مع العذر مقدماً........
اخر ماكتبت .............
عسى ان تجد القبول من قلوبكم
[poem=font="Arial,6,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ماادري كيف اوصف شعوري يوم شفت المستحيل=شفتك وهذا خيالك في خيالي لايزال
انت ياللي كل شعر ٍ ماوصف حسنك هزيل=شف وهي جزال القصايد كيف ماجت بك جزال
انتمي لعيونك الخجلا واصير اكبر عميل =وارخص الغالي لعينك حتى لو قالو هبال
ماعليهم لوم ماشافوك يالرمش الظليل=ولا لمحوا شمس الضحى يوم اشرقت وسط الليال
ولا سمعوا حكي ٍ تهادى من شفاتك سلسبيل= ليتهم سمعوا ..(ياجدي).. كلمة ٍ هدت رجال
ولاسهروا ليل ٍ مثل ليل ٍ سكن ذاك الجديل=اسود ٍ شفته كما الشلال يوم ارخاه سال
اشهد اني من لمحتك صرت انا كلي عليل=كني اللي شايف ٍ له شي معجز او خيال
يوم شفتك وانت تمشي شفت انا غصن ٍ يميل=صحت بسم الله عليك ارحمن وامش بعدال
ياذهب ياالماس يالمكنون ياريال البخيل=يااندر العملات يالكنز يالمال الحلال
يا اصيل ٍ يسبق الهوجا ولا مثله اصيل=ياغزال الريم لو شافك تمناك الغزال
مااقول انك نحيل اقول انت امتن نحيل=راوي ٍ عودك مثل عود ٍ يسقى من زلال
ولا اقول انك طويل اقول انت اقصر طويل=حاسدينك هالقصار وحاسدينك هالطوال
عز من كملك بالزين والعقل الثقيل=زينك سبحان رب ٍ هو تفرد بالكمال
خذ مني كل اكثري بس ابي منك القليل=اصلاً انت اخذتني غصب مافيها جدال
حسبي الله بس على حسنك وهو نعم الوكيل=ماادري وش قلت الله اعلم قلت شي ٍ مايقال
قلت ابرفع معنوياتك واقول انك جميل=مادريت اني بك ارفع معنويات الجمال[/poem]
رد مع اقتباس
المفضلات