؟................؟
حكايتي مع الكلب المسعور
خلني أعرفكم بنفسي أولا :
انا .. شاب مستقيم ساكن في بيت الوالد .. ومقيم مع الأهل 34سنة >>>>>>>>>>>>>>>>> شكلها بتطول الاقامه
بصراحه اغلب وقتي في الاستراحه مع الشباب .. متقاطين 7 شباب في استرااحه ..
والأجار له 3 شهوور مطوف وكل يومين متناشبين مع الكفيل ( تراااني سعوودي )
اقصد مع راعي الاسترااحه ..
سميناهاا استرااحة الحرية .. تقع على طريق مكة خلفابقالة وشيشة العفنان اللي يبيع فيها كومار>>>>>>>>>>>> ألعن أبو الوصف يا شيخ
يحدها جنوباً هايلكس موديل77 منقلب ..( الوصف أعتقد واضح .. سيروا يا الطيبين )الاستراااحه هذي عزيزه علي .. 23 ساعة ونصف يومياً فيهاا .. لا طفشت من دنياي عسكرت فيها
واذا حدتني ظروف الحياة وبغيت انقلب .. لجأت لها بعد الله وزال همي ياعمي
خلوني بداايةً اعطيكم نبذه عن ربع الاستراحه مع تعريف صغير لكل وااحد :
ابوسمرة ( رومانسي ويسمع عتاااب ويسخر من الكل حتى من نفسه)
ابو سعد (( ولد نعمة ويتروش يومياً ومشكلته انه ذكي وحبيب لدرجة السنير )
ابوفهد (( اعزهم على قلبي والأقرب لي في هالعالم كله ليش عشان ابوه عنده محظة بنزين))
وهادي(( مسوي عربجي وهو ما عنده ما عند جدته بس قلبه ابيض ) و فايز ((اسمراني نلقبه بالحلو أحياان يتقبلهاا واحييان ينصرع ويطنقر ))
حمووود البقعاوي(( ابرز هواياته جمع الطوابع والعملات النادره والحش في خلق الله ))
والسابع محسووبكم .. أوسكار زعيم الجلسه
كلنا أعماارنا 24 ماعدا ابو 26 سعد هو الوحيد اللي عمره 21 سنه
كل ماسبق توطئة قبل مانتوطىى في ام الحكاية اللي راح اسردها لكم ..
ذاك اليوم لا بارك الله في >>>>>>>>>>>>>>>>>>>> وللا بلاش
رجعت البيت الساعه 3 الفجر ..لقيت الباب مفتووح ..استغربت من اللي فاتحه هالوقت
دزيت الباب ودخلت .. وتوني جااي ( أديوور )) وأصك الباب :
هجم علي الوالد .. وبحركه من بتووع جاكي شان .. سدد لي وحده بالصدر ..
خلتني ألصق في الباب .. وأصكه بظهري ..
وقف قداامي .. ومعه مسواط الجريش .. وقال: جاي بانصاف الليالي وريحتك بلوت !!
قلت: روووقنا الله يجزااك خير لا تفضحناا .. فك و أفك ...
قال: شايفني بيبسي ام نص ريال ((ينكت الوالد ))
مسكني من شعري وتلني وخلاني أوقف قداامه زي الألف أ أ أ ..
قال : كم مره قايل لك احلق شعرك .. أنا اوريك ..
وحط رااسي بين سيقاانه .. ومسكني من بطني ورفعني فوووق فووق عالي السحب ..
متأثر باندرتيكر وهالمصارعه في دبي الرياضيه
ثم جيتك أمشي مليوون وعلى الأرض وآآه يا ظهري
قمت القط وجهي ومحفضتي ووجوالي وسبحتي النصراويه .. وقلت :
الشرهه ماهيب عليكم .. الشرهه على اللي جاي يشوفكم ..
وطلعت زهقاااان .. وعلى وين يا أوسكار على وين ..
ما بدهااش .. مالك الا هيفااء .. الاسترااحه طبعاً
جيت الاسترااحه .. ولقيت حموود ابوسمرة يشخروون
قمت افرفر في القنوات واناظر رسايل هالمرااهقين وأتحمد ربي :
** محمد وحشتني افتح جوالك ودق تررى بامووت .. حبيبتك لمااا
** سعود الرياض.. ابي اتعرف على وحده رومانسه وتسكن شرق سكاكا
** ميسوون الخبر: ارجع ياكل الحب ارجع ياخلوودي
طفشت منهم .. فريت على الفضائيات الحكووميه .. وأثر البرامج الدينيه تدهر بهالفجريه!!
لا صحوا الناس .. حطوا افلام واغاني ...
واذا نامواا.. حطوا برناامج فتااوي واحاديث !!!!
بيني وبينكم الدش مو صافي .. يقطع ..
والشاشه ترووح وتجي.. أشرت لها عيت توقف
طفيته وأخذت لي غفوة ..
جاني الهندي هارون حق الاسترااحه معه كيس صاامولي يصحي فيني:
... بابا أوسكار بابا أوسكار قووم "سئوور يجي " ..
رفعت شماغي عن وجهي .. وصفقته كف قلت : حل عن سماي ماني ناقصك
قال: والله سئوور يجي ..
طالعت الطاقه: النور بدا يشقشق والدجاج يبقبق ( ياهوه يانزار بن هذال )
قلت له من هاللي جاي هالوقت
قال: سئوور كبير اسود
قلت: تكلم زين وش بك كأنك ملحووق .. عااد علي نفس الجمله ..
قلت في نفسي : الله يرجه .. أكيد هالأسمراني جارنا ابو معاوية الدب .. جاي يبي زي العاده:
سلف ملح .. مااجي صلصه ..
وانا طالع .. قفلت باب الاسترااحه عشان مايدخل هالنشبه ابومعاوية وانا ابي انام
يمين .. يساار ..
مالقيته .. وين راح ابومعاوية؟!!
قلت: أكيد تأخرت عليه ورجع استراحتهم .. باروح له قبل يرجع ويصحيني وانا خرماان نوومه..
وهنا بدأت الحكاايه (( بدري يالشيخ ))
مشيت !!
مشيت !!
وفجأة ..
وقفت ..
ثم مشيت (( ألعن أبو الأثاره )
والله وانا في الطريق سألت النفس :
وش جايبه ابو معاوية هالصبحيه ..
هو وربعه يجون المغرب ويمشوون وحده الليل .. غريبه ..
وصلت استراحتهم لقيتهاا مقفله ولا فيه اي سيارة عند الباب ..
قلت .. الله يرجك يا هارون ماعمرك جبت العلم صح ..
ورجعت اعقاابي لأني نعساان
وانا مديووور .. لمحت زووول اسود كبييير !!!!
والله صاادق هارون
وبديت اجمع حبل غسيل افكااري وأتذكر الكلام اللي سمعته من يومين :
(( يقولون فيه كلب اسود مسعور "سئوور" يدووج بهالحواري الصااده ويعض وياكل خلق الله ))
بلعت ريقي اللي نشف ..
وأمعنت النظر ..
والنتيجه:
فعلاً .. أخوكم أمام الكلب المسعوور وجهاً لوجه !!
** يقول الفيلسوف اليوناني اللي ما أدري وش أسمه:
أسوا شيء أن يدااهمك الموت وانت لم تكتب وصيتك . .
الكلب قداامي .. والأرض خلااا مابها احد .. وعزرائيل مابيني وبنيه الا ثوااني لا اكثر!!
قلت لنفسي : حط رجلك !!
" بس المشكله اني قفلت باب الاسترااحه .. ولما انحااش واقعد اطق الباب واحتري هالخيشه
حموود وخويه ابوسمرة يصحوون ثم يفتحون ..
اكون وقتهاا نقانق بالمتبل الصيني في بطن ابو الشباب قصدي ابو الكلاب
أقترب الكلب المسعوور مني !! صار وجهي بوجهه .. وعيني بعينه ..
ودمعت عيني ودمعت عينه كفاناا من زود الفرح هلت دمووع
للأسف .. من قراادة حظي .. ومن حسن حظ المستر مسعوور ..
أني لما قررت الهرب .. لمحت الدلخ حموود وابوسمرة فوق سطح االاستراحه يوازنون الدش !!
يبوون يلحقوون على برناامج المملكه هذا الصباح
لما شافوني وجهاً لوجه امام الكلب ..
قاموا يصفروون ويشجعوون .. وصاار ابوسمرة يطق في صحن الدش زي ابو هلال مع الطبل
التركي في مدرج الهلال وحموود يقول:حيوا اوسكار حيووه .. وفايز كل اللي
اذكره انه استنزل على طق ابوسمرة!!
.....
عااد انا زعيمهم واقوااهم .. فـمن العاار أهرب أمامهم ..
وقررت المواجهه ( أخس يا بتال القوس)
قلت في نفسي : الله واكبر .. وش الكلب يعني ؟ مجرد قطو حجم عائلي!
وش قطو .. الا فاار بس ( مورم حبتين ) اهجم عليه وخلك حيادي (( الله من الهلوسه ))
بنفس الوقت .. سمعت هارون الهندي هو وربعه .. مسوين راابطه ويغنوون لي :
بابا اوسكار .. ياكلك
هبه هبه .. ياكلك ...
مع وااهد فلفل .. هم همممم
والسيارات على الطريق العام تتفرج .. والمرور كثف الزحمه ( الله من زين الوصف ))
والهلكوبتراات فوقي تبااشر النتائج ..
وانا والمسعوور قباال بعض وكل وااحد محترم خصمه
قبل ان اهجم .. حاانت مني التفااته عااجله واثر ابو فهيد ينزل من الكراسيدا حقته ..
ويجي مسرع مكاان المعركه ويصرخ :
كله الا اوسكار ( ما قلت لكم اعز وااحد على قلبي )) ..
وتذكرت عدناان لما جااء مسرع لـ جنود القلعه وأنقذ ( لينا ...)
جااء ابو فهيد مااشي ألفين مدور شر
الكلب مطنش وببروودة دم لما وصله ابو فهيد سوى حركه هيدروكربتراديه خاطفه ....
وألين ابو فهيد قداامي يخررر دم ( ياشين االحماس)
قام الكلب يحك ظفووره .. ويصفر وقذلته فوق عينه اليسرى : قال لي:
هااه يالاطخم اسدحك جنب خويك .. ولا آكلك وأحط عضامك فوقه ؟! أختر ..
قلت : احذف الاجابتين بعدين هذا ما قد شفته ولا هوب خويي ( نكرت ابو فهيد مسكين بس الضرورة ))
قامت اسنانه تصرصر من الحمااس ..
رحت مسووي زيه ..
ومن قوة الدوس على اسناني .. نط النااب حقي قداامه في ارض المعركه !!
قعد ينااظره مستغرب ..
استغليت الفرصه .. وبحركه نابعه من تأنيب الضمير الانسيابي :
طمرت عليه وتشعبطت فوق ظهره .. وصفق الحضووور
قعدت اخنق فيه بحمااس ..
التفت علي ببرود .. وقال :
يالحبيب .. حمار عندك انا .. راكب ضهري!! لا خل أوديك استراحتكم احسن ..
أنزل وتطاااق زي الآواادم ..
أستحيت وانا ناازل ومتجهز للهروب
انقلبت الأرض وصاارت سمااء ..
وصاارت رجلينه ويدينه في بطني وصدري .. ووجهي بوجهي ..
خشته بكشرتي
تذكرت بهالموقف رشدي اباضه وميرفت امين.. .
قلت له .. الله يستر من رومانسيتك
وفتح فمه وشفت انيابه ..
على فكرة .. اقصر أنياابه أطول من أصبع رجل ابو جيراننا
وأنقض على رقبتي ..
و ............. و .............
________________
فاصل اعلاني
دن دن دن فااصل ميوزيك مع دقة خطر
..............
طبيت على ابو فهيد وخميته من الخوف ..
سمعته يسب ويلعن !!
أيضاً سمعت صووت بوووري معلق ..
لا أخفيكم سراً أيضاً سمعت صووت فراامل عنيف جداً ..
دفني ابو فهيد .. وهدأ السرعه .. ووقف يمين الخط .. والتفت علي وعيوونه حمراء معصب :
عسى ما شر يالثور .. بغيت تخلينا نجيب العيد في هالتريله اللي من شوي ..
فركت عيوني .. قلت : سلامات عسى ما شر يالحبيب ..
قال : انت مدري وش سالفتك .. من مسكنا طريق ابو حدرية وانت حلووووم :
رد الكلب .. هات الكلب ...
قلت بسرعه مسوي انفي التهمه : وش كلبه .. وش مسعوور لا عضني ولا شي
قال: انا قايل عضك .. انا قايل مسعوور !!
تورطت .. قلت : ايه بس من الربشه يمكن انك نسيت . .
________
وصلنا استراحتنا ..
والحمدلله صاار سيناريو حلم مرعب ..
لا كلب ولا هم يحزنوون ..
________-
يالربع ..
لا ينط لي وااحد منكم ويسأل اسئله بايخه ويقول :
اصلاً يانصاب الكلب مايتكلم ..
ترى القصه تعليق في تعليق وبلاش اسئلة رابع جـ والابتدائي أووكي
حقوق الطبع والنشر والتأليف محفووضه للنصراوي اوسكار..
جميع شخصيات الروايه حقيقيين ..
بس القصه ....................................... هي اللي تأليف
وسلامتكم []
رد مع اقتباس
المشاركة الأصلية كتبت بواسطة اوسكار
المفضلات