مساكم الله بالخير جميع
اخواني
وخواتي
سنتن من السنين يوم انا وغد
كنا ساكنين ببيوت شعبيه وحالتنا حاله
وكنت مطفوق ومقرود من يوم انا صغير
ويومن من الايام انقردت قرادتن مامثله
كان فيه واحد خوين لي عندوه ابون الله يستر منوه
عصبي لاخر درجه
ولا يعرف يتفاهم
ويومن من الايام كنت جالسن الظهر عند باب بيتنا انتظر رفيدز الغفله
ويوم خذيتلي شوين ليمار هذا هو جاي يركض
قلت وشفيك تركض
قال ابوي تووه نايم وانا انسرقت من البيت
قلت وين تبينا نروح نلعب
قال نبي نروح لشبك ابو سطم ( شبك بوه غنم ومعزا )
قلت يالله
وحنا نروح نلعب على الغنم والمعزا
وعلى بالنا فرسان وكل شوين راتسبين على حدا الغنم
ومافطنا الا هذا ابو سطم داخلن علينا
ومن الخرعه عجسنا نهرب
وهو يمسكنا ويربطنا بالشبك ( مثل معتقلين قواتنامو )
المهم قمنا نسولف مع بعض ونخطط علشان نفك اعمارن
يوم خذينا شوين ليمار هذا ابو خويي توه طالعن من البيت
خويي يوم شاف ابوه طالع وهو يقوم يصيح
قلت ياملعن اسكت لا يشوفنا يجينا يذبحنا
وهو يزيد صياحوه
ويوم شافنا ابوه وهو يجي ماسكن عقالوه بيدوه
قلت بس استانست ياملعون الرقبه رحنا فيها
وانا اقوم ابتسي معوه
وكلما قرب ابوه زاد صوتنا
الله يجيركم ويوم قرب لنا وهو ينصاني ( الله العالم انوه من العصبيه مايشوف الا الزول )
وهو يهجم علي وانواع التكفيخ
وانا اصيح ماني ولدك يافلان
ترك غلطان
وهو شغال تبقيس وانا ماقدر اسوي شين ولا اقدر اهرب لاني مربوط
المهم عقب عشر دقايق مريره من عمري وهو يغولن قال هاه منت فلان ( يعني ولده )
قلت لا هذاك هو ( اغط عليه بلساني )
وهو يروح يفك ولدوه ويمسك اذنوه ويجروه للبيت
وانا لي صياح ابيهم يفكوني
وجلست بمكاني ليما جاء ابو سطم المغرب يبي يعلف غنموه وفكن
وهذي مرتن من المرات يوم تسبرت شوين
كنا نسوي مشاكل مع الحواري اللي جنبنا
وهجمنا بحدا هالايام على حارتن وعثيت بهم عثي
وكفخناهم تكفخ
وعقبه بكم يوم كنت جالسن مع اثنين من خوياي ويوم راعينا ليمار هكا الشله جايتنا
اثريهم اللي هجمنا عليهم قبل كم يوم
والله يجيركم وحنا نلوذ بالفرار ( مافيه مجال للمقاومه )
وعندك عندك
والله وانا اتغيب ورالي شجره ( جتن القراده )
قلت لخوياي انتم انحاشو
والله وهم يهربون
وم يمروني الشله ويفوتون
الا اخر واحد يوم تعداني وهو يراعي وراوه
وهو يقوم يصيح لخوياوه
هذا هو تعالوا
وهم يديورون علي
( دقيقة صمت بالله )
وهم يتقاطعوني وانواع التشويت وانواع التفيس
ولاخلوني وانا اعرف اسمي
طبعا بيجيني واحدن منكم ويسألن ليه ماهربت ؟
والاجابه بكل بساطه صكتن ا الركب
وبيجيني واحد ثاني ( ملقوف ) ويسالن وش حسيت بوه يوم رجعو لك ؟
والاجابه
حسيت بغثيان ودوخه ومغص بالبطن
وبعد حسيت اذاني ارتفعن .
بس لحد يسأل
وهذي مرتن يوم تسبرت وغديت رجل
دق علي خوين لي قال يا شبيثان ابيك تستقبلن بالمطار
قلت افا عليك ابشر
وقبل موعد وصول رحلتوه بساعه وانا بالمطار
المهم جلست وطولت بالجلسه
وقلت لنفسي انا ليه ماروح اشريلي شي من البقاله ( اللي بالمطار )
المهم رحت للبقاله وشريت لي جريده وكيس حلاو يسليني ليما يجيني خويي
المهم جلست وحطيت الحلاو بجنبي وقمت اقرا الجريده
وهو يجي واحد ويجلس بجنبي
وهو يفتح كيس الحلاو وياخذ منوه حلاوه وياكله
وانا اقوم اراعيلوه باستغراب وانا اخذلي وحده واكله
ويوم خذالوه شوين وهو ياخذ الثانيه وياكله
وانا اقوم اراعيلوه بعينن حاره
قلت بنفسي وش هاغثيث اللي ماتربا
والله يجيركم كل ما اخذلي وحده واكله ياخذ معي
ليما بقي اخر وحده
قلت لنفسي اذا خذاه والله انوه مايستحي ولا يعرف الحيا
والله وهو ياخذه
قلت عزالله هذا الخالص
وبغيت اتكلم عليه مار قلت خلن احسن منوه وابرك منوه
والمشكله اني كل ما اراعيلوه يتبسم
وانا ارد بابتسامه بارده واقول بنفسي بعد كشره يهالهديفه
المهم خذالوه شوين وهو قوم ويمشي
وانا انتظرت خويي ليما جاء والله وانا اخذ جريدتي يوم راعيت ليمار المفاجأه
لقيت كيس الحلاو حقي بجنبي
اثريني من اليوم وانا اكل معوه حلاووه واتكلم عليه بعد
اثريني انا الهديفه وهو الكريم
والله يجيركم طلعت من المطار وانا ذالن انوه يشوفن
تصدقون اننا نراعي للناس كذا
نحسب البلا بهم والبلا بنا
هههههههههه
ملاحظه مهمه :
اخواني واخواتي
هالموضوع ساهم فيه عضو رافض اني اذكر اسموه
وقالي هذي هي الافكار وانت اكتب موضوع لاني ما اعرف اكتبه
فأذا كان الموضوع زين فهو منه
واذا مهو زين فهو مني
وتقلدوا تحيتي
رد مع اقتباس
ايه اشوا على بالي نسيتنا >> غاويه شـــر 
..........
المفضلات