احب العزله اللي في غرامك مالها تحليل
والى جيتك اغار اليا تبعني يمك ظلالي
على هونك ترفّق واحتضني في شروق وليل
ورا هاك الرموش وانسني في جفنك السالي
فديت عيونك اللي شوفها خايل بروق السيل
اذا عز الخيال اللي تخيله يمطر خيالي
جفاك اللي جمع بين الدموع ولهفة المنديل
رماني في تضاريس الزمان ووجه عذالي
اشحت بوجهك اللي في جبينه لاح نور سهيل
تحت جنح الظلام ولا تلاشى طيفك قبالي
يلحفني سكوتي يا مسكنّي عذاب وويل
حذفت الحب الاول صار الاول حبك التالي
نحلت ولا بقالي غير قلب(ن)للغرام يشيل
وبقت لي عين تبكي غيبتك يا بعد حالي
كذوب اللي يقول ان المحبه ما تهد الحيل
وصدوق اللي خفوقه فوّح عيونه بعد غالي
تجسد لك شعور(ن) يختصر لك رحلة التطويل
تحدث لك جروحي والسكوت يلثّم اقوالي
فاضل بن غشم
رد مع اقتباس
المفضلات