كلّ درب(ن) عليه من المخاليق ساري..!

[بـنـت النـور]

بسم الله الرحمن الرحيم



عودة جديده لـ قضايا ومواضيع اسريه ننقلها لكم مع بعض القصص والاراء

واتمنى تجاوبكم وطرح ارائكم حول الموضوع ...



يُقال :

كانت (...) بنوته حلوه ويميزها شعرها الطويل الاسود الكثييف



ومن دخلت المدرسه لفتت انتباه المعلمات بجمال شعرها
وكانوا دايما يمسكونها ويلعبون بشعرها ويسألونها وش تحط لك ماما؟
كلكم شعركم كذا؟ والا بس انتي؟
وبعد فتره من دخولها للمدرسه صارت البنت تعاني من صداع ألييييم مايفكها
وخذوها اهلها من مستشفى للثاني والكل اجمع انها سليمه عضوياً 100%شارت عليهم الجده انهم ياخذونها لشيخ يقرا عليها ان مافادها ماراح يضرها ان شالله
وبالفعل خذوها ومن اول ماقرا عليها قال ان بنتكم جايتها عين على شعرها
لازم تداوم على القرايه وتاخذ مويه وزيت مقري فيهم وتقص شعرها
وجبّوا شعر الضعيّفه
ونقلوها من المدرسه وحاولوا يجيبون شي من عقب المدرسات بس عجزوا! بعضهم رفض وبعضهم تهرب!!!




وصارت تقرا من فتره لفتره
وشعرها من يوم يتعدى كتفها يرجع لها الصداع القاااتل..
الان... عمرها 25 ومازالت تعاني وشعرها مستحيل يتعدى حدود الكتف!





***


حادثه صارت من كم سنه
كانت (.....)في عزيمه وحكوا عن وحده قالوا انها حامل (وهي أم لـ 4 اولاد)
قالت وحده (وكل خلفتها بنات) يعني وش بتجيب اكيد ولد زي اللي قبله
يومين بس سمعنا انها مجهضه .. عادي قضاء وقدر
حملت بعد كم شهر وماكملت الثالث الا واجضهت ومره بعد مره تكرر الاجهاض
تعبت نفسيا واثر عليها الاجهاض المتكرر وعلى صحتها
سبحان الله في كل المرات كان الطفل يموت وبدون سبب!وقامت وحده من اللي كانوا بالمجلس بذيك العزيمه وكلمتها وقالت لها اللي صار وقالت انا بتكفل بالموضوع
وبجيب لك شي عقبها .. والله والله والله ياعالم ان بعدها بس بكم شهر حملت وجابت بيبي مثل القمر ماشاءالله .




***


تكثر القصص والحوادث الحقيقيه
بعيدا عن الوساوس وحب لفت النظر!
*
*
بالاول كنت احس انها حركة قديمه وسوالف عجز وشيبان بعد هههه ..!
استسخف لما تجي بنت تقول شعري يطييح شكلها عين فلانه تقولي شعرك حلو
والا اللي يقولون دايم طفش شكل اللي فينا عين لاننا دايما مرحين ووسيعين صدر
والا جايتني نفس عن الطلعات<< بعذرك اذا كانت عبايتك ماتنزل عن راسك 24 ساعه بالسياره
والا جايتني نفس عن المطبخ << هذي العجازه اللي ماتبي تطبخ والا مسويه خطه عشان يجيب زوجها شغاله
والا اللي ماتنام ايام الاختباارت ولا تاكل واذا اغمى والا تعبت تقول انها عين وتروح امها وتاخذ
اقرب قارورة ماء والا جركل وتدور فيه على المدرسه كلها




سواء اللي عندها شي تخاف عليه او ماعندها شي ينخاف عليه
تحصن نفسها بالاوراد الصباحيه والمسائيه* وماعليها الا العافيه
ان شاء الله ..




صح ان الاكتئاب انتشر وهذا لاسباب من ضمنها الترف و ( فقر الدم)*
يعني مو ضروري انها عين \ نفس !!
والاكتئاب له اعراض ومضاعفات كثير منها ضيقة الصدر والبكاء الكثير والانطواء
والملل من كل شي!!
وفيه من يعاني من اكتئاب حاد جداً
والسبب الرئيسي بالاكتئاب هو فقر الدم!
إيـــه فقر الدم مو مصدقين؟؟!!
فقر الدم ياعالم أخطر من اللي نتصوره مو بس دوخه وشحوب!
الا اكتئاب وعصبيه شديده وخفقان بالقلب واضطرابات بالنوم وبالاكل!!
ناس تضيع بسببه .. والطب متقدم كثير فلا مجال له باذن الله علاج واهتمام ...
*
*
امممممممم
اللحين بدت تصير لي نظره ثانيه للموضوع
بغض النظر عن البنات اللي يتدلعون والا يحبون لفت النظر..! واللي كل شي ينسبونه للعين




الناس صارت عيونها فارغه.. وصار كلّن لاهي بالثاني !!
وين ووين نلاقي وحده تكثر من ذكر الله اذا شافت الشي!
بالرغم من ان الكل ماشاءالله عنده خير
لكن ليه يحلى اللي بيد الغير؟




حرمة كبيرة بالسن لكنها من النوع اللي كل شي تنتبه له
يووه بيتكم ريحته حلوه .. يوووه عيالكم هادين
يحليلكم شغلكم سنع




أكره النوعيه هذي اللي تدقق في كل شي !
وبصراحه تخوّف !
ومنتشره بشكل كبير !
يكون الواحد حذر معها ولايعلمها بـ شي اتقاءً لـ شرّها
ويقول بسم الله والله اكبر 3 مرات عليه وعلى بيته وعلى عياله


***




((..فيه اشياء تنقال واشياء ماتنقال..))




فيه ناس تتخذ لنفسها سياسة انها ماتعلم بـبعض احداث حياتهم المهمه \ البارزه الا بعدييين مثل:- الحمل, السفر , الخطوبه , الطلاق ..الخ




وفيه ناس تتخذ سياسة عكسيه وتبدا تسب الزوج/الزوجه \ الشغاله \ العيال \العمل
وهم مبسوطين كلهم جايين على الكيف!




السياسه الاولى انا معها وضدها بنفس الوقت
حلو ان الواحد مايستعجل ويتكلم بأشياء ممكن تصير وممكن لا !
والرسول صلى الله عليه وسلم يقول استعينوا على قضاء حوائجكم بالكتمان
ولكن فيه ناس تبالغ.. فجأه تكتشف ان بنتهم حامل بالشهر الثامن وهي من كم شهر تقول قولوني منتفخ
تشوفينهم في عزيمه وهم يتحلطمون والله ماعندنا نية سفر ولا عندنا فرصه نهائي وبكرى ينشافون بالمطار مرتزين!!





اما السياسه الثانيه فـ أنا ضدها ألف مرّه
هذا انكار لفضل الله .. وعدل شكر .. وظلم من جهه اخرى




صح أن كل واحد حر بحياته .. ولكن التصرفات هذي غبيه!!
لانها تلفت النظر لهم وفيه ناس فاضين و عندهم هواية تتبع الاخرين ..
وبيلقون هالنوعيه فريسه لذيذه يتتبعون اخبارهم ويتكلمون فيهم بكل مجلس!
اللحين فلانه اللي تقول زوجي ماعطيني ومايوديني هذاه مسفرها وشاري لها وجايب لها اجل لو هو طيب وش كان بيسوي لها؟؟




وش استفادت؟
الا ان العالم صارت تطالع فيها وبتحركاتها
كسبت سمعة انها كذابه
والاكبر من كذا كفّرت عشيرها وشوّهت سمعته
كل هذا عشان محد يحسدها!!




اذا انك خايفه لهدرجه على النعمه اللي ربي رازقك فيها اسكتي
ولا تتكلمين لا بالزين ولا بالشين << عصبت


***

العين \ النفس
وش الفرق بين هالكلمتين؟
العين غالبا تكون حسد ومن انسان عينه فارغه ..
ممكن يكون يكون قريب وممكن يكون بعيد.. ويُقال أن أهل الأرض لهم نصيب منها
هذي ممكن ينتج عنها مرض \ فشل .. الخ
والنفس ممكن تكون من انسان قريب ويحبك حتى ولكن نفسه بالشي اللي عندك..
وممكن من انسان بعيد وبرضو نفسه بالشي اللي عندك..
وهذي ينتج عنها كره للشي اللي معك!
مثلا وظيفه \ بيت \ زوج ..الخ(والمعلومات هذي موجوده كثير بالكتب والمواقع المتخصصه )





***




الحصن الشرعي



بعد صلاة الفجر والمغرب
تجمع اليدين وتقرأ (الكرسي+ اخر ايتين من البقره+ المعوذات 3 مرات والاخلاص 3 مرات)
بالاضافه الى بسم الله والله اكبر 3 مرات
بسم الله الذي لا يضر مع اسمه شي في الارض ولا في السماء 3 مرات
اعوذ بكلمات الله التامات من شر ما خلق 3 مرات
النفث ثم المسح على كل اجزاء الجسم




***
تقول امرأه زوجها شيخ ويقرا على الناس
ان اغلب اللي يراجعون عنده من النساء عندهم وساوس وامراض نفسيه
تتوهم أنها مسحوره والا منضوله محسوده وتتصرف على هالاساس وممكن تتشنج
وهي مافيها أي شي الا تعب نفسي !!




***
(قريب\بعيد)
اذا عندكم اطفال صغار انتبهوا لهم .. وعّوهم بـ ضرورة المحافظه عالاذكار وعودوهم..
انتبهوا لهم..الجيل هذا يكبر بسرعه والاهل لاهين عنهم
مايعرفون وش يتابعون ولا مين اصدقائهم ولا يعرفون وش يفكرون فيه
تقربوا منهم..حاولوا تدخلون عالمهم
وهالكلام اقوله لكم من بعد سالفة سمعتها تخوف كثير !!



تقول:
اختها بثاني متوسط وهم عائله محااافظه وملتزمه ماعندهم لا نت ولا دش ولامجلات!!
تقول اننا لاحظنا عليها تصرفات غريبه .. وانها ما تجلس معنا ولا تصلي
ومره راقبتها لقيتها تاخذ معها المصحف وتدخله بالحمام(وانتم بكرامه)
رحت ووقفت عند الباب وسمعتها تتكلم مع احد .. انصدممممت ماعرفت اتصرف
ابعدت شوي طلعت هي وراحت غرفتها ودخلت معها ولقيت المصحف زي ما هو عليه!
من هول الموقف ماعرفت اتكلم معها ولا اعلم اهلي !!
ومره سمعناها تصرررررررخ ورحنا لها ركض ولقيناها ماسكه المصحف وهي بالحمام
وتقطعه وتصرخ !! واخذناها وهديناها وقرينا عليها ويوم سألناها ليه سويتي كذا؟
قالت ابغى اصير ساحره !
مين علمك هالشغلات وكيف جا هالشي في بالك؟؟ رفضت تتكلم او تعلم !
والان يقرون عليها والله يهديها .





***




شاركوني ..

بـ آرائكم \ تجاربكم .. المجال مفتوح بدون تحديد اسئلة نقاش

[شموخ]

ياهلاا ببنت النور


العين وماادراك ماالعين والله زماااان ماكنت أفكر فيها مع انى كنت مؤمنه بحدوثها بس مثل ماتقولين ما كنت أخاف ( اعترفت البنت انها اللحين تخاف )


بس صادقت لي صديقه ووالله انى اعزها كثييييير بس كان عيبها انها تصك بعين وهى ماشاء الله عليها معترفه بذلك ولا عندها اي اشكال او احراج من ذلك حتى قالت والله لنا من الايام الأولى يابنات ترى عيني احيان تصيب بس ذكرونى والله العظيم كنت احسبها تمزح اللين حلفت لنا بعدها صدقناها وصارت لكل وحده منا نصيب من عين هند الله يذكرها بالخير كانت وحده من زميلاتنا قحطانيه دايم ماشاء الله عليها اي عمل على طول تنزل السوق وتجيب طلباته وتصلحه ( حنا قسم التربيه الفنيه عاد ماشاء الله لازم يوميا بالمكتبات والاسواق نبحث عن الخامات ) قالت زينه انتى دايم بالسوق ماتتعبين والله العظيم بعدها يمكن باسبوع طاحت القحطانيه بالسوق وانكسر قدمها والثانيه كانت ترسم عيونها وتصلح الظل سئلت عن ماركة الظل على طول طاح من يد البنت وانكسر ضحكنا كلنا زين انه بالظل ولا بعين البنت والثالثه سئلتها تستخدمين شي لرموشك لنها كثيفه بعدها بكم يوم بدات تتساقط رموش البنت آخر شي صفينا قدامها انا وزميلاتي وحلفنا عليها تقرأ علينا وتتف علينا مع اننا نضحك بس شفنا اشياء صارت / وصارت تشرط علينا بالقرايه وتضحك تقول كم تعطونى الله يذكرها بالخير رغم اننا عانينا الا انها كانت تونسنا بسوالفها ضحك ووناسه معها بس هذا عيبها


ومره من المرات وتعتبر اصعب اللحظات اللي مرت علي كانت جايه معي من الجامعه وحلفت عليها الا تغدا معي وبعدها أوصلها وسلمت على امى قالت هذه أمك كيف عاد بشبابها والله العظيم يابنت النور ماجاء الليل إلا مرضت فجأه امي حسبتها تموت تمنينت انها في ولا بأمي وعاد يوم درت أمى اليوم الثاني انها زميلتى النظول على قولتها قالت لي عساك ماتفيدين والله مافي لاجنى ولا صاحي ماهرجتي معه والله لين شفتك جايبتلي هالنظول مرة ثانيه ماتشوفين خير


فالعين سبحان الله حق بس احيان تصادفين ناس من ادنى شي يقولون عين من كثر الوساوس من غير مايثبت على الشخص اللي معتقدين انه عطاهم عين انه نظول مثل مايقولون ....


تحياتي لك
شموخ

[نـــوى]

لي عوووووووووده

[شام]

قضية متشعبة

وفيها العديد من الأراء

لي عودة ..

يعطيك العافية اختي بنت النور

[حزيمات تريترا]

اشكر دعوتك

الحمدلله على كل حال


ولقد ذكرتني بقريبه لي قبل بضعه سنين تساقط شعرها ولقد قصته وقراء عليها احد المشايخ

والحمد لله تعافت

ولا قد حدثت معي حادثه مع اخي الصغير سوف انقل المهم منه للفائده

قبل ثلاث سنوات حضر اخي زواج وكان لا بس بشت وكان عمره صغير وجسمه كبير بعض الشي وبعده بدا

يرجع يطرش وكان يخرج منه ماء ابيض ومن ثم صار يخرج دم واخذت حوالي السنه من مستشفى

لمستشفى وقد قررو عليه بقطع بعض الرائه لا ن بعضها تالف ولا كن بفضل الله اخذت ماء من غاسول الكاسات والفناجيل من احد الزواجات ومن ثم شرب منه اخي وتوضاء وبعد ها تعافى بفضل الله

[شام]

ترجع أي ظاهرة غير صحية إلى اسباب عديدة أهمها المرض

ومن ثم هناك بعض الظواهر المقترنة بالعين و الوسواس و غيرهما .

ولا أدري لماذا مسألة العين منتشرة فقط في المجتمعات العربية

ومع ذلك هناك بعض الاجراءات التي يمكننا استخدامها كقراءة القرآن الكريم كما ورد في موضوعك أختي

وهناك أدعية معينة كرقية جبريل عليه السلام للنبي صلى الله عليه وسلم والتي رواها مسلم وهي: "باسم الله أرقيك من كل شيء يؤذيك، من شر كل نفس أو عين حاسد الله يشفيك، باسم الله أرقيك".

ينبغي الاحتراز بستر المحاسن ممن يُخاف عليه العين، كما ذكر البغوي في شرح السنة أن عثمان رضي الله عنه رأى صبياً مليحاً فقال: "دسموا نونته لئلا تصيبه العين"..

الاكثار من قول "لا حول ولا قوة إلا بالله"، و"حسبي الله ونعم الوكيل".. الإلحاح على الله في الدعاء .

ويعطيك العافية أختي الكريمة بنت النور

بصراحة هذه معلوماتي حول هذه القضية ..

أتمنى من خلال المشاركات أن تتوسع معلوماتي

لكم متابعة

[المطنوخ]

لي عــودة مع ذكر احداث..!!

[سمانجد]

الله يكفينا الشر
والعين حق
بس الناس صايره مشفووحه
وقل ايمانها
ومايحلى لها الا اللي مع الناس
الله لا يشغلنا الا بطاعته
ولازم كلكم تحصنون انفسكم
وبنفس الوقت تذكرون الله على اي شي تشووفونه
ترا كلن ينظل ماعاد الام ماتنظل ولدها
:
:
مشكورة يابنت النور
على االموووضووع الجونااااااااان

[بنت الشمال]

فعلآ ظاهرة العين منتشره بشكل مو طبيعي <<كل يومين ثلاث نسمع ان فلان او فلانه صابتهم عين!

لاحول ولاقوة الا بالله

المشكله ان غالبية الشيوخ يقولون ان هالعين صايبتك من قريبه لك ... <<يعني لو اختك قالت ياحظك
نطي بين عيونها وخليها تقول مااااااشاءالله

مافيه الا كذا ..



::


موضوع هااااادف يابنت النور

ألف شكر يالغلا ولاتحرمينا المزيد من ابداعاتكـ


دمتي بود

[بـنـت النـور]

هلا بـ شموخ

يعطيكِ العافيه .. والحمدلله على سلامه الوالده من هالنظول

الحصن الشرعي خير علاج ...


دمتِ بنور