[align=center]سنتن من السنين يوم انا ولدن شباب
رحت انا وشنقل يم ناسن من الربع بدو(اقصد انهم بيت شعر وبالبر )
وحنا نتقهوا عندهم ونمشى بهالربيع
وحنا نمر من عند غنمهم يمار هذي حدا بناتهم مع الغنم
وهي تعطيني نظره ليمار انا من امس واقعن بعشقه
وانا اتنهد هكا التنهده اللي بغن يتكسرن ضلوعي من كبره
قال شنقل وش عندك ؟
قلت هاه لا ولا شي
وانا اجر هكا الموال اللي يقول
كان الفرح عندي طي محبوس
لقا فرصه تعلق بالسماء وطااااار
وهو يرد علي شنقل بهكا الموال اللي يقول
شيفيدك لو تجر كل المواويل
وشيفيدك لو تردد كل الاشعار
الوكاد اننا رجعنا للرياض
ومن هكا النظره وانا اعاااااااااااااااني ( حلوه اعاني بغيت امغطه حيل هههههههه )
قال شنقل شبيثان وش فيك
من يوم رجعنا من البر وانت منت عاجبني
قلت بالله ابعد عني انت وخشتك تراني مان ناقصك
قال عاد الا تعلمني ( مايخلي شفايتوه )
قلت يابن الحلال تخبر البنت اللي شفناه عند الغنم
قال ايه
قلت شلعت معاليق قلبي
قال يعني عشقته
قلت لا عشقت ابوه
وشرايك بالله يا حكيم زمانك
ايه عشقته
قال بس فيه مشكله
قلت وشهي لعنبو بليسك تسانك ماتجيب الا المشاكل
قال ابوه مايزوجه حضري لو ايش
قلت العن ابوه بس انا ماني حضري انا بدي ومنهم وبهم
قال بالله
ادري ياخي
بس هم عندهم اللي مهو ساكنن بالبر ويعرف للحلال وساكنن بالمدينه مهو بدوي
قلت شنقولي تكفى دبرلي حل
قال شف حنا نبي نسير عليهم وانت اشتغل وسو نفسك شقردي وتسنك رجل
قلت يعني انا ماني رجل يالكمخه
قال الا رجال ونص
اصلا من اشوف زولك هاللي تقل طاولت بلياردو ادري انك رجل
قلت من زين وجهك هاللي تقل غريفة وغدان
ماعليكم من خناقنا متعودين انا وياوه وليا تخانقنا ما سكتنا
المهم رحنا يمهم مرتن ثانيه
واول ماجيناهم شفته رايحتن للوايت مدري وش تبي ( ياقرد حظي تسان ماهي تبي تشيل
شين ثقيل )
وحنا نتعزبهم
وبين اللي يبون يبطون ( معنا شناطنا الكبار )
وابوهم بين عليه انغث
بس حنا مانفتهم ( لزقااااات )
ويوم جت اول ليله جلسنا حنا والابو
قال شنقل فرصتك هذا اول اختبار
ابيك توريه انك تعر تسولف سوالف رجال
قلت ازهلوه
المهم قام يسوالف علينا ابوهم ويسرد علينا
قال يا شباب تعرفون الغاز
قلت ايه شلون مانعرف
وهو يقوم يدربي علينا من هالالغاز
ولا حلينا ولا واحد
قلت طيب انا ابقول لك لغز واتحدى ابوك تحلوه ( متحمس )
قال وشهو ( وبين بنظرتوه يقول الله يقطع الخبول )
قلت فيه شي يمشي على الجدار ويقول ميو واول حرف واو
قال البسه
قلت تعقب
قال القطه
قلت ياخبل اقول لك بحرف الواو
قال وش الحل
قلت ولد البسه
قال ماودك تنخمد وتنام لان عندي باتسر شغل وابيكم تعاونوني
قلت قل والله
قال ليش
قلت انا ودي اعاونك ياعمي
قال مايخالف بكرى من الصبح نبي نشتغل
وحنا ننام
ويوم جاء الفجور ليمار هذا هو تقل وجه ورل
ولوه صياح عند روسنا تقل ديتس
ويوم قمنا وافطرنا وعينا من الله خير
قال يالله يا شباب عندنا غرضان نبي نشيلهن فوق الوايت
وانا انقز انا وشنقل فوق الوايت وهو يعطينا من هالغرضان وحنا نحط فوق الوايت
وانا جايبن حيلي ( انذخ لان العشيقه تراعيلي )
ويوم خلصنا وهو ينزل شنقل من الوايت بسلام
ويوم نزلت انا وهو ينشب ثوبي بالوايت
وهو يغولني
وهو يتجمع الثويب على رقبتي
ليمار ماني لابسن الا شورتن خضر ( حقات المنتخب عام 84 ) ناذخن بوه
ويوم انقطع نفسي وشفت الموت
وهو يقط شنقل ثوبوه ليمار ماعليه الا الهيلاهوب الاصفر ( غادين تقل بريعصي )
وهو يتعلق ويخلص الثوب من الوايت
وليمار انا غادين حوسه
والدموع مالهن والي من الفرحه
وانا اخم شنقل واحبحبوه وهو خامن ( مشهد مؤثر بالمره )
الوكاد عقب ما استرحنا لنا شوين قال ابوهم يالله ياعيال نبي نجز الغنم ( نحلقهن )
قلت عمي انت تستهبل ؟!
قال ليه
قلت ياخي خلنا نرتاح شوي
قال صار لكم ربع ساعه جالسين يعني لهالحين ما ارتحتو
قلت ليه نلعب مباراة انت ووجهك راحه ربع ساعه
اصلا انا من شفت وجهك ليمار هذا عمر المهنا
قال انتم تبون تشتغلون ولا شلون
قال شنقل يالخبل قم
وحنا نطبدز معوه
ليمار جامعينن الغنم اللي يبوننا نجزه بشبكن عند البيت
ليمار عز الطلب ( علشان النذخه )
وهو يعطي كل واحدن مننا سكين
قال يالله جزوا بهالسكاكين
والله وانا اقوم اسن السكين واراعي للعشيقه ليما غدالك حادن بالمره
وانا امسك اول نعجه ابي اجزه وانا اجضعه
وطبعا لهالحين وانا اراعي للعشيقه
وانا اقوم اجز
ويوم خذيت شوين ليمار اخوهن الصغير ( ياعلوه مايربح ) يصيح طول حسوه
يبااااااه الشبث شق بطن النعجه
الشبث ينذخ عند فلااااااااااااااااانه
اثريني شقيت بطن النعجه وانا مادري
وحنا نهرب انا وشنقل ( تقل احتياط غانا فرحانين بهدف )
وعلمنا بهم هكا الساعه
واسف على الاطاه
وتقلدوا تحيتي
[/align]
رد مع اقتباس
المشاركة الأصلية كتبت بواسطة الشبث
المفضلات