متى أخر مره أخذت كمبيوترك للبنشري؟؟؟

**مناكد** · 24-07-2005 15:53

السلام عليكم ورحمة الله وبركاته...

العنوان واضح جداً...

متى أخر مره أخذت كمبيوترك للبنشري؟؟؟

ايه اسمعك تقول انجن!!!

لا ما إنجنيت!!!

من الأفضل ان الواحد يأخذ كمبيوتره للبنشري مره بالشهر او الشهرين!!!

ليه يغير زيته او يرقعه؟؟؟

لا...لا...لا... لاهذي ولاهذيتس!!!

أجل ليش؟؟؟

علشان ينظفه بالهواء المضغوط...

البارحه انا خذيت بليتي للبنشري اللي بالحاره...ويوم وقفت وشافن فتحت الشنطه وهو يجي يحسب ان عندي كفر مبنشر...

ويوم شاف الكمبيوتر!!! قال ايش هذا...ماتشتهي نفعل له؟؟؟

هاه!!!

قلت حط له رقعه تيوبليس!!!

اقول انت يابو فلنشه (((معيارته لأنه يسمي فلتر الزيت فلنشه)))...عطن مسدس الهواء وانثبر على كرسيك!!!

وهو يجيب المسدس واركبه على اللي (((الهوز))) وافتح غطاء الجهاز وأنفخه...

الله أكبر ياغبار طلع منه...تقول فلتر هوا حق تريله ماهو كمبيوتر...

وأغطيه وعلى البيت وأشغله الا ويتغير شغله ويصير أفضل من الأول بواجد والسبب هالغبار اللي باني على المذربورد والمراوح لأنه السبب الرئيس بإرتفاع درجة الحراره داخل الصندوق بالكامل...وهذا كافي انه يضعف الجهاز ويقلل الأداء...

(جهازي الذاكره 640 م.ب. وصاير كأنه 64 م.ب. من هالغبار...

فجربوا ولن تخسروا...

وهالموضوع طرى علي يوم شفت موضوع الكونتيسه عن الفاره ولوحة المفاتيح...

والسلام.

.

**منيره** · 24-07-2005 20:32

قبل شهر ونص مفرمته الجهاز وكل شئ تمام بس اول ما اشغله يطلع صوت دباب خخخخخخخخخخخخخ اثره من الغبار خاصه اللي على المراوح ورجعته للمهندس وفكه ونظفه لي وصار تمام واختفى الصوت

يسلمووووووووووووووووو مناكد

خيتك الكونتيسه منيره

**ابن جشعم** · 24-07-2005 23:08

طيّب يامناتسد وليه ماتفك الكمبيوتر قطعه قطعه وهي سهله..

وتقوم بتنظيفه على رواقه وبريش النعام

ياخيي سالفه لي الهوى ماهي داخله راسي الا تسان اني

عايف الكمبيوتر ولا همّن ان خرب..

بجرّب وشوف عقبين ماهو الحين

**مناكد** · 24-07-2005 23:36

ومن قال يسلم...خيتي الكونتيسه...

.

**احمد الهاجرى** · 24-07-2005 23:38

[align=center]مناتسد

مابقى الا نوديه لراعي الرديترات

لانه يحتر ويبقي تغير رديتر

اول ماشفت الموضوع قلت الشيخ مناتسد جرالوه بلا

معادوه بمناتسد الى نعرفوه

يمكن اثر عليه سرحان يومنوه طلع اجازه

المسامح كريم يابو ..................

تسلم لاتنسا البطاقه بس[/align]

**مناكد** · 24-07-2005 23:49

المشاركة الأصلية كتبت بواسطة ابن جشعم

طيّب يامناتسد وليه ماتفك الكمبيوتر قطعه قطعه وهي سهله..

سهله على اللي ماعنده شغل ويدور الشغل

وتقوم بتنظيفه على رواقه وبريش النعام

من جد انت رايق...اقول ليه ماتاخذه معك للشغل وتتسلى عليه طول ليلك

ياخيي سالفه لي الهوى ماهي داخله راسي الا تسان اني

عايف الكمبيوتر ولا همّن ان خرب..

الهوا من بعيد لبعيد وهو أنظف وأضمن من ان تفك كل قطعه لحاله...وتخلخل البورتز...

بعدين هذا هوا ماهو هايدروواش أو هايدروجتينج...

بجرّب وشوف عقبين ماهو الحين

وهو ليه ماتجرب هالحين...وتشوف الفرق...

ابن جشعم...

لو يحصل انسترومنت اير تسان ياسلام...

شكراً لك على المرور...

.

**ابن جشعم** · 25-07-2005 00:07

^
^
^
متأفـــر بالشغل ياداك

تسلم على إسدال النصائح

تشاااااااااااااااو

**سلطان الشمري** · 25-07-2005 01:53

[align=center]مناشد ..

ياخي والله هاكاليوم رحت بالمطشي للبتاع بتاع البتاع

ابي اسوي له فورمات ..

يوم فتحه وصاحب المحل اعرفه منالربع

<<يصلح بلاش

وهو يموت ضحك قال مطشيك انت .. تروح عليه مشاوير صحراء وردميه ..

نعن بليسك لو انت تروح عليه من تربه للينه (قبل الزفلت) كانماصار هاللون

والله تفشلت يوم قاله ..ادور تقيعه قلت هذا غبار الوكاله

الوكاد نصحن اني انظفوه عن البنشرجي لكن ولله الحكمه اني تكاسلت بس ولو ولو النيه موجوده

شكريات [/align]

**شام** · 25-07-2005 02:16

السلم عليكم :
قبل ثلاثة أسابيع أخذت كمبيوتري لتبديل اللوحة الأم M.b لأنها احترقت بسبب الكهرباء ولكن لما فتح الرجل الكمبيوتر يالطيف ... منظر مخيف الغبار قد غطى كل القطع حتى ( البراغي ) .
سأل الرجل ماهذا .
قلت له لا اعرف .
تخوفاً من أن يأخذ هني فكرة غلط .
قال الغبار قتل الكمبيوتر من داخله .
قلت له ومن أين يأتي الغبار والكمبيوتر له غطاءه المثبت جيداً .
قال الرجل يجب كل فترة أن يتم تنظيف الجهاز من الداخل .
قلت له أنا انظفه من الخارج آلا يكفي .
قال لا ..بل يجب من الداخل لأن الغبار يساعد على تلف ( الجمبرات ) ما سألته يومها ( جمبرات ) ماذا تعني ... لأنه لا يعنيني والآن أصبحت أنظفه لوحدي ... وبالفعل فرقت الأمور ...
الموضوع مفيد وهادف .................ز يسلمووووووووووووووووا أخي