[align=center]
أعزائي في مضايفنا الكريمة ..
أولاً .. السلام عليكم ورحمة الله وبركاته ..
حبيت أشارك معاكم بهالقصة والقصيدة .. للشاعر
راعي مرات .. عبدالرحمن المجلي
***
كان شاعرنا مسافر إلى البحرين .. وبعد طول مدة عاد إلى داره .. فلما دخل الدار .. تخيل أن البيت جاء له منطلق من كثر شوقه له .. ويعاتبه على غيابه وابتعاده عنه .. ودار بينه وبين البيت حوار مثله لنا الشاعر بقصيدة ..
ويقول شاعرنا :
بعد أن دخلت منزلي بعد مدة عنه فتهيئا لي أنه يحدثني فكانت هذه الأبيات00وقد تفضل مشكوراً الأخ الشاعر/ حمد الدعيج( نديم كميت) بمجاراتها وكذالك الأخ الشاعر/ دعيج محمد الدعيج ..
القصيدة .. تقول ..
الـدار جانـي منطلـق يهـذل إهــذال ** يسكـب دمـوعٍ كنهـا شخـب هملـول
جانـي يسائلـنـي بـعـلام الآجــال ** اللي خلق سبـعٍ وسبـعٍ علـى الطـول
يقـول بشـر كيفكـم؟ كيـف الأطفـال؟ ** لـي مـدةٍ ماشـفـت منـكـم ولا زول
وشلونكـم؟؟ ياعلهـا تسـر الأحــوال ** من عقبكـم بالـي كسيـرٍ ومخـذول!!
في غيبتـك جانـي غرابيـل وأهـوال! ** وبعثت لك خمسـه وعشريـن مرسـول
ما وصلني رساله.. ولا صـوت جـوال ** أو وصلني عذرٍ صحيحٍ ومقبـول!
أخشـى يجينـي إن تماديتـو هـبـال! ** مقدر أعيش بدونكـم لـو ربـع حـول
عقب الونس.. والعز .. ومناطح الفـال ** أمسي وحيدٍ عن هـل الحـي معـزول!!
خليتنـي (للـبـوم) مـاكـر ومقـيـال ** مجلس رجالك يا ولـد صـار مقفـول؟!
مـن مـدةٍ ماشفـت مايبهـج الـبـال ** وين النشامى؟ ..والمسايير؟ ..والضول؟
يشكي.. ويبكي.. ضيقة الصدر والحـال! ** كِمـه مـن دمـوع المعانـاة مبـلـول
يكَسّـر العـبـرات والـدمـع هـمـال ** ومن شرهته سجمـت حايـر ومذهـول
يـادار لاتشكـي الوحـادة والاهـمـال ** هانت000 سنه والحزن ينزاح ويـزول
يـادار شيدتـك علـى نـايـفٍ عــال ** واختـرت جيرانـك صماصيـم وفحـول
يـادار شيَمّتـك عـن عفـون الأنـذال ** هراجة المجلس علـى غيـر محصـول
يـادار أنـا فـي دنيتـي دوم رحــال ** عفشي ..ونفشي.. فوق الامتان محمول
تلعـب بنـا الأيـام باقفـاي واقـبـال ** الوقت يمضي وسيف الاعمـار مسلـول
دنياً عجيبه طوحـت بـي وراء الجـال ** بارض (المنامه) صرت بالحيل مشغـول
حملي ثقيلٍ لو وطـى ( كميـت) يهتـال ** ولوهو بغيـري فـرع الـرأس مهبـول
وفـي ذمتـي مـازاد رزقـي ولا ريـال ** وزاد الحمل زودٍ علـى حملـي حمـول
أتمنى أنها تعجبكم .. وأن أعجبتكم وحبيتوا أحط لكم القصايد اللي جارتها .. فابشروا ..
وأن ما أعجبتكم .. فالشكوى على الله .. والله كريم ..
لكم أجمل تحية .. من ..
**أختكم .. السبيعية **
[/align]
رد مع اقتباس
المفضلات