الا وش هالحر اللي تورشعنا !!
استدارت روسنا من هالمكيفات !
الا ياحبيبي ياشتياان .. الله يذكره بالخيرر
الواحد مايعرف الماء الا بالاسبوع مره
اما بالصيف تشرب ولاكأنك تشرب !
يمتلي بطنك وانت مارويت
اسوأ شي بهالدنيا ... ان الواحد يحس انه غبي !!
لاويمكن تجاوز مرحلة الغباء الى مرحلة الدلاخه ... مروراً بالفهاوه !!
تسيف ان الواحد يكره نفسه ..
وتعاف النوم عينوو بسبب موقف الله لايعيده !
نرجع لموضوع الحر
حر القصيم يالربع غير طبيعي ... !
وماهو بعيد عن جو حايل ..
وخصوصا من الساعه 8 الى 4 الا .... العصر !
والمشكله هذا وقت دوامي
اداوم والشمس بعيني ... واطلع والشمس بعيني
مابه طب
يقولون الغربه يهونه الخوي !
اقول مامن خوي !
طحت بلي حساوي ...ياعله ماعاده
لو انا سالمن منه ابرك لي
سير علي تميمي من اهل حايل شبه مستقر ببريده
وودك قدام اهل حايل تصير رسمي
لأنهم ينقدون على كل شي
المهم من جلس التميمي قمز ابو الشباب الحساوي يبي يصب قهوه
ياولد خله .. قال ليه يعني حنا مانعرف للقهوه يالشمري ؟
اقعد عند ضيفك بس .. وازهله
شوي الا وجايب الفنجال ينقله لحاله والدله على السخان !
قعد يصب عرقي ابرقع مادري وش اقول !
لا والمطمه مالي الفنجال لافمه !!
ياليل الليل !
فهمه التميمي انه حضري حيل ولاهو يمه ولا عطى الموقف وجه
المهم ..
التميمي جاي يعزم على زواج اخوه بالقصيم .. ولزم علي الا تجي وتجيب معك الحساوي
ابو الشباب ماكذب خبر !!
قال ابد جايينك
ومن باتسر رتسبنا نبي نروح للعرس ..
ابي اسلم عليهم وارضي خاطر رفيقي على عنوته .. ونمشي !
مريت الحساوي بشقته الا وهو متضبط ومتكشخ .. بس
فارع !
يعني ماعليه شماغ
قلت اكيد شماغه بالمغسله ناخذه على طريقنا ...
هاه يالحبيب وين الشماغ !؟
اي شماغ ؟
قلت ياحبك للمزح .. لاتقول انك تبي تروح كذا !
ههههههههه
ترا هذا ماهو وقت المزح !
قال امش امش تاخرنا على الرجال !
قلت والله ماطرت علي اروح وانت كذا..
رح هات اي شماغ
قال ماعندي الاغتره ولونه اصفر من شريته ماغسلته
قلت اقول بليا هالروحة كله !
قال تدري دامك ملزم
امش للسوق اخذ شماغ على الطريق ونطلع لهم !
قلت قداام ..
وبالسوق من محل لمحل ...
وهذا شماغ طويل وهذا خطوطه ماهي حلوه وهذا لونه باهت
انا ماني مخطط على شماغ بس لقيت واحد حلوو ورخيص وخذيته ...
وهو ماجاز له شي !
نزلت شماغي بالسياره .. ورجعت الا وهو طاقن له شماغ برتقالي !
قلت الله يهبل ...
لا لو انت ماخذ الشماغ الاخضر هذاك بعد اووف دلع !
الزبده ..
مشينا للسياره اللي موقفه غلط وبعيد ... من زحمة الشارع
وو
افاااا
ياولد ليش القزازه مكسوره
اوف شماغي اللي شريت ماهو به !
قلت خلن اتصل على الشرطه ... ضاقت بي
قزازه بــ اكثر من ميتين ريال تكسر علشان شماغ بـ 80 ريال !
اويلي جوالي وينهوو ...
ياولد !
اووووووه
تذكرت اني منزله على المركا اللي بالجيب
والله هي تضيق بي ..
وهو يضلم وجهي
وهي تضيع علومي
لاحوول الله ...
الجهاز الله لايرده !
لكن الارقام اللي بالشريحه ... !
انا لله ..
المشكله اني مخزن كل شي بجهازي
السجل الاكاديمي والخطه الجامعيه ..
وبلاوي بدونه ماني شي !
مع هذا قلت نبي نروح لعرساخوو الرجال ...الله لايعوق بشر
بس الله يستر كان ماقردناهم
جيناهم بعد العشا ...
جلسنا معه شوي ومكنا على العريس قبل زفته ..
شوي ويجيني رفيقي
ياولد عسى ماشر مانت على خبري !؟
وش بك .. تقل مغصوب على الجيه ...
مابغيت اضيق خلقه واوجع راسه بسالفتي ...
قلت ابد دوخه على شوي سخنه ... وماتخلى من رفعة الضغط !
والحساوي بجنبي يوزع ابتسامات هو وحلاياه ..
وياونتي ونة المسروق جوالــــه !!
كتبت قصيده رثاء بجوالي بس ماهي يمه
انا ماقاهرن الا اخذته لشماغي الله لايحله لادنيا ولا اخره !
الجوال يمكن يسوى الف وفوقه شوي بس شماغي وش يسوى
حسبي الله عليه ...
ملاحظه :: كل اللي مضافين بشريحتي الاوله اتخلف الله على ارقامهم ..
لذلك وبناء على ماسبق يجب ارسال رساله تعريفيه ... لشريحتي الجديده
هذا واسلمو وسلمو
رد مع اقتباس
المفضلات