بسم الله الرحمن الرحيم
السلام عليكم
ذكر الشاعر منصور الرمالي الله يرحمه في قصيدة (( العصماء )) رداً على قصائد المطران الاول عبيد بن دعيج والثاني هايف بن نعيم . وذكر في قصيدته رداً على هايف معركة ام الجماجم لكم القصيده
الا يالذيخ وش خلاك تكذب..... وتحط نفسك بمقـام الكاذبينـا
تقول فى كير ذبحت الطنايا..... متى ذا صار ياابليـس اللعينـا
على كيفك تذبحنا بزيفك..... بزيـف وكـذب وأوهـام تغزينـا
ترى فى كير ماذبحت شمر..... خذيتـوا مثـل ماحنـا خذينـا
ولكن اذكرك باام الجماجـم..... بهـا زدنـا عليكـم واعتلينـا
هزمناكم بها اكبر هزيمه..... وتـرى ماسلمـوا الا الهاربينـا
بها صلنا وجلنا لين نلنـا..... ورجعتـوا خاسريـن ونادمينـا
تندمتوا على حـرب الطنايـا..... ورجعنـا للغنايـم كاسبينـا
طنايا نروى الظامى من الدم..... على راس المعادى له حنينـا
واذا يالهيس تجهل فعل شمر..... سل التاريخ يعطيـك اليقينـا
واذا انك ناسيله ماتذكـر..... تـرى التاريـخ يذكـر مانسينـا
سل الاجواد عن تاريخ شمر ..... كبار السـن والـى فاهمينـا
يعدون الصحيح ويقنعونك..... والى يخفـاك منهـم لـك يبينـا
هل الذمه هل التاريخ سلهم..... ولو هم من عربـك الا قربينـا
تركد وانشد العقيـل عنـا..... قبـل تظلـم وبالقيـل تهجينـا
تقول مطير صاروا عون شمر..... على الويلان معنـا قايمينـا
متى شمر طلبوا العون منكم..... كذبت ولالكـم فضـل علينـا
ولكن قول مع ابن سعود قمتو..... مع مبـارك وقفتـوا ولتقينـا
وعليكم بالصريف الرعب خيم..... ورجعتوا مع مبارك خاسرينا
اعنتوهم علينا وان هزمتو..... عوين خيـب ظـن المستعينـا
فلا نلتوا مديح وملا سلمتو..... مثل مـن عـاد يـم القريتينـا
وتقول الظيغمى شلتوا جواده..... وخت في ملك فتنـان سنتينـا
اقول انت تهبا كاذب وكاذب..... فلا شالوا عموم مطيـر شينـا
كذوب وبالخطا عمدٍ تعمـد..... لعنـك الله لعنـه كـل حينـا
تقول انه قليل اللى غلبكـم..... وتقـول بكـل وقعـه فايزينـا
ونسيت الغزوه الى كد غزاها..... حدا اللى بالحجاز مسيطرينا
ابن عون الشريف اسمه محمد..... غزاكم وين فعلـك مايبينـا
وذكركم عن ملاقاه انتحيتـو..... ولاتخفـا عليـك ولا علينـا
وشواهدها قصيده من غزاكم..... ونفس النص موجـود لدينـا
وغزانا والتقينا به بموقـع..... وحنـا الـى ثبتنـا ماانتحينـا
تقابلنا وصار الصبح ظلما..... يشيب من الفزع راس الجنينـا
صمدوا فريسنا تسعيـن ليلـه..... سناعيـس لضـده ماتلينـا
وجت زوبع وطير العز غنى..... اناشيـد النصـر للصامدينـا
بذاك اليوم سمينـا الطنايـا..... طنايـا مانهـاب ليـا طنينـا
طنايا مارضينا بالمهونـه..... ولانرضـى المهونـه ماحيينـا
طنايا الذل ماننزل جواره..... وعلى انفسنا المذلـه مارضينـا
طنايا وان نطحنا كل غازى..... تراعد خوف من يقبـل علينـا
طنايا من حربنا له ضربنا..... نصب الويل فوق اللـى يجينـا
طنايا نارد حيـاض المنايـا..... اسـود بالحـروب مجربينـا
طنايا عندنا تحل القضايـا..... احـرار بالعـلا لـى معتلينـا
طنايا نكرم العانى ونعطى..... وعطايانا الجزايل ليـا عطينـا
نقف هنا مع هذا البيت :
(( ولكن اذكرك باام الجماجـم..... بهـا زدنـا عليكـم واعتلينـا ))
اها
الله لا يهينكم يا شباب ابي من اللي يخبر هالسالفه ان يوردها لنا وشاكر لكم حسن تعاونكم
رد مع اقتباس
المفضلات