واحلولات الهندي جار (ن) لي ....

**تعاليل** · 20-07-2005 10:58

بسم الله الرحمن الرحيم ..

قبل ما أقول لكم القصه ...
بقول لكم الأحداث اللي صارت بسبب هالقصه .. هذا البارح نشبت بحلق أمي وأنواع التودد والتلطف ( يايمه الله يخليتس سولفي لي قصه من قصصكم زمان .. ابي انزله بالمنتدى .. الله يخليتس يا ميمتي ) ...

وتسان تعطيني أمي هاك النظره ..
وقالت : " أنتي وش تقولين .. ووشو المنتدى "
قلت له " أنتي الحين لما تناديني .... وش اقولتس انا .. ما أقول ... هاه يمه انا هنا جالسه على النت "
قالت لي " أيه النت .. أعرفوه <<<< مثقفه أمي فديتهــــــــا
قلت لها " وصلنا خير هذا المنتدى ببطن النت ... " وانا اجلس افهم فيها وش يعني المنتدى
قالت " يووووووووووه عاد .. لا تخوثين راسي وش تبين الحين "
قلت " ابي قصه حلووووه انزلها بالمنتدى "
قالت " الحين بقولتس قصه حلوه من اللي يلهوون بهن الوغدان قبل النوم << تبي تخوفن أمي علشان أخمد ..وباتسر بخير .. ابي اتفطن لتس على قصه تسووووى .. قلت خير إن شاء الله

وبــــدأت بســــــرد الحكايه <<<<< لاحظو ســــرد

صــــــــــلو على النبي ::

" هذا يا طويلين العمر ... من أول على أيام بيوت الشعر .. وكلن يسكن بشنق خويوه .. لو تقول لوغدك أنزح وراك سمعك قصيرك .. <<< قصيرك يعني جارك لغير المتحدثين بلهجتي ..

المهم .. فيه رجال ساكن لوه ببيت شعر مع حرمتوه ووغدهم ابو ثلاث أو أربع شهور ... وهاك اليوم قال الرجال لحرمتوه جهزي لي زوادتي أبي أسير على لي عرب كلها يوم وليله وانا راجع ... قالت الحرمه وتخليني انا وهالوغد ماعندنا أحد .. قال لا ماعليتس أوصي جارنا عليتس وأبد ماني مبطي ... جارهم هذا اسموووه ( هــــندي) ...
المهم صرت لوه زوادتوه .. وتوكل على الله ... ويوم جاء العصير .. جاء هندي يطل على قصيرتوه .. يمكن تبي لها شين ولا حاجه .. قالت ياعلك سالم مانبي شين ... قال "ياخييه لا تستحين تريني مثل أخوتس ..يابغيتي اي حاجه بس قولي " ياهندي" وانا عندتس " ......

ويوم جاء الليل ... وهي تضفضف بيته وتحط وغده بحظنه ... وتبي تنام ... وشووووين ...:confused:

وهي تسمع قرقعه بشنق البيت ... ونفس آدمي ... تقل مغمـــووت .. والدنيا ليل وخرمس ماتشوف راحه يدك ... والله وهي تقوم وتويق من له فتق بالرواق .. وش تشووووووووووف ...

وهي تشوف لك هاك الحايف .... <<<< لغير المتحدثين بلهجتي الحايف يعني الحرامي
بس يخرع .. عيوووونوه ناطاتن حمر .... وشواربوه مطافيش ... وملتغف وراء الرواق ..

والله وهي تفكر .. قالت الحين لو ابي ازعج بالصوت .. يذبحن هالبليه ويهج قبل ما يجيني أحد ينقذن .. بس وش اسوي .. والله وهي تستدني وغــــده .. وهي تقرصوه هاك القرصه اللي فرخ الوغيد فرخه يادافع البلاء <<< فرخ الوغيد يعني بكى الطفل بكائاً شديداً من الألم ...
وهي تســـتقعد وتحطوه بحظنه .. وتسوي روحه كأنه قعدت من بكاء الوغد .. وهي تقوم تناغي الوغيد
(( لا يايمه ليه تبكي ليه .... أشششش أششش )) وهي تحطوه بحظنه وتقوم تغني لوه هالأغنيه بصوت عالي وتدهده بالوغيد يعني تبي تنوموه ... << أنتبهو لكلمات الأغنيه

[align=center]يا جاري ياهندي ...... تعال وشوف وش عندي
شواربوه مطافيش ..... وعيونوه خرعني ..
يا جاري ياهندي ..... تعال وشوف وش عندي
شواربوه مطافيش ... وعيونوه خرعني ..[/align]

وتغني بعلو صوته ... وهو يسمعه جاره (هنــــدي) والله وهو يمعط روحوه ويجيك فزاع .. مير هو معنط بحلق الحايف ... وأنقذ جارتوه .. ..
شفـــــــــــتو شلون ذكاء الحـــــــرمه ... وفطنت الجار .. اللي يوم سمع جارتوه تغني .. فهم وش مقصده .. مو جيران هالوقت .. تروح لعندهم تسألهم حاجه .. يسوون حالهم مهم فاهمين ..

خيـــــــر وش تبون لاحقيني تحت .... خلصت القصه ... .. ..

بس هاه ... أبيكم تعلموني وش رايكم بالقصه .. علشان أقول لأمي .. هي جازت لكم ولا لا ..

الـــــــــــــراوي : تعاليل

**راعي الوقيد** · 20-07-2005 17:12

تسلميــــــــــــن يا تعاليــــــــل وتسسسسسسسلم امتــــــس

وعساهـ ذخر لتـــــــــس

اي بالله خوووووش سالفئ

وعلميه بعــــــــــد ان سالفتــه مميزة

تحيتــــــي لتـــــــس

والسلااااااااااام ...
..

**تعاليل** · 21-07-2005 07:18

[align=center]خيوووووو ... راعي الوقيــــــــــد

مـــــجرد مرورك .... على الموضوع يكفي
كيف عاد لو صار بالدعوى ... تميـــــــــــــز ....

شـــــــــــــــــــــكراً على التشجيع ...

تعاليل[/align]

**شريف روما** · 21-07-2005 07:42

ههههههههههههههههه
كفو والله يالهندي (( يعني هندي ))
الله يعطيج العافية على هالسويلفة الطيبة
سلمي على امج كثير السلام عسى الله يخليها
وبانتظار جديد الوالده ومن هالسوالف الحلوووووه
ارجو تثبيت الموضوع ههههههههه <<< قوية هاااا
..
..
شكرا مرة ثانية على موضوعج المميز

**خالد الشمري** · 21-07-2005 08:11

تسلمين ويعطيت العافيه

**المطنوخ** · 21-07-2005 10:04

بعيت انام ياتعاليل

اللله وشو هالزين

قولي لامتس عسى الله يخليها لتس تريها محتكرة لمضايف شمر

مو باتسر نلقاها بمنتدى مكسيكي تبيع قصصها

تسلمين وتسلم الوالده

دمتي بكل ود

**الصيرمي** · 21-07-2005 11:46

ماشاء الله من اولها مميز

واحنا نكررررررررررررف كرف ال.. ما شمينا ريحه التميز هههههههههه

الف مبروك التميز ياتعاليل تستاهلين

بصراحه موضوع مميز وغير شكل

تحياتي