بسم الله الرحمن الرحيم
(الاسعافات الاوليه في الكشتات المكوكيه)
(النصائح المفيده في القيلات المجيده)...............
السلام عليكم ورحمة الله وبركاته
وش رايكم بالعنوان؟؟
الى جميع الاخوه والاخوات ابي تفاعلكم لإنجاح هذا الموضوع
بما ان الفله والدكه تلاصقن فهذا الموضوع مكانه الدكه علشان كذا لبطت به ها هنا
وبعد استشاره الاداريين بالإجتماع المغلق للجمعيه العموميه الحادي والعشرين <<<<<<ciose your mauth(او مهي هاللون)<<<طيب
ديباجتي
بما اننا بموسم الكشتات والتخييمات
قررتاكتب هذا الموضوع
اول شي نبي نحاول نحصر الامراض او الازمات اللي ممكن نواجهها بالبر (طبعا ماحولكم مستوصف ولا مستشفى ولا وحدات صحيه)
الازمه=العلاج
1) الزكمه والتهاب الاذن==اكل بنادول مع دهن الرقبه والنخاشيش وحول الاذن بفقس ويمص كسرة مره ويتغطلم بمضربيين وينام واذا قام يحرص بعدم التعرض لتيار هواء يتمسح بشماغوه ويدفى ويتقهوا قهوه مع مره
2) وجع الضرس==مهدئ عود قرنفل (واللي قبل يربطون يدين المضروس ورجلينه ويجيبون زراديه ويقلعون الضرس)
3) دخل بالاذن دبيب(حشرات صغيره)==يذوب قليل من الملح في قليل من الماء وينقط بالاذن قطرتين قد تفي بالغرض ثم يحط اذنه اللي به الدبيب على الوساده ويحاول يحرك راسه ويضرب راسه بالمخده بشويش مهوب بقوه ينكسر راسه ويطلع والدبيب انشالله(وانا افضل فقط ماء من دون ملح لان الاذن يمكن فيها جرح)
4) قرصة عقرب==يربط العضو المقروص بحيث يتم حجز الدماء المسمومه من الذهاب لباقي الاعظاء ويدهن بدهون ابو شنب ويعرض العضو(المقروص)للهواء ويحرصون ماينام على ظهره مع الاسراع بالتوجه لاقرب وحده صحيه//وفيه عشبه يحطونه على القرصه اللي يعرف اسمها يقول لنا
5) قرصة داب
6) الكي (خصوصا الصغار بطلعات العوايل بس يتجدعون بالنار:192r: )==يقطعون قطعه من بيت الشعر ويحرقونها الين ما تصير سماد ويذرونه على الجلد المحترق كذا مره الين ما تطيب
7) شد عضل (خصوصا بالنفود)==توضع مله(تراب حار) بشماغ ويوضع على العضله المشدوده وانشالله خير
8) رضوض==هذي صارت لي طحت من ال****ه(مدري وش يسمونه الناس اللي فرشه تجره السياره كانت السياره مسرعه وتجمشمت ارطاه) على صابري وغدا ازرق ثم بنفسخي ثم بني انا حطيت فكس وفازلين بس يوم رجعنا للديره رحت للصيدليه وخذيت جل علشان يشتت الدم المتجمد
9) طار بعينك شي او التهبت==يحطون شاي ثقيييييل بدون سكر
10) نزيف الجروح==عود قرنفل مطحون(مسمار+عويدي)يوضع على مكان النزيف ويربط بخرقه او يوضع عليه لزقه
11) الخشه(البرد)==(ليا كليت دسم سمن وزبد وشفك الهوا)عنزروت ومره وسفوف
12) القداد والحموضه==عنزروت ومره اوفوار
13) التخمه(ليا فصملتوا لكم هريفي وصارن كريعاته يوتزن مع حلقك)==صرفو ببريق مرمريه(مراميه) والا ببسي وسفن
14) الم الراس==بنادول وعصلبت راس
15) شوكه غائره==يحط عليه صباخه(مره وحلتيت يحطونهن ببصله مشويه شوي)ويصبخونهن على الشوكه
16) طار الظفر==مطهر آيدين ويربط
17) لاهل القولون والمعده==ارطي مغلي بما حار ثم يبرد ويحط بغرشه صحه ويشرب منه كل ما هذا (حنا نسميه دباغ) وحليب سعوديه
18) الخلج والملع== لزقات جونسون وكريم فولتارين من الصيدليه
واخر هالعلاجات اتوقع لو تمرون الصيدليه وتاخذون علاجات ابرك لكم
وبعض النصائح::
1) الصلاة الصلاة الصلاة
2) طبعا الكشته له امير منتخب من الجميع
3) والامر شورى بينهم وكلن يراعي لخاطر خويهو انزال الناس منازلهم
4) ويراعون لخوياهم مهو اهل هالجيوب يشلعون ووراهم راع الددسن ما يفقدونه الا بلينه وهو راكز بعرق المظهور
5) الاجهزه هين مابه حكي
6) يطمنون اهلهم اول ما يستقرون مهو الواحد مستانس والأم قلبه نار على وليده ما تدري هو فوق الارض والا حدره
7) وطبعا يتبعون السنه بانهم ما ينزلزن بالاوديه السحيقه
8) التكبير عند صعود الطعوس والقور والاماكن المرتفعة والتهليل عند النزول في الاوديه والاماكن المنخفضه
9) قراءة الادعيه دعاء النزول وتعويذ الاطفال
10) وكل الشباب يشتغلون كلش ولا الإتكال ولو الشغل مقسم بينهم احلى مهو الواحد بس يتمجغل ويتجلطويبيهم يفتون على حنوكه
11) والليل نوم والنهار دوجه مهو الواحد يطلع وتالي ما يقوم من النوم الا القايله احسن ما بالبر الفجر
12) طبعا لازم اتباع السنه تنفضون الفراش قبل تنامون يمكن فيه خشاش ودواب تحته
13) ولازم الانتباه اثناء المشي مهو كل شوي والخيمه ترتزل يمار احد هالهروش منخمع بالطنب والا متجشم النار خصوصا بالليل
14) اللي يبون يجونهم خوياهم ويبون يحطون لهم علامه مهو يوقفون جيب بني او بيج فوق الطعس..ماينشاف
15) نصيحه خاصه قبل لا تروحون للبر لبسو جوالاتكم جرابات بلاستيك
16) نصيحة خاصه جداَجداَ اللي يلبسون نظارات ياخذون نظاره سبير
17) احضار الاسعافات الاوليه آنفة الذكر
18) الناس معادن ويطلع المعدن الطيب من المعدن اللي لك عليه بها الطلعات والسفرات يا انك رجال ينحط على اليمنى//فأحرصوا جزاكم الله خير على حسن الخلق
وبعد ما ترجعون لاهلكم سالمين غانمين<<<<<<<<<< ترو تعبت على مالقيت هالمعلومه
((((((((((((((((((المشقاو الحفا او خشونه الجلد علاجه الودك تطلسوا به ))))))))))))))))))+تودنون اسبوع بحمام البخار وانشالله ترجعون اوادم من بعد ماكنتم حراشف
يالله كل واحد من الاعضاء عنده شي يطلعه وخصوصا التعامل مع مرضى الضغط والسكر
واهم شي لاتنسون الشخاط
يالله نتبادل الخبرات ***ومالنا عنكم غنــــــــات
لا لنا عنكم حيـــــــاد*** ونشوفكم على الخيرات<<<<<<<<<<ضروره شعريه
^
^
^
قصيدتي الجزله
شكرا لكم مقدما
وتقلدو تحية الشبث
ودمتم عشرانن دائمين لشنقل
وطقبلو طحياط ك.ب.إ
واخيرا
تلقفوا ثانكيواتي
كم ايقونه بالموضوع ؟؟؟؟؟
قضى الموضوع وفيه ايقونه منا زينه وودي احطه
اعتبروه فاصل إعلاني
ــــــــــــــــــــــــــــــــــــــــ ــــــــــــــــــــــــــــــــــــــــ ــــــــــــــــــــــــــــــــــــــــ ــــــــــــــــــــــــــــــــ
ــــــــــــــــــــــــــــــــــــــــ ــــــــــــــــــــــــــــــــــــــــ ــــــــــــــــــــــــــــــــــــــــ قضى الفاصل
&آخر العنقود&
رد مع اقتباس
المشاركة الأصلية كتبت بواسطة &آخر العنقود&
المفضلات