الشاعر { فهد الفويه}

[شعاع]

تردد اسم الشاعر {فهد الفويه} كثيرا باذني عندنا كنت صغيرة
كان جدي رحمة الله يحب هذا الشاعر ويلقبة بشاعر ابن رشيد

بحثت كثيرا عن شي مكتوب لهذا الشاعر ولم اجد

ولعلي اجد ضالتي هنا

واتقدم بطلب خاص لأخي ابو سلطان بالمساعده
ولا تهونون انتم يانشاما

اختكم المحبة
شعاع

[هايس الشمري]

هلا شعاع


هذا موضوع للاخ خالد


http://shmmr.net/vb/showthread.php?t=29627





وهذه المساجلة القديمة جدا بين الشاعر الفارس راكان بن حثلين مع الشاعر فهد الفويه من أهل حائل عندما قال: راكان:

عزي لقلب كاثرات شطونه
لو قلت زلت عبرة جا بدلها
واخلي اللي في محاجر عيونه
خيل مشاويل تطارد بهلها
ياهل مراديم النضا اللي تجونه
ردو السلام انا فدا من نقلها



ثم عارضه فهد الفويه بهذه الأبيات:







أقول بيت ما حلا من فنونه
آخذ جدايدها واخلي سملها
قلبي على خلي تصافق ركونه
دليت اجيب القاف من محتملها
وبالكبد نار كنهم يشعلونه
حرق صناديق الضماير شعلها
على حبيب يوم قفت ضعونه
مرت على وصوبتني قبلها
علي دين ما ظهر مثل لونه
عندي فلا والله يخلق مثلها
كود القمر ولاظهر من مزونه
يوضي على سكن الجبل مع سهلها
حسن التهايا كالقحاوي سنونه
بين الشفايف تقل يمرس عسلها
والخشم حد مصقل يشذرونه
والملح والقبله مفارق جذلها
والبطن كالديباج لو يلمسونه
جديد ما عمر المسوى عملها
أتلى العلم به والخدم يتبعونه
اقفت تعد خطاه تمشي مهلها

[خالد الشمري]

قال الشاعر فهد الفويه :
[poem=font="Simplified Arabic,4,orange,normal,normal" bkcolor="royalblue" bkimage="" border="none,4,gray" type=1 line=0 align=center use=ex num="0,black"]
وونّتي وما بكبدي من البين = ضاقت علي دنياي بالحيل ضاقه
مار ابتحل ياخوي باللي يعزين= قلبي معه ياخو لطيفه (1) وساقه
وجدي عليها وجد من له بعارين= ومحسوبته ميّه وتسعين ناقه
جوه الغزيل واقرشوبه مقفّين = ومن عقبها شوف البياضة شفاقه
او وجد من حالو عليها المثارين= بغى ينوض وعاثره عظم ساقه
او وجد من له غرسة بين فاجين = ليله نهار مايبطّل سياقه
وقع قليبه ورى شن البساتين = وباقت نخيله عند حزّة شقاقه
نمر(2) خذى من جمله البيض تسعين= كلّه يدور صويحبه باللباقه
ومحسن(3) فدى بالزين كل الهزازين = ولو يشوف صويحبي كيف حاله
زين ٍ بضنا زين وهو منقع الزين = والزين تجذب غيّته من عماقه [/poem]
.............
1 ـ ناصر الحيدري
2 ـ شيخ البلقا من بني صخر نمر بن عدوان
3 ـ شاعر الغزل محسن الهزاني




قصيده الشاعر الكبير فهد الفويه في وقعة الصريف عام 1318 للهجره :
[poem=font="Simplified Arabic,5,orange,bold,normal" bkcolor="transparent" bkimage="" border="none,medium,gray" type=1 line=0 align=center use=ex num="0,black"]
هنيت منهو داله مثل صنقور=ماهمه الدمام واللي سعى به
ولاهمه اللي حطو العصر بقبور=ولابكى بيض تلاعج عذابه
ياعل حالك يابو جابر بحادور=وياعل دارك مايخضر جنابه
اللي تعادي حاكم البر وقصور=حرٍ إلى شاف الحباري عثى به
بالمجمعة عجزوا يشيلون لقبور=وصاروا رجوم مثل نايف هضابه
في غابة يشبع به الذيب ونسور=والضبعة العرجا ملت كل غابه[/poem]





كان الامير عبدالعزيز بن متعب الرشيد (رحمه الله)غّزاي ومعه فهد الفويه وارسل سراي بن زويمل (ابو فهد) مندوب عنه لحائل لاجل ترتيب للديره واشغال خاصه بامور الحكم ويوم راح ورجع لمخيم الامير عبدالعزيز قابله فهد الفويه وقال له شلون حائل واهله رد عليه سراي (وهو يعرف ان فهد رجال هواوي وبغى يهيضه) قال يافهد الحريم ماعندهن احد وجالسات بالسوق دلّعن فرّع (طبعا عن طريق المزح بينهم ) وكان الوقت ايام عيد قال فهد الفويه :
[poem=font="Simplified Arabic,5,orange,bold,normal" bkcolor="transparent" bkimage="" border="none,medium,gray" type=1 line=0 align=center use=ex num="0,black"]
سرّاي جاني وخبّرن بالثباتي=وهيّض علي جروحي المستكنّه
قال المزيّن حرمّن العباتي=وعيّن نهار العيد لايلبسنّه
كن قلتله ياحامي الوانياتي=لاجدّعو عن روسهنّ الأعنّه
إيت البلاد ورد لازم وصاتي=وهرجي الى جيت الغضي لاتكنّه
اخبرك بوصوفها البيناتي=قصايرك يالقرم مايبخصنّه
ترها طويلة عنق مثل المهاتي=واثر العريب اللي طويل ٍ معنّه
لاجت تخطّى (والبِني ) مقبلاتي=لاكنّهن مثل الخدم يتبعنّه
هنيّهن هنيّهن مسعداتي =مااكبر بختهن كانهن عايدنّه
شربن ثمان ذبل ٍ مرهفاتي=كن العسل ينقاد من بينهنّه[/poem]




من قصائد الشاعر / فهد الفويه العبدي الشمري(عرضة)
راكب فوق حمرا تهذل اهذالي ...
حرة(ن) تقطع الديان مامونه

فوقها واحد(ن) ماهو بذلالي ...
دون صبيان حايل لاتعوقونه

لاركب شيخهم من فوق مشوالي ...
حلو نقل الموازر يوم يتلونه

يوم ثار الدخن والعج ينجالي ...
والفشق مثل مزن هلت ركونه

جوك شمر هل الردات صوالي ...
ويل منهو بوجه الربع ياطونه

اهل مغيضة يمين وجوك صوالي ...
من نوىحرب اخو نوره يحربونه

واهل لبده يسار وجمعهم عالي ...
عادة راس شيخ القوم يهفونه

وآل الاسود مدرب كل ذلالي ...
ينثرون الحمر ماعاد يرعونه

كتبوا بالبيارق كل جهالي ...
شيب عين الذي غلبا يلاقونه

دارنا دارنا حنا لك عيالي ...
من بغى دارنا بالسيف يهفونه

دون حايل نسوق العمر والمالي ...
ولجل حايل نشيل الراس ومتونه






هذه القصيده فيه ناس ينسبونه الى العوني لكن الصحيح والله اعلم واجل واكرم انه للفويه ويقول الشاعر الكبير فهد الفويه العبدي الشمري بعد المعركه الصريف هالقصيده :
راكبٍ فوق حمراء بنت قطعيّه.........كنه الطاير اللي عقب ماجاعي
كنه الطاير الهايف من الطيّه............لاتطايف عشاه وجاك مرياعي
من بنات الجمل وأمّه شراريه........غرسن طوعٍ وهن بالراس مطواعي
سرو تلفي لأهل حايل عموميه......لابتي في نهار الكون قطاعي
يوم نار الوغى باليل مضويه.......والمشبّب لغالي العمر بياعي
ويل من داسته شمر برجليه......واستدارت عليه بقاسي القاعي
عادةٍ شمر تظهر وساطيه.........ماتدّور نهار الكون الأطماعي
صاح عبدالعزيز بتالي الهيه......مثل حرٍ شهر للصيد فداعي
يوم ركب الجواد وصاح واوبه......اودع القوم طليلنٍ بلا راعي
يوم كون الصريف وصارت الهيه....ذبحة الشيخ كنه ذبحة الراعي


يقول الشاعر الداهية محمد العبدالله العوني:
أتديبج وأنـا مانـي بدبوجـة
واسفه العلم كني ما أتمعنى به
والمثايل بصدري تقل منسوجة
وأفتح الراي لامنه غلق بابـه



ورد عليه الشاعر فهد الفويه:
يا محمد تـرى منتـه بدبوجـة
كل قلب تعرف أسناع دولابـه
البلا بي غديت اليوم بي روجـة
أجنبي ولا بالبيـت لـي لابـه
حجة الجاريا مشكـاي مفلوجـة
عطني الراي لا تقصر عني ثابه