بعد سهر ليلة متعبة لي بمكان ما لدرجة اني قمت من النوم ووجهي صاير تقل يد نجر من كثر ماهو مخشب
قعدت على صوت الصوت اللي كأنه طيحة صحون بغرفتي واطالع وبالموت اشوف اللي قدامي
يوم اطالع ولا بسه داخله الغرفه وعابثه بالدعوى وهب تركض بالغرفه قربت صوبي
وبحركه لا اراديه وانا اوزن لحنوكه والكزه لياهي منصفره ومنبعج افمه وانا امسكه وحذف مع الدريشه لابوه لابو اللي علموه الهياته
الوكاد يوم قطيته من الدريشه والتفت ابي اصك الدريشه واكمل سهرتي بالنوم الا واسمع صوت الحرمه البعيد اللي جاي من برى الدريشه يقول..(اشوف يومك أورايٍب ياسي مطنوخ..جايلك الموت يا ام عوين) واسمع وراها رجال يرددون ((حسره عليه ياحسره عليه ..حسره عليه حسره ياحسره عليه))...!!
وانا فاتح افمي متهول ومستغرب وش هالصباح الاقشر..
تعوذت من الشيطان وصكيت الدريشه وارجع للفراش وخذ يانوم....
قعدت من النوم وانا شبعان وعيوني تقل رمان ناقزات برى من كثر ماهن شبعانات نوم واقوم ابي انزل من السرير جيت ابي احط رجولي على الارض الا واطيح كلي واوقف على يديني ورجولي ..!!
وش العلم ياخو طنخه؟انا وش جانن؟
واطالع الا والغرفه تقل كبرت علي حيييييييييييييل واشوف المروحه ياهي صايرتن تقل بتسبد السما من البعد..
ومن الخرعه رحت ابي انحاش من هالغرفه المنحوسه وانا اركض لاحظت اني قريب من الارض حيل لدرجة ان صدري قام يشطف الارض..!!
انصدمت من الوضع الغريب والغثيث اللي على هالصبح واركض على طول للمرآه اللي بالممر ياوالله بعيييييييده صايره وانا امس كود ادنق علشان امشط شعري
وبحركه لا اراديه ولا شعوريه وانا اقمز هكالقمزه اللي بس ودكم اعرضها لكم بالبطئ
الا انا فوق المرآة .. وبخوف ورعب وانا اقرب وجهي للمرآة وبقلبي اقول الله يستر لايكون سحرتن حدى هالمزين يوم انها امس تحرش فيني وانا اقول اذا تبيني تعالي اخطبيني
اشوف نفسي .!!!!!!!!!!
وشو هذا..!!!!!!!!
اشهد اني جبت العييييييييييييد...!!!!!!
وش هالشنب؟؟؟؟؟؟
وش هالخشم اللي مايدخل بوه حتى عود التسبريت...!!؟؟
وش هالعيون اللي مانا زينهن
ليه وجهي قلب لوجه بس؟؟؟؟؟؟
يوووو
وش هذا بعد ؟؟
وش هالذيل اللي يتلولس ورى؟؟؟؟؟
انا قلبت بس ياناااااااس....!!
انا قلبت بس ياناااااا.......وما امداني اكمل الجمله الا والزبيريه اللي صافقتن بالعلبا وملزقه وجهي بالجام الا واسمع صوت ابوي ..((العن الله ابوك يالتسلب..!<--هو بس وشلون يصير تسلب هذا وش مدخلوه ملعون الصلايب
وكاد مابوه الا امهم اللي مشرعتن باب المطبخ ومخليتن الدجاج اللي مودنتوه سبيل للبساسه ..عاد قولوا جب لنا ماتسله<---كل هالكلام وهو ماحوله احد
يا يبا انا طنيخ ..يبا انا ولد مطنوخ الغالي ..((الا وابوي يقول وش هالبس المختل عقليا اللي واقفن قدامي ..العن الله ابوشواربك ..)) وهو يمسك زبيريته الثانيه وانا احط رجلي بسرعه خياليه تمنيتها في صباي
واقوم ازرق من بين فتحات الدرج ومن مواصير المطبخ واماكن بحياتي مادريت انها موجوده اصلا
وانا انحاش من البيت عقب ما دريت ان ساعه زياده بالبيت تعني ....بس فاطس..
واقوم اتمشى بالشارع وانا مستغرب من شعر جسمي ولونه الابيض اللي يهول من زينه وناعم وشكلي الا وشنبي اهزه يمين ويساار واطالع لخلق الله ...يااادااافع البلا ياطول هالبشر اثري البس يشوفن هاللون..
وانا اعبر الشارع وواثق اني لما امشي اي سياره راح تخفف الا وهذيك السياره اللي دايس طبلونه مادرى والله عني يوم مصقت العافيه واحط رجلي ويالله يسلم ذيلي..
ياوالله البلشه وش الدعوى ومنهو اللي عمل بي هاللون وليه وانا وش سويت...؟
واثناء تفكيري..الا واسمع صوت بوسات من بعيد وانا اطالع لمصدر الصوت الا والقى حدر سياره قرمبع هكالعتوي الاساااود اللي بس راسه تقل مركا لا ومن زين الحلايا اشرم وخشمه متصاوغن يسار اكتنه داعمن جدار ومنكسر !!
الاويقول لي ..(وش هالزين كله وش هالبياض يالبى والله اهلتس ..))وانا اتنحنح واقول يالاخو تراك غلطان ترانا كلنا اخوان بالاسلام<--يقال الحين فاره بالاسلوب
قال وش اسلامه اقول بلاهرج واجد امشي تعالي انا ماعندي خرابيط انا على طول زواج ((يسوي حركة خاتم الخطوبه على صبعه))
هنيه انا قمطت العافيه وحسيت ان الوضع متكهرب وممكن اني ينتهي مستقبلي عند هاللحظه هذي..
قلت مابدهاش ..
واحط رجلي وحما حيلي ((ويحلفون اني قمت افرك بمكاني الين طلع شرار من زود الفركه)) .. الا واسمع صوت ملعون الابو العتوي من بعيد يقول..((مصير القلوب بتتلاقى)) لابوك لابو حب تعرفه ياوجه الفاطر يالعتوي المختل..
واكمل مسيرة الشقاء وانا تايه ولا ادري وين اروح ..قلت عاد انا وين انا رايح يوم اني ابعد عن البيت ...خلني قريب له ابرك لي وأأمن
واروح للبيت واقعد امشي على السور واطالع الا وريحة تصرع الطير جايتن من حدر السور وانا انزل بكل رشاقه تخبرون بس واطالع الا وقبر بس صغير وانا افتش راسه الا والقى البس اللي انا صفقته برجلي وصكه ارتجاج بالمخ ...اثريه مات هالغبي وانا احسب البساسه ماتموت الا بالدعم من السيارات..!!<--مخه صار صغير يعني لاتشرهون
وانا اتذكر المره اللي قالت جايلك الموت واتذكر حسره عليها وتقعد ذاكرتي ترجعني لوراء ....تندمت وجلست على جنبي تخبرون ما اقدر اقعد مثل البشر
وقعدت ابتسي وابتسي وابتسي
خلاص يعني راح تنتهي حياتي على هالمنوال هذا والشكل هذا؟
ويجيني الصوت من وراي ..(صوت عجوز واقرب مالها صوت الساحرات العجز اللي بالافلام) قالت ان كنت متندم ياوليدي ومستعد تقدم لي خدمه وتصبر عليها لمدة
3 سنوات راح افك سحرك واخليك ترجع لهلك وتسترجع حياتك...((بدون تردد وقبل ماتنهي كلامها)) قلت مواااااااااافق ياخاله بس يرحم والديتس فكيني من هالمصيبه وانا مستعد باللي تبينه ...وولدتس انا فعلا اعترف انها لحظة طيش واستاهل العقاب لكن مو بهالطريقه القاسيه هذي ..قالت اقول الفقها ذابحن ولدي وتبينن ارحمك..قلت طيب عندي سؤال..
قالت وشو
قلت انتي ذاك اليوم اللي قلتي قايلك الموت ..صح؟
قالت ايه
قلت طيب منو اللي كانوا يقولون وراتس حسره عليها ياحسره عليها
قالت هذولا فرقة مصريه جابتهم جارتي صبحيه فاخر بعرس ولده وانا استاجرتهم علشان هكاللحظه
قلت اها ...طيب طيب وش اللي تامرين فيه ياخاله
قالت لك خيار من اثنين...
قلت عسى الله يقدرني
قالت..يا انك تكون مرضعه مستأجره وترضع كل بساسه الحاره المحرومين او ولدي تتزوج ولدي..!!
فتحت افمي وقلت هاااااااااااه..؟
قالت ماهواه ...وجعه احمد ربك اللي ماكريتك وذتسيتك بالسكين يادزليل الحيا
قلت ياخاله طولي بالك شوي ...ياخاله انا ذكر ذكررررررررررر تعرفين وشو يعني ذكر
قالت بسيطه ... هذا اللي مشغلك؟
.....................عتوي...شيرازي ..سيامي ....تعالوا وانا امكم
ويجون هالثلاث مصاكات اللي الواحد زنده تقل طعس وعليهم عضلات بطن مقسمه يعني بقس واحد والقبر على طوووووول
قلت ياخاله ياخاله الله يهداتس انتي ماسمعتي بشي ينقاله تفاهم ومفاوضات
قالت تبي ولا .....لا؟
قلت طيب طيب موافق
قالت على وشو
قلت بيني وبين نفسي ...وليييييييييييييييه وش هالورطه وش أختار خيارين اطيبهن كارثه ..لكن ان اخترت الرضاعه راح ابلش من الحين يعني مافيها مجال للنحشه
وان وافقت على العرس فيها مجال اني افكر بطريقه للنحشه
قلت موافق على العرس ياخاله ((قلتها وانا منزل راسي))
الاواسمع لولشه من هالعجيز يهييييييييييييب ياوجه الشوم
قالت يالله يابنيتي امشي ((من الحين الربع يبون يتعودون))
قلت وين ياخاله ...قالت ابي اوريتس ولدي زين الشباب واطخم الحاره واللي تذابحه عليه البسات
قلت يعني وش ابشوف بس على وجه توم كروز ولا براد بيت
قالت العجوز وش تقولين انتي وبربرتس
قلت ماقول شين بس يالله خلصيني
.............!!!!!!!..............
هذا ولدتس...........!!!!!!!!!!
اي هذا ولدي ليه فيه معرفه سابقه؟انا والله داريه انه ابن الحلال فتنه..!!!!
((الا البس الاشرم اللي تحقط لي صاحب جملة --مصير القلوب بتتلاقى--))
هنيه انا ماقدرت اتحمل وانا افرك له وانحاش وهم يلحقوني كلهم واسمع العجوز تقول ابيه جثه ابيه جثه..
وانا اركض اركض الين اهلكني التعب والخوف وطحت على وجهي الا وكلهم طاحوا على راسي
وانا افز من نومي اثريني طحت على وجهي من السرير..!
واطالع الا والبس فوق مكتبة غرفتي ..وانا اركض منحاش واخليه بالغرفه ....
مايستفاد مما سبق:
لاتضربون البساسه خصوصا السودا ترو اكثرها جن
لاتخلون باب المطبخ مفتوح اذا كنتم مودنين دجاج للغدا
اذا جاك بس بالغرفه بالليل لا تحرك الا اذا طلع الصبح لان لو قمت بالليل ودست على ذيله ماهي طيبه لك
واسمحوا لنا على القصور
جوااز طنخان من العتوي باااطل
انتظر القصص الباقيه
المفضلات