم يأل الاول للثاني وكان الوقت حار بعز الصيف ، فلما وصلوا الى مكان الغنم وكان يبعد عن البلاد مقدار ساعتين او ساعه ونصف. فاذا هم قد تعبوا ولهم تالي. فخرج عليهم الكمين بالخيل عبيد وطلال واغاروا عليهم وقتلوهم ؟حياه قشرررا
قتل العديد من اهل عنيزه من بينهم رئيسهم عبدالله ابن سليم.
ورجعوا آل رشيد واليا الصقور من عنزه كان بينهم واهل القصيم ميعاد اذا ظهرتوا على ابن رشيد اننا نساعدكم فعند ذلك اغاروا عليهم عبيد وطلال ومن معهم واخذوهم وجابوا منهم ابل وغنم .
ورجعنا للجبل معنا الغنايم @@ عوايدنا الى منا غزينا

واما رجال فيصل فهم خرجوا الصبح والوقعه صارت بعد الظهر .
فلما رجعوا الى فيصل ووصفوا له ما رأوا من هول الواقعه ، غضب وقال: هاذا شي ما يجوز قتل المسلمين لاجل بعير واشباهه.
اما عبدالله وعبيد فقد كانوا يتوقعون من فيصل الغضب ، لانهم يعرفون ورعه وديانته.
وارسلوا له الرسل وكتب معهم عبد الله خطوط وكتب قصيدته المشهوره:
الحمد للباري فزع من شكاله ## والحمد له ثاني على كل الاحوال

وكان قد سبق لاهل القصيم ان دبروا مؤامره لاغتيال عبدالله في سنه 1259هـ واتفقوا مع رجل يدعى ابو هادي...الخ القصه
وقال عبدالله في ذلك قصيدته :
لي ديره مابه حذا البرد والجوع 00 لولاي عفيته بضرب الهنادي

اما فيصل فلما جاءه مراسيل عبدالله تكلم عليهم ، وقال: يقتل المسلمين بغير حق ، فلما انفض المجلس ، سأل المرسال : شلون عبدالله؟
قال: خذ وهو يمد له المكاتيب واليا بهن قصيده عبدالله ، ويوم قراه رضي ،
وقال: اهل القصيم لم يزالوا اهل بغي وطغيان؟

هاذا ماجاء نصاً بكتاب " نبذه تاريخيه عن نجد "
املاها الامير/ ضاري بن فهيد بن عبيد آل رشيد
كتبها الاستاذ/ وديع البستاني

تحياتي

[فواز الغسلان]

اخوي سند السلامه شكرا على التوضيح القوي وهذي هي الفايده الحقيقيه لمثل هذه المواقع


وتقبل تحياتي..... ((( الراوي )))