((مواقف طفوليه)) مرّ بها اعضاء المضايف !!!!!

[الـمـحـروووم]

على طاري المواقف


مره من المرات وأنا بصف رابع

قال لي أبوي رح ناد جارنا للقهوة
ورحت يمهم
وحصلت زر الجرس مكسور
وجلست أفكر وشلون أدق الجرس
خايف من لا يصعقن الكهرباء
وأنا أفكر شفت مسمار طايح بالقاع
وأنا أخذ المسمار وأحطه بالجرس
وما وعيت إلا جارنا يصب على رأسي ماء
زود الطين بله


ــــــــــــــــــــــــــــــــــــــــ ــــــــــــــــــ


مره جاء واحد موذي يسأل عن عمي
وقلت لعمي فلان عند الباب يسأل عنك
قال قله نايم أو ماهو موجود


جيت عنده وقلت عمي يقول إنه
نايم أو ماهو موجود

[تعاليل]

[align=center]أبوووووو سيف ...
الله يعطيك العافيه ...
يـــــــــــــــــا أنا متت من الضحك... على سالفتك
هههههههههههههههه متـــسحووووووت ومدبوب ..








تعاليل[/align]

[تعاليل]

[align=center][align=center]أمممممممممممممم

ســــــــــــوالفي كثيره يومني صغيره .. وصراحه
كنت حيل قشـــــــــــــــراء ... بس السبب
كان إننا كنا ثلاث خوات بنات ... وباقي عيال الحاره كلهم صبيان
فتقدرون تقولون .. إننا أخذنا طبع العيال .. بطفولتنا << للحين بعد

المهم بلا طول سيره ... مره من المرات
كنــــــــا نلعب كره قدم .... <<< الأخت كانت الهداف حق الفريق
وكان بالفريق اللي انا كبتنوه .. معانا لنا ولد بليه .. دب(ن) ياكبروه ..

يالله يركض كنا نحطوه الحارس ... مابوه حيل يركض ..
المهم أخبر هاك اللعبه بالذات كنا قايلين الفريق اللي يخسر ..
يشتري أيسكريم أبو نص للفريق الثاني <<< شف الرهان وشو بس

ولعبــــــــــــنا طبعاً بدون حــــــــــكم .. على كيفنا ..
وآخـــــــر شئ ومهو لك يجي الفريق الثاني ويسجلون علينا هدف
وأنا ازعل .... وأروح للبيت ... وأشلع هـــــــوز دبة الغــاز ...
تعرفونوه ... اللي يجي ساعات ازرق وساعات حمر .. قوي ويوجع
وانا أفزع العيال اللي كانو معاي بالفريق ... وهم يمسكون هاك الدب
اللي كان سبب بخسارتنا .. وهم يسدحونوه ... واظربوه ظرب .. لين
ما أودعت جلدوه أزرق ... والله إني كفرت بوه .. <<< كنت منقهره حيل

والله وهو يملص ويروح يعلم أخوانوه الكبار .. وانا اشلع للبيت ..
واسبوع ما طلعت من البيت خايفتن منهم ... بس أفتح الباب أويق منوه
ويا شفت حدى أخوانوه .. اتسفت بالبيت واسكر ..

الحين يا صدفت وشفت هالولد هذا .. امووووووت من الضحك
اقووووووووول يا قوووم يا بعض الناس صايرين رجاجيل .. وانا اللي
كفختهم لين اودعت جلدهم ازرق ...

تعاليل[/align][/align]

[عيون السروق]

[align=center]مشكوره السطامه على هالموضوع ،،


ياعيال ابي اقولكم سالفه بس ماهو تمسكونه علي ،،



سنتن من هاك السنين كان عندنا مناسبه كبيره ،،


وكان عندنا ناسن اجناب ،، وتخبرون الوغدان كانوا داخل عند الحريم عشان مايفضحوننا ،،


عاد انا كنت اكبرهم هاك الحين ،، وتون لابسن شماغ يعني بالحتسي غادين رجل ،،


الوكاد وهو يجينن ابوي وقال ولدي ياسرقان قلت ياعونك يايووووبه ،،


(( متأثر بمسلسل جواهر ))


قال خلك عند وجار النار ولحد يجي الدلال من الوغدان لاينثرون الدلال ،، قلت ابشر يووووووووبه


مالكم بالطويله وانا اقعد عند الدلال احرسهن مثل مايحرس الطير البعارين ((( انا قايل انك من ربع

الشيخ يووووبه )) وشو طير ويحرس البعارين ،،


وانا اقول انا ليه ما اقلط الدلال يم النار غديهن يصرن حارات ولايبردن وهاك الحين علينا شمالية

تكصم الوجه ،،


عاد انا يعني تسبير وادير الامور بحنكه وانا امسك الملقاط ابي احرك بوه الدلال وانا انثر الدله الاولى

وهي تخبط اللي وراه واللي وراه وهي تغديلكم تقل بلنا محرقه يادافع البلا من كثر الدخنه ،،

وهم يشوفنن اخواني الكبار وانا احط رجلي وانا اهرب (( لكن مالي بالطيب نصيب )) قضبونن وهم

يدبونن :629r: ويمردغونن :507r: وانا ابتسي واعيط لكن ماكسرت خاطرهم ،،

الوكاد وهم عاد يدمدمون السالفه ويصلحون لهم قهوه ،، وابوي ماقال لي شين ،، ويوم راحوا

الرجال وهو يصوت لي ابوي ،، (( عاد هنيه ماقلت لوه يوووووبه )) لاني داري انوه يبي يدبن

وهو يخسخسن بالكلام (( ليته دابن ولا قال لي هالكلام )) ،،

وهو يقول والله ان شفتك عند الرجال لا اسوي واسوي ،،

اندزلع عند امك لين ننظر في امرك (( يعني اما تغدي رجل والا مالك مقعاد عندي ))


ومن يومه وانا اتعلم ولله الحمد نجحت بالاختبار عند ابوي ،، ورديت وقلت لوه سم

يووووووبه ،،



استروا ماواجهتوا ،،




ودمتم،،،،،،،،،،،،[/align]

[روح أبـــوهــــا]

[align=center]صبااااااااااااح الخير

اولا مشكوووووووووره السطامه على هالموضوع اللي اروع من رائع

ومن ينسى الطفوله وشقاوتها يازينها والله ليتها ترجع كان لعبت أكثر من اللي لعبته


انا داايم يحظرني هالموقف اذا اجتمعت مع صاحبته " بنيت عمي " وكل ماشفتها والا تعكر مزاجها قلتها لها تذكرين ********** عااد يتغير الجو لاخر وناسه



ودكم تعرفون وش هاللي مشفر بقولكم بس بليز بدون ضحك تراني


*الابطال انا وبنت عمي
*الحدث ديرتنا في حايل وبالتحديد مزرعت عمي
*الزمن وقت ربيع وامطار
*عمر الابطال مايتعدون الخمس سنين
*السالفه من اولها
انا وبنت عمي نحب بس ندووج بهالمزرعه يوم حنا وغادين ونحب الارض وريحت المزرعه بعد المطر
عاد طرت على بالنا فكره يوم جينا نبي ننام
اشتهنا ريحت التراب قلنا بتالي الليل من يبي يروح المزرعه يشم ريحته
وش رايتس " مدري من اللي قالها والله بس الاكيد وحده من هالثنين "
بكرا الضحى نروح المزرعه نأكل ترااب
لا تستغربوون ولا تتعجبوون بقولكم الدوافع والاسباب
اولا نحب ريحت التراب
وثانيا نشووف هالناس يشربون دزروه من الشيخ فيها تراب
وثالثا سامعات معلومه تقول أننا مخلوقين من تراب <<العقل الباطني تبعي وتبعها اذا عادي نأكل ترااب
اتمنى تكوونون فهتموا الاسباب بالعقل الوغداني
المهم نمنا وصحينا من الصبح وبعد الفطور رحنا المزرعه كما هو مخطط له
ومعنا عدتنا اللي هي صحن وملعقين
ودخلنا المزرعه ورحنا مو لحي الله تراب لازم ماركه
رحنا للتراب اللي حول النعناع واخذنا الكميه اللي تكفينا وبعدها رحنا يم والله مدري هو بير مدر ي برتسه المهم انه الماء اللي يسقون منه المزرعه
وحطينا على ترابنا ماء صااااااااااااااااااااااااار شكله رووعه
أحمر وريحته تهبل
وهااااتي يأكل خلصنا الصحن كلوووووووووووووووووووه <<عوافي على تسبودنا

الحمد لله ماصاربنا حصوى للحين عايشاات وبخير وستين نعمه
بس والله مره وحده ولا عدنااها

هاه وش رايكم ماكنا نفكر قبل لا نخطط لاي شي <<<الحمد لله من صغرها عاقله
أتمنى سويلفتي عجبتكم واتكوون وجبه خفيفه على قلوبكم مثل ترابنا

وتحيااتي للجميع
روح أبـــوهــــا[/align]

[عبدالعزيز]

^
^
لله في خلقه شؤون !! ....... تراب عاد ؟؟!! ومن زود التلذذ ياكلنه بملاعق بعد ياعينييييييييييي .... الله يعين عيالكن عليكن انتي وبنت عمتس مواريكن باينة من وانتن صغار


وهذا ياطويلين العمر والبقا وخالد السلامة وسلامة العبدالله ومن يسمع جارنا هكا الحين "قبل عشرين سنة بالظبط" ينقال له ابوبدر ..
ابوبدر هذا فات مع بابنا العصر برمضان الا على طلعة بابي .. وهم يتسالمون بوسط الشارع وكلمه بكلمه والا تماسكو باليدين وكلٍ يبي يطرح الثاني (يتمازحون) ...
أخيكم في الله اللي هو انا بهاللحضة ودزت مع الباب ولا ابوي والجار متماسكين يتخانقون وهي ترى النور ولأول مرة شياطيني عليه وانا عند الباب واقول "وخررررررررر عن ابووووووووووي وخررررر" والا ماش الرجال معطينن الخامس وانا اقعد افحط بمكاني واديور طبلوني للبيت ادور شي.ن اغدينن الزخوه بوه .. وهي تطيح عيني على المكنسة الصغيرة اليدوية
وانكس لمهم والالهالحين متماسكين ومدنقين ولاتطيح عيني الا على صلجة ابوبدر وانا اطبز عليهم بغفلة.ن منهم واصنّوه والا هو يجعر من الوجع
وخذ ياتلزيخ من الشايب لي "هذا وانا فازع.ن له" وابوبدر يحلف عليه ويقول والله ماتلمسه ومالبلا بابوي ولا ابوبدر البلا والله يوم صلينا المغرب بالمسجد وطلعت منوه والا هذي سرية ابوبدر المتكونه من عياله الاربعة يتحرونن على احر من الجمر براس الشارع ودقونن هكا الدقة اللي ماانساه لليوم .

على الله تفهمون المفردات قبل ماتعجبكم السالفة

[شموخ]

صراحه مواقف تضحك وخاصة موقف روح ابوها وعلى قولت عزوز من زود التلذذ بملاعق

عزوز
فهمنا المفردات واعجبنا موقفك عاد برمضان هذا والشياطين مصفده عند البشر الظاهر عندك ماتصفدت زين اللي ماانصرع عليكم الشويب من الجوع والضربه اللي جته

تحياتي للجميع
شموخ

[روح أبـــوهــــا]

[align=center]

^
^
لله في خلقه شؤون !! ....... تراب عاد ؟؟!! ومن زود التلذذ ياكلنه بملاعق بعد ياعينييييييييييي .... الله يعين عيالكن عليكن انتي وبنت عمتس مواريكن باينة من وانتن صغار

أنت بس جربه والله الا تعوده وتصير وجبتك المفضله



عين الله خير ابوك من فزعتك لوه

الحمد لله طلعتك بالسلامه بأقل الخساير [/align]

[بـنـت النـور]

[align=center]يعطيكم العافيه

بس موقف روح ابوها هههههه صحون وملاعق

يعطيتس العافيه ياروح ابوها

واكيد عندتس مواقف اكثر

عزووووز الحمدلله على سلامه ابوبدر

ماقصروا عياله خذو بثارهم منك





[/align]