ظليّل بن شعلان وشمر

[شموخ]

تسلم ياخوى على هالقصه بس لو فيها قصيده كان

يعطيك العافيه انت وهالشويب اللي يكح

تحياتى
شموخ

[شريف روما]

يعطيك العافية على هالقصه الطيبة

بس لي تعليق
الشي اللي مايدخل العقل شلون العنزي يلحق الشمري وياخذ بنتوه ويتزوجها غصبن عنوه وعن عيالوه!!!!!
واذا ابوها راضي اكيد عيال عمها وجماعتها مايرضون
هذا رايي
..
وشكراااا

[عامر الشلاقي]

[align=center]يالله حيهم
"والله تلولسنا بهالعروس وبيالله انطلقنا"

هذي من السوالف المثمنه والرائعه وهي مغازي الشيخ ظليل بن شعلان على شمر
انقلها كما سمعتها من احد الشيبان

يقول :

هذا فيه واحدن اسمه حمدان من الشلقان من سنجاره من شمر وله عيال صغار وبنت وحده
وهي الكبيره واسمه "عدينه"
وهذي عدينه حسب مايقولون مزيونه "موتن حمر"
يمار انت ياحمدان مقاصرن الروله وعند ظليل بن شعلان وديارهم حول سكاكا وعلى اكا الديار
الوكاد ان ظليل عشق عدينه وبغاه على سنةالله ورسوله
حمدان دري بالسالفه يامار صحيح ان ظليل رجل كريم وشيخ مار حمدان ودوه يجوز بنته
واحدن شمري ولا ودوه بالاجنبي
وهو يجي اكا اليوم قال ياعيالي شدينا قالوا وين يبه قال لشمر >>> شطحه صغيره

"اليامار اكا السنه الديار محل والربيع مقلول واكثر شمر متجمعه حول بعضهم ونزلهم واحد
هذا يامنك جيت من الشمال ووجهك حروة حايل ودياره اول ماتطب على نزل سنجاره
وتجيك عقبه بيوت عبده والاسلم ماهي بعيده وعلى هالون
متجمعين حول المنطقه الي به الربيع"

>>> عدنا

الوكاد يوم جاء الصبح وهو يشدّ حمدان وعياله والظاهر ان طليل مادري
ماامداهم ينتصفون من الطريق يامار هذي الخياله لاحقتهم
وهو ياخذ الدربيل حمدان ويدربل يامار هذا ظليل ومعه "المليّك" الي بي يجوزهم
ومعه فريس من الروله
قال حمدان عيالي هذا ظليل لحقنا ويبي اختكم وانا والله ماهربن الا اني مابي تزويجوه
وهذا هو جانا حنا نجوزوه ولا بكم حيل تهوشون دون اختكم
يمار حمدان شايب هو وعياله الصغار وبلشوا
قالت عدينه: يبه مابيكم تذبحون انت واخواني بسبتي مار ياوصلنا جوزن ياوه

كح كح كح كح >>>> هذ الشايب الي يسولف يكح

الوكاد ماخذوا شوي الا وظليل لاحقهم وهم يجوزونه
وظليل وعدينه ينكسون للروله وحمدان بوجهوه لشمر
مرت السنيين يمار ظليل مانسي هربت حمدان ونوى يرده لوه
قال ياعدينه قالت هاه قال ولمي الزهاب قالت وش عندك
قال انه الله اشى الا اخلي نياق ابوتس تبرتس عندتس>>>يعني يبي يغزيهم
قالت ياظليل يوم ابوي عندك وانت تقدر عليه وهاللحين شمر كله من دونوه قال ولمي الزهاب

وهو يمشي يامار دليلتوه بالمغزى "شريف بن خنجر"
وهذ شريف من الفلته من الروله والفلته بالاصل يرجعون للغفيله وهم معترفين بهالشي
لكنهم من جدهم وهم يمشون مع الروله

قال شريف بن خنجر وين مغزاك ياظليل قال ظليل الى بوجهي ابي اخذه وهم يمشون
وعندك وعندك يمار توجهو لسنجاره
قال شريف ياظليل اشوف مغزاك على سنجاره
قال ظليل اي نعم نبي سنجاره والي قريب من شمر
قال شريف ياظليل انت تدري ان اول من يواجهك من بيوت سنجاره بيوت الغفيله
ولاني والله غازي بك على ربعي
قال ظليل انا غزاي على سنجاره وانت بكيفك
وهو يحرف الفرس انت ياشريف ويتبعونه ربعه وينكفون عن الغزو
يوم طبق ظليل على سنجاره اليامار سنجاره تدري بوه وهم يتكامشون
وعندك وعندك وهو ينكسر ظليل والروله وتوخذ فرسه وياخذونهم سنجاره باكا المغزى اخذهٍ جيده
وهو ينكس ظليل لعدينه مفلس

>>>> اوجعني اصابعي تليشت

مرت الشهور وهو يجي ظليل يم عدينه قال ياعدينه ولمي الزهاب قالت وش عندك بعد
قال ان الله اشى الا اخلي نياق ابوتس تبرتس عندتس قالت اخاف مثل مغزاك الاول
قال ولمي الزهاب بس
وهو يغزاهم هالمره مادريوا شمر يوم طبق يامار هذا حلال اكثر سنجاره وهو ياخذوه ويقفي
وهو يجي على اثره "غدير المورك" من الجرذان من الغفيله
يامار بس المراح وهو يلحقهم يحسبن عددهم قليل
يوم نط الجذيبه يامار هالخيول يامار الروله على كبة ابوه يامارماهو حولهم وهو يتذكر ان هناك عربان من شمر على طريق ظليل وهو يفزع يبي ينذرهم
وهو يبرالهم ويقطع شعيب الشيحيه يامار هذي الزميل وشيخهم بايق بن ثنيان
قال يابايق افزع الحلال وخذ
قال بايق منهو الي خذاه قال غدير ظليل بن شعلان
قال بايق على طريقه احد من شمر
قال عدير على طريقه خزعل المعكلي وعربان من الغفيله ومن سنجاره ووراهم بيوت من عبده
قال بايق اينا اقرب لهم حنا ولا هو
قال غدير حنا اقرب قال بايق افزع لهم وانذرهم وهذا حنا على اثرك
يوم وصلوا هناك وعلموا شمر الي واجهوا وهم يتجمعون يتحرون ظليل يامار ماجاهم
قالوا شمر ظليل ماهو جاينا واكتفى بالي هو خذا مار خلونا نلحقه
يامار معاهم خزعل>>> وخزعل من المعاكله من الجرذان من الغفيله وهو عقيد قوم ورجل شجاع
لكن اكثر ماشتهر بوه الدلاله هو دليلة عبيد بن رشيد يوم هو يغزي على بن مرشد من شيوخ عنزه على حدود العراق

قال خزعل ياغدير يوم ظليل يتوجه لربعه وشو ممشاوه
قال غدير مطلع شمس قال خزعل مشينا وطول ماهم بالطريق نوبن يقول خزعل استريحوا ونوبن يقول شدوا على هالحاله
يوم جاء من باكر قال خزعل استريحوا ياشمر وتدفوا ترو يامن طلعة الشمس ونطيتوا راس اكا الحزم
تبون تواجهون انتم وياهم يوم جاء من باكر ونطوا الحزم يامار على قولته وهم يتكامشون هم والروله
وهاته واجدع عباته ....وهاته واجدع عباته....وهاته واجدع عباته
وهم ينكسرون الروله وينكسر ظليل وتوخذ فرسه مرتن ثانيه من حدره وهو ينحاش ظليل حافي
ولامعوه الا عبدوه
يوم جاء بنص هالطريق وهن يجلسن رجلي ظليل يصبن دم وهو يشيله العبد على ظهره
ياما نزلوه عند عدينه
يوم شافت عدينه حالته وهي تجلس تلولش قالت: عفيه بني عمي
" عاد يقولون انه طلقه عقب هالكلمه والله اعلم"[/align]

الغالي مشعل الغفيلي
هذه القصة من القصص الجميله وتشكر على وضعها في المنتدى وارجو منك ان تسمح لي بايضاح بعض الامور التي ارى عدم دقتها في سرد القصه وحيث انني احد احفاد صاحب القصه لذا من واجبي ان اوضح لك القصة الحقيقيه لظليل بن شعلان وزواجه من الشلاقية
البنت اسمها ضعينه وليست عدينه
الاب اسمه شكر ابن ودعان الشلاقي
حمدان هو الشاعر حمدان ابن ودعان وهو اخو ضعينه وابن لشكر ابن ودعان
والقصه كالتالي

شكر ابن ودعان الشلاقي له من الابناء عشرة وهم
حباس وحمود وحمدان ومحمد وغربي ((وهو جدي )) وحماد وحواس وسراي ومحارب ورمضان وكلهم فرسان ولهم قصص بطولية مع جماعتهم الشلقان ولهم اخت واحده واسمها ضعينه ورحل شكر وابنائه للبحث عن المرعى وكانوا اولاده كبار وهذه من الاسباب التي جعلته لايخاف الرحيل بمفرده وليسوا صغار كما ذكرت فاول رحلته مكث عند الهذال قرابه السنه ثم رحل للغربية وتجاور مع الشيخ عضيب ابن مجول الشعلان وهو والد ضليل وشلاش الشعلان ومكث عندهم مدة طويله وقد خطب الشيخ عضيب لابنه ظليل من شكر وتعذر منه عذر لم يقتنع به ابن شعلان وبعد ان نوى ابن شعلان الرحيل للشمال هو ومن معه ومعهم شكر لاحظ ان شكر انحرف عنهم متجها لديار جماعته شمر وعرف انه لايريد ان يزوجه وتركه الا ان نزل في احد الاماكن وتبعه ومعه جاهه من ربعه وطلبها من شكر
وقال له : ادري ياشكر اذا جيت شمر مانت مجوزها لنا وحنا نبي قربك
وقال له شكر والله لوهي ذبيحه ماعشتك واعطاها لابن الشيخ عضيب او عضوب كما ينادونه وفي ذلك الوقت ليس للمرأة ولاحتى اخوانها راي بوجود كبيرهم وهو والدها
ورجعت مع زوجها ومكثت عندهم وشكر عاد لجماعته ولو كانت بالقوة لم يتركها شمر دون ان يعيدونها لوالدها بعد ان وصلهم .
وكما ذكرت ظليل اراد غزو شمر وقال له وهو يتسامر معها بالليل بكره ياضعينه راح اخليك تشربين من لبن نياق اهلك وضحكت عليه وقالت
ان غزيتهم فهذا سلم العرب لكن والله انا هاقيه انك ماترجع اما ان يقتلونك او ياخذون فروتك
وقال باكر تشوفين وبالفعل انكسر واخذت منه الفروه وعاد مع العبد يحمله مرات ومرات يمشي معه حيث ان ارجله تورمت من المشي وكانت المعركه بالزقما((منطقه حول زهوة واليديه تابعه للعويقيله وسميت الزقما منذ ذلك الحين لان الجيشين كما يقول الشيبان تزاقموا في ذلك المكان ))وبعدعودة الشيخ مهزوماً قالت له تسخر منه وفرحه بانتصار اهلها عليه ولان احساسها صدق فيما قالته له ((وكانت واضعه قدمه في الماء والملح))
ياحلو طعم لبن نياق اهلي ...
قال ضاحكاً والله جتلك على كيفك ياضعينه ...
ولم يطلقها بالعكس جاب منها بنت وبعد وفاته تزوجت اخوه شلاش وجابت منه بنت وبناتها وحده ام للشيخ محير ابن جندل يسكن القريات والثانية ام للشيخ فايز الشعلان ويسكنون عرعر وبيننا وبينهم مواصل واتصالات حتى وقتنا الحاضر
اخي الغالي مشعل المعكلي انت ذكرت القصه بشكل طريف وممتع واشكرك على ذلك وحبيت ان اوضح لك امور تخفى على الجميع
تحياتي لك والله يديمك

[هايس الشمري]

شكرا يا مشعل


و شكرا يا عامر






اخوكم

[الامسح]

كل الشكر للأخ /مشعل الغفيلي على الايراد الجميل .......
الاخ /عامر الشلاقي تحيه لك وللمداخله المفيده كل التقدير لك

[عامر الشلاقي]

الاخوة هايس الشمري والامسح
شاكر ومقدر لكما شعوركما الطيب
تحياتي

[المهرة]

اهم شي اخوي مشعل قهويت الشايب


قصة حلووه وسعت صدورنا


شاكرة للاضافة الجميله اللي اضيفت هنا



اخي الفاضل /


مشعل


لك من الشكر مايفوق حدود الامتنان


دمت بخير


اختك / المهرة

[ريال الفسحه]

مشعل الغفيلي

سرد رائع والله ينطيك الف عااااااااااافيه.....

لـــــــــــــــــــــــــــــــــــــــ ــــــــــــــــــــكن!!

عندي لك اقتراح انا زي ماقريت وا كما شفت
من اكثر من سنه قبل لا اصبح عضوا معكم بهذا
كنت اقرا مواضيعك اللي هنا ((قصه وقصيده))
وانا عندي لك اقتراحن انشاء الله يعجبك.....

انا اشوف ان السوالف اللي تورده حلوه ومهمه لكل
شمري فانت تاتي بقصص لفرسان شمر وقصص غزليه
وقصص شمر مع القبايل<<طيب انت وش تبي

انا اقول لوتجمع جميع ماكتبته وتجعله كتااااااااب
وتضيف عليه اذا كان عندك شي؟.....

هو مجرد اقترااااح ولك الراي يالغاااااااالي...

[مشــــعل]

ياهلا بعامر

والف نعم يابعد حي بك وبعزوتك

والسوالف ماتزين الا الياجت من اهله لانه تكون اضبط واصح

الف شكر لك على تصحيح الاخطاء
وتوضيح ماخفي عنا

لاهنت يابعدحي

[مشــــعل]

ياهلا بمناكد

والف شكر يالغالي على مرورك

لاهنت