حياكم الله اخواني
طبعا الموضوع هذا ماهو غريب عن اغلبكم وسبق ان طرح هنا
من خلال الرغبه بمعرفة اسم الشمريه وكانوا الاخوان يضنون انه بنت عدوان بن طواله
وانا كنت من ضمنهم
فاحبيت اطرح القصه الحقيقيه مع ذكر اسماء اشخاصها
مع العلم اني رايت انه قد لمسها التحريف خاصه
بكتاب "من ادابنا الشعبيه في الجزيره العربيه الجزء الاول"
للمؤلف منديل بن محمد ال فهيد
وراح اذكر لكم ماذكره في اخر القصه من خلال استناده الى روايات عنزه
القصه حدثت بين كنعان الطيار وهو فارس من فرسان عنزه وعقيد مغازي
وبين " هيا بنت بن سنان بن طواله الاسلمي الشمري"
هيا اشتهرت بالجمال والعفه
شافه كنعان الطيار وهو كان مارٍ بنزل الطواله المهم نوى له الشر
وهو يروح يم لوه عجوز قال ابيك تخليني استفرد بهيا ولك اللي تبين
قالت العجوز الطواله يبون يرحلون ويامنك شفتهم رحلو ارجع لمراحهم وانا اخليه ترجع يمك
المهم رحلوا الطواله
وهو يروح كنعان ويجلس بالمراح ينتظر
وهو تروح العجوز يم هيا يوم شافت الطواله ابعدو
قالت يابنيتي ابيك ترجعين للمراح نسيتي لي اغراض هناك
قالت هيا ابشري
وهي ترجع هيا على ذلوله وهي على فاله ماتدري
يوم جت المراح يامار هذا كنعان يتحراه
بغت تهرب لكن ماستطاعت حاصره الرجل وناوي له بالخنا
فشافت ان ماله الا الحيله
قالت هيا ياكنعان مايخالف لك اللي تبي بس خايفه حدا عيال عمي يطب علينا
قال وش تبيني اسوي
قالت هيا اربط فرسك ورح نط اكالمرقاب اذا شفت المكان فاضي ولامن احد
ارجع وتلقاني متولمه لك
قال كنعان مايخالف وهو يسوي مثل ماقالت
يوم رجع يامار هيا راكبتن على فرسوه ومخليه لوه ذلوله وهي تنحاش لاهله
قال كنعان:
[poem=font="Simplified Arabic,4,sandybrown,bold,normal" bkcolor="transparent" bkimage="" border="none,medium,gray" type=1 line=0 align=center use=ex num="0,black"]
يالله يافراج ياوالي الافراج=ياللي غني والناس غيرك محاويج
افرج لعبد حزة العون محتاج=متحير ضاقت عليه المناهيج
عزي لمن خلنه البيض مسهاج=خذن جواده واركبنه هجيهيج
يابنت منهو باللقا يلبس التاج=لاحل بالربع المقفين تزعيج[/poem]
والقصيده اطول من كذا
المهم ان كنعان اعجب بعفاف البنت ومحافضته على شرفه
ونوى يتزوجه راح وخطبه لكنه رفضت فقام وزعج اكثر من جاهيه ياما وافقت عليه
المهم الرجّال تزوجه
استقرت معوه عند قبيلته مع البطا بدا يشك به
"لانوه سبحان الله دائما الانسان يشوف الناس بما به يعني تسانوه تسذوب يحسبن
الناس كلهم يتسذبون عليه وتسانوه سروق يحسبن الناس سرقان وتسانوه خاين
يحسن هالناس يبون يخونون بوه"
المهم ان كنعان بدا يشك به انه تخونوه من وراوه فقرر انوه يختبره وكان شاك برجل من جماعتوه
راح وسرج الفرس قالت هيا وين تبي قال كنعان ابي اغزي واخذ لي حول هاليومين والثلاثه
مشى بطريقوه يوم جاء بالليل وهو يرجع يمه وهو يتلثم وهو يدخل عليه
يامار هيا بالفراش وهي تقعد بوه قالت من انت
قال انا فلان وهو يذكر اسم الرجل اللي هو شاك بوه وهو تضربوه باللي عنده
المهم انوه انجرح فوق حجاجوه
هرب كنعان ودري انوه ظلمه وانه شريفه رجع له عقب يومين على انو راجع من المغزى
يوم استقبلتوه وهي تشوف الجرح فوق حجاجوه قالت وش هالجرح ياكنعان
قال ابد وقعت من فوق الفرس
هي دريت انوه اللي دخل عليه بالليل وحلفت انه ماتقعد لوه بالبيت
مار ماتقدر تنحاش قالت انا مالي الا اقرب شمري وانخاوه
وهي تسمع ان فيه واحد يمشي مع عنزه اسموه هتيمي بن جرطان المختاري الشمري
المهم قدرت انه تستفرد بوه وهي تنخاوه
قالت انا بنت عمك وابيك تنحاش بي
قال هتيمي مايخالف بس شوفة عينك ماعندي لافرس ولاشي
وعنزه ان دريت تبي تلحقنا
قالت هيا ابد ماعليك اطيب خيول عنزه عند كنعان وانا مستعده اسرقه لك
المهم سرقت الفرس وانحاشو هي وهتيمي
ولاوقفوا الا عند الاسلم حول الاجفر
كنعان تحسف على اللي هو سوا
وارسل اكثر من جاهيه واكثر من زوره عشان يرجعه لكنه رفضت وعيال عمه رفضو
فقال دامهم بالطيب ماجو ماللي الا بالقوه
ويغزاهم اكالمغزى وتصير بينهم معركه حول الاجفر
بين الاسلم وعنزه
وينهزمون عنزه
ويرجع كنعان مره ثانيه ويغزاهم وينهزم ايضا
المهم انوه غزاهم اكثر من مغزى وهزموه ولاقدر يرجعه ياما مات
يقول كنعان
[poem=font="Simplified Arabic,4,sandybrown,bold,normal" bkcolor="transparent" bkimage="" border="none,medium,gray" type=1 line=0 align=center use=ex num="0,black"]
ياراكبٍ من فـوق حـر مشـذر=مادنق الرقاع يرقـع ارهوقـه
امة لفتنـا مـن عمـان اتذكـر=وابـوه تيهـيٍ تعـدد عموقـه
يشبه نعامٍ فـي جذيـب تحـدر=والا النداوي يوم ترخي سبوقـه
ينصي قطين ساكنيـن بالاجفـر=تلقى عشيري كنه البدر فوقـه
ابو قرون كنهن ذيـل الاشقـر=ريح الخضيري والعنابر نشوقه
لاوا عشيري حال دونه مسطـر=عيال شمر هم حماتـه وشوقـه
حامين من سلمى الى حد الاقور=محرميـن ضدهـم مايـذوقـه
وجدي عليها وجد مطعون الابهر=اقفى يجر مسنجد مـن عروقـه [/poem]
هذا هو اللي حصل في النهايه والمعروف عند رواة شمر
ان كنعان لم يستطع ارجاع زوجته حتى مات
منديل الفهيد في كتابه استند الى رواة عنزه :
وقال ان كنعان ارسل عيال عموه عشان يجيبون هيا على ان عندهم امراه تولد
يوم جت هيا معاهم وهو ويطرحه بالارض ويقضي وطروه منه
فحملت منوه هيا وكذا استرجعه"
وهذا غير صحيح
هذا الموجود بالكتاب
واكتفى بقوله ان رواة شمر اكدوا انها لم ترجع
ولم يتطرق لمعارك كنعان اما الطواله وانهزاموه باكثر من معركه
بل ان بعض الرواه قال انها وصلت الى عشر غزوات
كذالك قصيدته المذكوره
على العموم سلامه تسلمكم
هذا اللي عندنا ونبي اللي عندكم
المفضلات