سم العقارب لو اجرب اذوقه
ظني يتعكر من جروح(ن) عطايب
ليت الجروح الي احتوتني رفوقه
وليت السبب معروف وتبطل عجايب
طعنة زماني .. لو بغيري تعوقه
ان كان ماهلّوا عليه الترايب
اضحك لمن حولي وأخَفـّـي حروقه
قلب(ن) تكوى من المصايب لهايب
نفسي كذا .. للطيب ياهي شفوقه
ورث(ن) من اللي سيرته طيب غايب
خامست حظ(ن) لكن ابطى شروقه
وفي قومته .. لابد يجني نشايب
الشعر جيته مابي احفظ حقوقه
همي الاقي من يلبي النحايب
لو هو عصاني غصب عنه اسوقه
حتى الدفاتر تنفتح لي زهايب
دامي احس الدم يجري بعروقه
انا وقصيدي كل يوم(ن) طلايب
الحزن وثّق في فؤادي وثوقه
حتى لمحت الروح بارض النصايب
ليلي سهرته مع نجوم(ن) تفوقه
فوق السحاب مودع(ن) للمصايب
شارد بفكر(ن) خوفي اني اعوقه
ودي مع الأحلام أبقى هبايب
مادام قلبي للفرح .. باح شوقه
يالله ولو اوهام .. ياحلم خايب
راحت حياتي بالتمني شفوقه
تنبض ولكن ..! انتهت دون صايب
ياحروف اسمي شفتي انك عقوقه
حتى المعاني تنزف الدم ذايب..!!
سلطان خالد الشمري
منتديات مضايف شمر
رد مع اقتباس
المفضلات