* قصة رووووعة رووووعة رووووعة جداً *

[النابغة الطائي]

- الفصل الأول -

-----
رساله ضائعه في الصحراء..

الزمان: أثناء حرب الخليج يوم الثامن والعشرين من يناير من عام ألف وتسعمائة وواحد وتسعون.

المكان: إحدى الكتائب العسكرية السعودية في الحدود الشمالية للمملكة

الساعة: الخامسة فجرا

______________________________________

أعلن في الكتيبة أمر التعبئة السريعة لتغيير المكان وهو إجرء روتيني يتم فعله كل بضعة أيام, وأحيانا يكون إجراء تكتيكي لأسباب عسكرية بحتة.

استيقظ الرقيب خالد على صياح بعض زملائه وهم يفككون شراع الخيمة من فوقه, فعرف أنهم مغادرون..

وكان خالد طويل القامة,ويميل إلى البياض, تقاسيم وجهه متناسقة,ويدل على الطيبة..

قام ورتب أغراضه بسرعة, وجرى إلى ساحة العلم حيث كان يؤخذ التمام(إجراء العد), وبينما هو يجري سقطت منه رسالة, ولم يلاحظ سقوطها..

الساعة: السابعة مساءً

بينما كان الرقيب خالد يرتب أغراضه في الموقع الجديد, تذكر الرسالة, فأراد أن طمئن لوجودها, تحسس جيوب بدلته, وصعق حين لم يحس بوجودها, وبحركة سريعة لا ينافسها في السرعة إلا نبضات قلبه ادخل يديه في كل جيوب البدلة, ولكن محاولاته للبحث عن الرسالة بائت بالفشل!!

خرج خالد مسرعا من الخيمة ذهب إلى كل مكان وطئته رجليه في الموقع الجديد بحثا عن تلك الرسالة, ولكن أيضا لم يجد شيئا, فأيقن انه فقد الرسالة في الموقع القديم, فذهب مسرعا إلى خيمة أخرى مخصصه لنوم الجنود, وكانت تعج بالجنود والصياح, فدار بعينيه المكان, حتى وقع نظره على العريف أحمد, فذهب إليه وربت على كتفه طالبا منه اللحاق به إلى ارج الخيمة..ففعل.

كان أحمد أعز أصدقاء خالد, وعلى الرغم من أحمد ليس لديه الكثير من الأصدقاء, لخشونة طبعه, إلا أن خالد يعرف الإنسان الذي خلف هذا الجسد, ويحبه, وكان أحمد اقصر من خالد, وأصغر منه, ولكن الذقن الذي يتزين به, تزيده عمرا..

أحمد: هلا ابو خلود.

خالد: هلا احمد, ابيك بخدمه.

أحمد: آمر؟؟

خالد: ما يآمر عليك عدو, بس فيه غرض نسيته في محلنا القديم, وابيك تساعدني نروح نجيبه.

أحمد: انت انهبلت؟؟, دام ان انك نسيته, ان رأيي انك تنساه على طول.

خالد: تكفى وال يرحم والديك, انا مالظاهر يبي يجيني نوم ولا راح ارتاح الين القاه.

أحمد: والله ودي اساعدك, بس ياخوي حنا بحالة حرب, وانت عارف وشي عقوبة الخروج من المعسكر, وبعدين وعلى ايش تبينا نروح؟؟, ولا انت ولا أنا نعرف وين كنا فيه, ولا وين حنا فيه الحين؟؟.. وبعدين وشو هالشي الي ما تقدر تعيش بدونه؟؟

خالد وعلى وجهه أثار الأسى: ضيعت رسالة ميسون.

تغير وجه أحمد, فقد كان يعرف قيمة هذه الرساله عند خالد.

أحمد: طيب وشلون تبينا نروح ندور عليها؟؟

خالد: أخوك محمد.

أحمد: محمد؟؟.. أنت أثر واحد عارف اني ما كلمت محمد من يوم وفاة الوالد, وانت عارف نوعية العلاقه بيني وبينه!!!

خالد: انا عارف, بس محمد هو الوحيد الي نعرفه في الفصيل الأول, وهو الي يعرف موقعنا القديم, وموقعنا الجديد, وبعدين لو المسأله ميب خطيره, ما كان طلبت منك هالطلب, ولا حطيتك بهالموقف.

أحمد: طيب... بس... كيف تبينا نروح هناك؟؟

خالد: ابروح اكلم يوسف في التموين, وابشوف اذا كان ممكن يدبر لنا سياره. وانت رح جب محمد.

أحمد: طيب وين القاك؟

خالد: تبي تلقاني عند خيمة التموين.

وراح كل في طيقه..

وصل أحمد لم خيمة الفصيل الأول, وأول ما دخل الخيمه, وقع نظره على محمد, فأشار له بأن يخرج الى خارج الخيمه.

كان محمد أصغر من أخيه أحمد, ولكنه قريب من ملامحه كثيرا, ويهتم كثيرا بهندامه, فالذي يراه لا يعتقد أنه جندي في حالة حرب, ولكنه محبوب من الجميع.... الا أخيه..

محمد(وهو يحاول أن يخفي علامات الإستغراب عن محياه): هلا أحمد.. كيف الحال؟

أحمد: شف.. لو ان المسأله لي كان ما جيتك, ولكن خالد في مشكله, ويبي مساعدتك.

محمد: طيب رد السلام.

أحمد: هذا الي عندي.. وش قل؟؟

محمد(بعد أن ارتفعت نبرة صوته): الى متى تبي تصير حاقد علي؟؟.. ابوك الي مات هو ابوي بعد..الى متى تبي تعاملني كني أنا الي ذبحته؟؟

أحمد: ممتاز أنك تذكرت أنه أبوك, لأنك ما كنت تتصرف على هالأساس!!

محمد(خفت صوته حتى صار اشبه الى الهمس): ياخي ما يكفي العذاب الي انا فيه؟؟.. يعني تتوقع اني ما أعرف غلطتي؟؟, يعني تتوقع أني ذقت لذيذ النوم من ذاك اليوم؟.. يا شيخ صعودي على ذيك الرحله قبل وفاة الوالد كان أكبر خطأ سويته في حياتي, ومنيب محتاجك علشان تذكرني.

أحمد(بصوت رقيق): طيب الحين تبي ساعدنا ولا لا؟؟

محمد: وشي المشكله؟؟

أحمد: تعال وأنت تعرف.

وراحوا متجهين لم خيمة التموين..

وفي هذه الأثناء..وعند خيمة التموين..

خالد: تكفى.. الشي الي فقدته شي عزيز علي مره.

يوسف: والله ودي اساعدك, بس ما عندي ولا سياره جاهزه, انت عارف اننا تونا منتقلين, وتجهيز السيارات يصير باليوم الثاني.. بس..

كان يوسف مثال الشخص الذي يعلم كل شئ عن أي شي في محيطه, اما بالنسبه لشكله, فهو يعطيك الأنطباع بالقوه, فهو ضخم الجثه, ولكن بشكل متناسق, ويعرفه كل من في الكتيبه. \n
خالد: بس ايش؟؟.. تكفى..

يوسف: تعرف عبدالمحسن من مكتب رئيس الكتيبه؟؟

خالد: ايه عرفته.. الولد الصغير..اظنه توه داخل الجيش قبل شهر.

يوسف: ايه هذا هو.. هذا يا طويل العمر معه سيارة الميجور الأمريكي, علشان ينظفها ويعبيها ديزل.. وهو دايم يجي يتلزق فيني انا والشباب, بس حنا ما نعطيه وجه علشانه صغير.. أظنه ما كمل 16 سنه... وانا ممكن اكلمه يعطينا السياره الليله..

خالد: تكفى.. ما فيه الا هالحل.

وفي هذا الوقت جا أحمد ومحمد, وانضموا لخالد ويوسف.. وشرحوا القصه للجميع..بدون ا يبينوا ماهية الشي المفقود..وذهبوا جميعا الى مخيم رئيس الكتيبه, بحثا عن عبدالمحسن..

وصلوا الى المخيم, وأشار يوسف الى السياره, فذهبوا جميعا اليها.. وكانت سياره من الدفع الرباعي, ومن انتاج السنه ..

وجدوا عبدالمحسن نائما داخل السياره..

وكان عبدالمحسن ضئيل البنيه, أبيض الوجه, حتى أن شاربه لا يكاد يبان, ولكنه دائما يحاول أن يتصرف مثل باقي الجنود, ويخفي خوفه من الجميع..

فتح يوسف الباب وأستيقظ عبدالمحسن بسرعه ورفع مسدسه على يوسف..

يوسف: هدئ اعصابك.. هذا انا يوسف من التموينومعي بعض الزملاء.

عبدالمحسن بعد ان انزل المسدس: انا آسف, منيب متعود أنام في السياره.

يوسف : ميب مشكله.. نبيك بخدمه..

عبدالمحسن(بعد ان ارتسمت ابتسامه على محياه): خدمه؟؟.. آمر وش دعوى.. وش ممكن اخدمكم فيه.

يوسف: نبي الموتر.

عبدالمحسن: هااااه... الموتر.. ما اقدر اعطيك اياه.. هذا عهده علي من الميجور.. ممكن يفصلوني اذا ضيعت المفتاح.. عاد كيف الموتر بكبره؟؟..

يوسف: حنا ما راح نسرقه.. حنا نبيه بس ساعتين, ونرجعه على طول..

عبدالمحسن بعد تفكير.. والحاح من يوسف طيب بس اجي معكم.

يوسف القى نظره على خالد, فأوما خالد برأسه بالموافقه..

يوسف: ميب مشكله.

ركبوا جميعا السياره متوجهين الى الموقع القديم, دليلهم محمد, ويقودهم عبدالمحسن..

مرت ساعه, قبل أن يصلوا الى المكان المطلوب..

يوسف: طيب وش انت فاقد؟؟ علشان ندور معك؟؟

خالد(بعد تردد): رساله من شخص عزيز.

يوسف: ايش؟؟.. جايبنا هنا.. وتحط مستقبلنا في خطر علشان قطعة ورق؟؟.. انت انهبلت؟؟

محمد(عاتبا): ما هقيتها منك يا خالد!!!

خالد: أنا اسف يا شباب, هاذي رساه كتبتها لي زوجتي قبل ما اجي هنا, وانا كتبت عليها في الجهه الثانيه رساله لها في حالة صابني شي لا سمح الله, والرساله غاليه علي بالحيل, ولا ما كان حطيتكم بهالموقف.

عبدالمحسن: طيب يالله بسرعه خلونا ندورها علشان نرجع, انا قلبي بدا يعورني.

وبدأوا بالبحث على انوار السياره.. وبعد مده ليست بالقصيره, صرخ أحمد: أظني لقيت شي؟

وذهبوا جميعا الى حيث اشار أحمد, فنظر خالد, ثم سقط على ركبتيه وحمل الرساله, وشمها.. وانفرجت اساريره.. وضم الرساله الى قلبه.

وقال: هذا عبير الغاليه ميسون.

-
يتبع غداً ..

[فلاح السعد]

السلام:

ياشيخ عيوني راحت فيهاواخرتهايتبع غدا

بس تستاهل

لك الشكر

ونحن بالانتظار

[الفيتو]

اخوي الرائع النابغة الطائي
قبل اي شي قصه الى الان في قمة الروعه
بس انت وعدة غذا يتبع صح
صح
بس بشر عسي فصلين القصه مهي اكثر
هاااااااااااااااااه بانتظار البقيه باسرع وقت ممكن;)

[برزان]

الاخ العزيز الطائي

مشاركة اكثر من رائعه وقصة مشوقه جدا ونحن بانتظار الجزء الثاني منها
_____
اخي العزيز اشكرك جزيل الشكر على تميز مشاركاتك الفعاله في المضايف
ونامل ان نرى المزيد والمزيد منها في اقرب وقت
_____
وتقبل تحياتي

[برزان]

اخي العزيز
....
تم نقل الموضوع الى مضيف القصه

....


تحياتي

[الحربي]

الاخ النابغة الطائي

قصتك شيقة للغاية

وتجبر الشخص على متابعتها

بصراحة انت كاتب متميز

تجيد كتابة القصة بالاسلوب الشعبي

وتملك موهبة ادبية راقيه

تجيد صياغة المفردة والتسلسل المنطقي لسيناريو الحوار

ننتظر الجزء الثاني



اخوكم الحربي

[طلال صعفق الحافظ]

والله حقيقة....خرعتن..والله للحين وأنا قلبي ينبض أقوووول عسى الله يسلمهم ويلقون الرساله..ويرجعون للمخيم قبل لا يدرون الثانين الا وانت تقووول...يتبع غدااااا.....

اسمع اذا ما كملتها راح............ازعل عليك...





لالالا....لا تصدق...أمزح معك..

والسلام عليكم ورحمة الله وبركاته.

[النابغة الطائي]

- الفصل الثاني -

---
- من هي ميسون .. ؟؟

ركبوا جميعا السيارة عائدين إلى المخيم..

قطع عبدالمحسن السكون بقوله: اقول خالد, انا عارف انه ما بيننا معرفه, بس ابقولك الصراحه, انا اول مره اشوف علاقه زوجيه مثل علاقتك بزوجتك, وانا الي اعرفه انك توك معرس, يعني ما دخلت, اكيد انها من الجماعه ولا؟؟

يوسف (بعد أن ضرب عبدالمحسن على رأسه): اقول را ما تستحي على وجهك وتناظر طريقك, ما بقى الا البزران يتكلمون عن العرس!!

خالد وهو مبتسم: والله انتم يا شباب ما قصرتوا معي, وراح اقولكم قصتي مع ميسون من الألف الى الياء, بس الي ينقال بهالسياره ما يطلع.. اوكيه؟؟

عبدالمحسن متحمس: اوكيه..

يوسف ومحمد: اسلم.

خالد: سلمتوا.. أحمد يعرف القصه كلها.. القصه بدت في سوق العويس في يوم خميس رائع..كان دوري اني افتح محل الوالد في ذاك اليوم, لأنه كان يوم اجازة الوالد, وكنت انا واخواني نتناوب على الخميسات, وكان ذاك اليوم دوري..وكان محلنا عبارهعن محل ملابس نسائيه جاهزه..

جيت متأخر لم المحل, حوالي الساعه 10 الصبح, ولقيت عند المحل بنت في بداية العشرينات, ومعها وحده اكبر منها بكثير, تبين بعدين انها امها, اول ما شافتني افتح المحل, دخلت هي وامها بدون احم ولا دستور, وقبل ما انتهي من فتح البوابه والأنوار.. مشيتها, وقلت يمكن مستعجلين, دخلت المحل, ونطيت ورا الماصه, وثمن جتني وسألتني البنت: أنت خالد؟؟

انا: ايه انا خالد, اذا كنتي تبين تسألين عن البضاعه الجديده ترى ما عندي بها علم..

قاطعتني وقالت: ليش تأخرت؟؟

انا: عفوا يا خاه, المحل محلي, واجي متى ما بغيت.

قاطعتني مره ثانيه وقالت: انا زبونه دايمه هنا.

انا: تشرفنا المحل محلك, شوفي الي يجوز لك, وادفعي سعره , ولا توكلي على الله.

ميسون: انت وش فيك جفس؟؟, انا ما جيتك اشحذ..

قاطعتها امها: ميسون؟؟.. انهبلتي؟؟

والتفتت على (الأم) وقالت: هذا بكم يا شيخ؟؟

انا: هذا ب70, ونعطيك اياه ب65.

ميسون: 65, تبي تلعب علينا انت؟؟..

انا: والله هذا مكسبه 5 ريال.. يعني ما يرضيك ابيعك اياه بخساره..

ميسون: اجل لاعبين عليك, انا شايفت بمحل ثاني ب50..

انا: جيبيه لي واشتريه منك ب55.

ميسون: انا منيب فاضيه اجيبه لك.. المهم.. طيب هذا قماشه زين ولا خرابيط؟؟

انا: هذا يا خاله ازين من الي اشين منه.

ميسون: ماش انت ما عندك علم, الله يهدي صالح الي دلنا على محلك..

قالتها وهي تسحب امها وتطلع برا المحل..

وانا تذكرت ان صديقي صالح قالي ان اخته وامه يبون يجون لم المحل, وكان يبيني اتوصى بهم.. وانا نسيت المسأله كلها.. فرحت ادورهم في المحلات القريبه, ما لقيتهم.. فقررت اني اتصل على صالح بالعصر علشان اعتذر منه... بس الصراحه.. الإعتذار ما كان هو السبب الرئيسي..

جاء العصر, فرفعت السماعه, ودقيت رقم بيت ابو صالح, وردت علي ميسون نفسها.. على طول تذكرت صوتها..

ميسون: الو؟؟

انا: الو؟؟ مساء الخير..

ميسون(بصوت عالي) : انت ما تستحي على وجهك؟؟

انا: عفوا؟؟

ميسون: انت ما عندك خوات تغار عليهم, ما عندك شغل الا ازعاج العالم, ترى رقمنا مراقب, ونبي نجيبك, وابخلي اخواني يجلدونك لين تقول بس, ثمن يبون يودونك لم الشرطه تشوف شغلها معك يال****.

انا(مدري وش اقول) : عفوا أختي....ان خالد صديق صالح, صالح فيه؟؟, ممكن اكلمه اذا ما كان فيه ازعاج؟؟.

ميسون بعد ما سكتت لحظات:اووووه.. طيب ورا ما قلت كذا من الصبح؟؟.. لحظه..

بعد شوي رد علي صالح

صالح:هلا ابو خلود.. اسف لسوء التفاهم الي صار مع اختي قبل شوي, يا شيخ فيه واحد **** مزعجنا بهالتلفون, مع ان ميسون ما تقصر معه, تعطيه من الحامي, بس ما يتوب.

انا: عادي يا رجال, عندنا وعندكم خير.. المهم.. انا بغيت اعتذر منك عن الي صار مع الأهل اليوم في المحل, الصراحه ما عرفتهم, وطلعوا من المحل زعلانين, وانا جبت القطعه الي كاوا حاطين عينهم عليها, وابعطيهم اياها هديه من المحل.

صالح: ما فيه داعي يا رجال, وما صار الا الخير.

انا: عاد انا جبت القطعه, ولا ابيك تكسفني, ومنها نشوفك يالقطوع.

صالح: دامك مصمم اجل ورا ما تجي تتقهوى عندنا الليله؟؟.

انا: تم, اجيك بعد صلاة العشاء.. مناسب؟؟

صالح: مناسب.

وصليت العشاء ورحت لم بيت ابو صالح.. ودقيت الجرس.. ورد علي صالح, وقال: هلا خالد, انا بدورة المياه, ادخل لم الخيمه, دقايق واجيك.

دخلت لم الخيمه...وجلست, لقيت جريدة اليوم, فتحتها.. وقعدت اقا.. بعد شوي.. دخلت ميسون تحسبني صالح

قالت: سلام..

واخذت وحده من المجلات وجلست..انا تنحنحت.. بس ما انتبهت.. حسبتني صالح ارد عليها السلام من ورا الجريده..

قالت: ترا خويك خالد هذا شايفن نفسه بالحيل, يعني مدري من الي معطيه الإنطباع انه وسيم ولا فوق الناس؟؟, وانا الصراحه ما ندمت اني قلت عنه انه **** في التلفون, حتى وانا غلطانه, ما ادري اول ما شفته ما دخل قلبي, ويوم سألته عن قماش القطعه, قال ازين من الي اشين منه(قالتها وهي تقلد صوتي بإستهزاء), يعني انا ما اقول الا الله يعين مرته عليه, معاني اتمنى وادعي ربي ليل ونهار انه ما يصير متزوج, يعني حرام تنظلم معه مرته.. (وسكتت شوي..ثمن كملت) يعني حتى لو كان وسيم شوي, وطويل, هذا ما يعطيه الحق انه يتفلسف على الناس, لا ويوم سألته عن قماش القطعه قال....

(قاطعتها انا بصوت عالي شوي) وقلت من ورا الجريده(وانا ابتسم): ازين من الي اشين منه...

هي سمعت صوتي من هنا.. ورمت المجله, وركضت لم جوا البيت من هنا..

وبعد دقايق جا صالح, وكان واضح انه ما عرف وش الي صار, وانا استحيت اقوله..

والصراحه ان طول المده الي كانت جالسه فيها معي بالجلس كنت رافع الجريده, وكنت احاول اني ما اناظر, بس أول ما حسيت انها تبي تروح وهي في طريقها لم باب الخيمه مسرعه, لمحتها.. وليتني ما لمحتها..كانت أجمل مخلوق شافته عيوني, تصدقون يا جماعه, أني في ذيك الليله ما نمت, كنت قاعد أصلي طول الليل, حسيت أن اللمحه الي ما تجاوزت ثانيه وحده, تسوى عمر كامل, كانت لابسه قميص احمر, ورافعه شعرها, وكانت بيضاء, لدرجة أن القميص الأحمر صار اغمق من الدم.. قعدت في ذيك الليله أصلي وأطلب المغفره, لأن الذنب الي سويته في ذيك الليله شعرني بسعاده غريبه مثل سعاده الي سرق اكبر بنك بالعالم, لا أحد درى عنه..

وجاء وقت صلاة الفجر, وجاء لمي أبوي يصحيني, ولقاني صاحي.. بعد الصلاة, وأنا ماشي مع الوالد من المسجد لم البيت..

قلت له: وش رايك تصير جد؟؟

التفت علي وابتسم, واسرع بخطواته..

قلت له: انا اكلمك.. وراك عجل؟؟

التفت علي, وهو ما زال سريع الخطوه, وقال(وهو يبتسم): اببشر العجوز..

عبدالمحسن مقاطع كلام خالد: يا شباب فيه شي غريب بالمخيم..

وكانت يده تؤشر على المخيم..

---
يتبع الليلة ..

[فلاح السعد]

وراك وراك

[النابغة الطائي]

العــــــــــــــار..

الجميع أحس بأن هناك شي غريب في المكان, فالسكون غريب, وتكاد تكون كل الأنوار مطفأه...

وفجأه..

فتحت كشافات المعسكر كامله, وكانت جميعها موجهه نحو السياره التي يقودها عبدالمحسن, وبعد لحظه من الزمن, بدأ يتبين الموقف لجميع من كان في السياره, فكان جمع كبير من الجنود موجهين فوهات مدافعهم ومسدساتهم نحو خالد وزملائه, وتبين أن قائد الكتيبه موجود ايضا..
\nهمس اللواء قائد الكتيبه مع مساعده العقيد, وذهب..

أمر العقيد مجموعه من الجنود بأنزال كل من في السياره, والذهاب بهم الي خيمة الحجز..

سكون غريب كان يعم المكان في خيمة الحجز, وكسر عبدالمحسن حاجز الصوت بقوله..

عبدالمحسن: وش راح يصير الحين بنا يا جماعه..

يوسف: هاذي يسمونها عصيان أوامر عليا أثناء الحرب, وفيها ذبح, خلونا نتمنى انها تصير على فصل تأديبي, بس لازم نجيب سبب مقنع لخروجنا من المعسكر..

محمد: تبينا نكذب؟؟

يوسف: أنت شايف حل ثاني؟؟, لو نقولهم اننا رحنا علشاننجيب رساله ما راح يصدقوننا, وراح تبدأ الشكوك..

أحمد: انا رأيي من رأي يوسف, نعطيهم أي سبب مقنع.

عبدالمحسن: أنا ما اعرف أكذب.

وبدأ صوتهم بالأرتفاع..

يوسف: شف.. أنا ما راح أموت بتهمة الخيانه.. أنت تسمع؟؟

محمد: أنا اقول نقولهم الصراحه, وندعى أن الحكم يصير مخفف..

وأرتفع صوتهم أعلى وأعلى.. حتى تكلم خالد..بصوت عالي..

خالد: يا شباب؟؟

سكت الجميع..

خالد: أنا آسف جدا اني جريتكم معي وسببت لكم هاذي المشاكل, وأنا راح احلها لكم, راح نقولهم أني أجبرتم وبقوة السلاح, وبكذا تطلعون منها..

أحمد: أنت انهبلت, محد مننا راح غصبن عليه, صحيح أننا رحنا علشانك...

وقطع كلامه صوت الجندي يدخل الى الخيمه, ويطلب خالد للتحقيق معه..

راح خالد علشان يحقق معه..

دخل خيمة اخرى, وكان موجود فيها العقيد, مساعد رئيس الكتيبه, والميجور, وجندي سعودي يكتب المحضر..

مرت حوالي نصف ساعه قبل أن يعود خالد الى خيمة الحجز..

وذهب بعده يوسف..ثم أحمد.. ثم محمد.. ثم جاء الدور على عبدالمحسن..

كان عبدالمحسن يسأل كل شخص يأتي من التحقيق, ولكنهلا يأخذ اجابه شافيه, فالكل يأتي من التحقيق منهك, ولا يريد الكلام..

ذهب عبدالمحسن الى خيمة التحقيق, يقوده الجندي..

دخل الى الخيمه.. ووقع نظره على الميجور, فبدأ بالقلق, وبدأ العرق يتصبب من على جبينه..

قال له العقيد: هلا عبدالمحسن.. تفضل اجلس.

جلس عبدالمحسن على الكرسي, وكانت بينه وبين العقيد طاوله, وكان العقيد قد وضع قدميه على هذه الطاوله, وفي الزاويه كان يجلس الميجور الأمريكي..

العقيد: يالله قلنا وش القصه, وشلون جرجروك هذولي السرابيت معهم.. أنا عارف انك انت عاقل ومنتبراعي خرابيط.

عبدالمحسن: الصراحه أني انا السبب.. انا كان عندي غرض..

قاطعته ضحكه كبيره للعقيد..

العقيد: كان عندك غرض ناسيه في الموقع القديم واجبرت البقيه انهم يجون معك!!..الصراحه انا حققت مع ناس واجد, بس مثلكم يالخمسه ما قد شفت, يعني بالعاده ندور على المذنب, بس في هاذي القضيه كل واحد منكم يقول أنا!!

وأشر على الجندي..

فأخذ الجندي عبدالمحسن الي خيمة الحجز..

ومرت الدقائق كسنوات على الخمسه المحتجزين, ولم يذق أي منهم طعم النوم, فقد كانوا يعلمون أنهم في مأزق..
\nوبعد صلاة الفجر في اليوم التالي, دخل العقيد الى خيمة الإحتجاز, وأمرالمحتجزين بأتباعه, وكان معه ثلاث جنود, فتبعه الخمسه, ولا يدرون الى أين ينقادون, ولم يمر وقت طويل حتى عرفوا انهم في طريقهم الى خيمة قائد الكتيبه.. اللواء...

دخلوا مكتب قائد الكتيبه, وأدوا التحيه جميعا, ثم قال قائد الكتيبه

اللواء: الحقيقه اني اخجل ان أعلم وجود نوعيتكم في كتيبتي, أنتم عار على السعوديه, وتصرفاتكم الصبيانيه تدل على عدم أهتمامكم بقضايا الدوله, وتصرفاتكم أثناء التحقيق, تؤكد هذا الشي.

خالد: سيدي سعادة اللاء, فيه حقيقه يجب أن تكون معلومه عند سعادتكم..

اللواء(مقاطعا): أنا ما عطيتك الأذن بالكلام يا رقيب.., الحين أنتم مالكم مكان في كتيبتي, ومن الممكن أن اصفيكم بتهمة عصيان أوامر عليا أثناء الحرب, ولكن ولمعرفتي السابقه بوالد أحمد ومحمد, وكان رحمة الله عليه نعم الرجل, ولكنه ما عرف يربي عياله للأسف, ولعلاقتي السابقه به, راح أستخدم صلاحياتي, وراح أخفف الحكم الى فصلكم فصل تأديبي, وراح يكون فيه تحقيق معكم بعد انتهاء حالة الحرب, بس أنا ما راح أستخدم صلاحياتي الا اذا عطيتوني السبب الحقيقي الي خلاكم تسرقون سيار الميجور وتطلعون بها خارج المعسكر..من أكبركم رتبه؟؟

خالد: أنا طال عمرك,, الرقيب خالد.

اللواء: وش طلعكم من المعسكر؟؟

خالد: أنا نسيت غرض في مكاننا القديم, ورحت علشان اجيبه, وأخذت محمد وأحمد علشان يدلونني, ويوسف هو الي دبر لي السياره عن طريق عبدالمحسن.

اللواء: يعني أنت الرأس المدبر؟؟

خالد: نعم طال عمرك, وأنا الي سببت المشكله من الأساس, وأنا الي أستحق العقوبه, وليس هم.

اللواء: أحترم نفسك يا رقيب, موب أنت الي تحدد من الي يستحق العقوبه, وعلى كل, وشو الغرض الي نسيت؟؟

خالد(بعد تردد): نسيت رسالة من شخص عزيز.

اللواء: وش قلت؟؟.. رساله؟؟.. أنت شايف أن هذا سبب مقنع؟؟.. من مين هاذي الرساله؟؟

خالد: من زوجتي طال عمرك.

اللواء(وهو يحاول أخفاء علامات الإندهاش من على محياه): طيب طيب.. الحين أنا عندي سببين لفصلكم, الأول الي قلته, والسبب الثاني أنكم مجرد أطفال, ما كبرتوا, تحطون أنفسكم وغيركم في خطر, علشان أشياء تافهه, ولأنكم كلكم شاركتوا في هذي العمليه الي أقل ما أقول عنها الا أنها تافهه وسخيفه, أنا قررت فصلكم فصل تأديبي, وراح أوفر لكم وسيلة نقل علان تروحون فيها لم الدمام, وتسلمونها هناك عند قيادة الأركان, والحين أبغاكم تسلمون أسلحتكم, وشاراتكم للعقيد, ومع السلامه, تاخذون عفشكم, وتمشون الآن..
---
نكمل غداً ..