يقولون بي جني .... ياقرد حظي ( الفزعه ياهل الطب)

[سيدة القـــــلم]

[align=center]صباح الخــير جميعــــا ...
أخواني الأفاضلــ لدي مشكلــه او بالأحرى مرض ولا أدري من اي نوع اصنف مرضي أهو نفسي أو عضوي ..

ووش رايكم احط الفصحى على جنب واحتسي عليكم بالعامي لأن من جد صدري ضايق واذا ضاق صدري كوود احووس بالحتسي

مشكلتي بدت معااي قبل سنه ونص تقريبا .. بدت معاي بشكل بسيط وكل ماتزود المده تزود المشكله ..

مشكلتي اني مااشوف ... مو يعني ان فيني عمــى لاسمح الله .. لا نظري الحمد لله سته على سته ... بس برضو ماشووف

وربي بلشت مدري شلون اوصل لكم معانااتي

يعني الأشياء الصغيره الي كبر حجم الفنجالـــ ما القاها الا بصعوبــه ..
مو عشان نظري ضعيف ..لا بس ماشوفهاا ابد مع انها تكون واضحه والعمى يشوفهاا

بضرب لكم مثال عشان تفهمون علي وهالمثال مر علي ..
قبل فتره كان معاي علبه كريم حجمها أصغر من حجم الفنجال شووي ..الكريم كان معاي ونا كنت على النت يعني قدام الكمبيوتر .. نزلت الكريم على الطاوله حقت الكمبيوتر ..
ويوم رجعت اباخذ الكريم مالقيته .. كنت على ثقه ان حطيت الكريم بالمكان هذاا بس مالقيتــه
حست المكتب كله الين افتر راسي ...
الين جاني اخووي وسئلني قلت ادور الكريم ووجهي منتفخ وأحمر من الحمقيه ..
تدرون وين لقاه ..؟؟
بمجرد ماناظر للطاوله قال هذا هو جنب الماوس ..

قلت ياربي وش فيني انااا ... شلون ماشفتوه ..؟؟
قال مافيكــ الا البواهه ...

عاد بالله هذي بواهه ؟؟؟

يعني أي شي بالحجم هذاا او أصغر منه مستحيل القااه او اشوفـــه ...
اشووفه اذا ماكنت أدور عليه وابغااه بالحاله هذي اشووفه ... بس الي ادور عليه مستحيل من سابع المستحيلات اشووفه ...

بقولكم وش صار معاي قبل يوومين ..

كان عندي مجلد فيه جميع ملفات الصوت الي تشتغل على الريل بلاير ..
فتحت المجلد وسحبت أغنيه عن طريق السحب والأفلات على سطح المكتب ... لأني أحب اسمع هالاغنيه دايم ..قلت بدال ماروح للمجلد كل مابغيت أسمعهاا احطها على سطح المكتب أسهل
المهم
حطيتها على سطح المكتب وسمعتها وبعدها قفلت الريل بلاير ..
بعد ساعه حبيت أسمعها .. دورتها مالقيتها ...
جلست ربع سااعه وعيوني مبققه على الشاشه ادورهاا .. مافي أمل القاهاا ..
وسوست زوود ... قلت بروح اجيب اخوي يشوف اذا لقاهاا معناهاا ان فيني بلا.. وبلا كايد بعد
وروح اصحي اخوي من نومه ..
وأول من ناظر لشاشه قال جعلك للعمى .. هذي هي على اليمين ..
انا طاح وجهي ونخرش قلبي .. معقوله لدرجه هذي علي قلّ صح ...

والايقونات الي بالمنتدى القاها بصعــــوبه بالغــــه ...
أمس كنت بنزل موضوع جلست خمس دقايق ادور زر الموضوع الجديد ..
عاد بالله في احد يضيع أزرار المواضيع ...؟؟

انا كل الايقونات اشوفهاا أذا ماكنت ابغاهاا
بس اذا بغيتهاا تنطمس عيوني وتطلع روحــي الين القاها ..

يعني لو تقولي ياعشق تشوفين العطر الي على الكومدينا ... بناظرها واقول اايه اشوفهاا
وبعد ساعه قلي ياعشق هات العطر .. اروح ادوره الين يفتر راسي مالقااه ..مع انه ماتحركـ
العطر من مكانه ..

أنا فيني خوف ورهــبه اخاف هالحاله تزود معااي ... لانها بدت معااي على خفيف وكل بعد مده تزود

الي خلاني اكتب أشكي لكم الحال اني اخوي الله يهديه خلاني أوسوس لانه يقولي أن حالتي

هذي تصير مع الي فيهم جن ... عاد انا من سمعت طاري الجـــن .. وربي بغيت انهــــبل

وربي من يومهاا ونا صدري ضايق والنفسيه زفت والأخلاق بالنازل

بس أتخيل شكل الجني الي فيني ...

عاد معقوله يكون فيني جني ..؟

ياااقرد حظي

تكفون ياأخوان الي مرت علــيه حاله زي كذاا يقولي ووش العلاج وهالمرض وش يسمونه
هل هو نفسه الشرود الذهني او غيره ..؟؟
وتكفون طمنوني هي حاله طبيعيه او مرض لازم أتعالج منووه ..؟؟

انتظر جوابكم

هالمره ماراح اقول تحياتي
مالي خلق اقولهاا


عشق القصيد [/align]

[الصيرمي]

تعوذ من ابليس وخم العافيه وعندك الصحين تروه عندوه علاج على ماتريد

ولاتنسى تقرا القران واترك عنك مقابل النت اربع طعشرين ساعه

والله يشفيك ولا يبلانا

تحياتي

[أسير الليل]

ما عندك إلا العافيه إن شاء الله عشق القصيد


لقد جاوبت على تساؤلك بنفسك , حينما قلت هل سببه شرود الذهن ؟


لا ننكر وجود الجن أعاذنا الله وأياكم منها , ولكن لا ننكر العلم أيظا لما له من دلائل ملموسه .

مختصر مفيد :

سبب حالتك والله اعلم يرجع الى :

- كثرة جلوسك امام شاشة الحاسوب .
- كثرة التفكير وعدم أعطاء المجال الكافي لراحة دماغك ( وهذا شيء سيء جدا وله مضاعفات خطيرة )

- محاولة هروبك من الواقع بسبب مشكلة ً ما لا ترغب بمناقشتها مع أي شخص وحتى مع نفسك .


ولهذه الأسباب لا تستطيع ان ترى هذه الأشياء .

الحل والعلاج :

قراءة ما تتيسر من القرآن الكريم .

- كثرة جلوسك امام شاشة الحاسوب .


التقليل من عدد ساعات الجلوس اما الحاسوب . أو أخذ الراحه 15 دقيقة لكل ساعة . ان تبتعد عن الجهاز أو التلفاز .





- كثرة التفكير وعدم أعطاء المجال الكافي لراحة دماغك ( وهذا شيء سيء جدا وله مضاعفات خطيرة )


يجب عليك تخصيص ساعه على اقل تقدير لا تعمل فيها اي شيء سوى الهدوء مع نفسك وأن تحاول بإن لا تفكر في أي شيء .


- محاولة هروبك من الواقع بسبب مشكلة ً ما لا ترغبين بمناقشتها مع أي شخص وحتى مع نفسك .


يجب عليك ان تواجه المشكله بطريقة ٍ أو أخرى , فإن لم تستطع فما عليك إلا أن تأخذ ورقه وقلم وأن تكتب ماذا يزعجك ثم قم بتمزيقها شر تمزيق , أو حرقها وكرر هذه العمليه 3 مرات في اليوم ولمدة 7 ايام أو لحين شعورك بالتحسن الكلي.


يوجد هنالك تمارين للعين :

أحياناً يشعر الأنسان بالتعب وعدم التركيز مع ألم حاد في العين أو يشعر في هذا الألم خلف بؤبؤء العين مباشرة , يكون سبب هذا الألم كثرة التركيز والنظر المكثف .

فخير طريقة لتجمبه هي أجراء تمارين العينين .

وهي كالآتي :

قم بتحريك العينين الى أقص اليمين وأنتظر لمدة ثلاثة ثواني .
أنظر الى الأمام ولمدة ثلاثة ثواني
ثم قم بالنظر الى أقصى اليسار ولمدة ثلاثة ثواني .

قم بالنظر الى الأعلى باقصى درجه ممكنه لمدة ثلاثة ثواني متواصله .
وكذلك بالنسبة للأسفل .

أترك مجال بين حركة وأخرى 3-7 ثواني .

قم بهذه العمليه قبل النوم , وفي حالات الأرهاق .


عافاك الله وشافاك يا عشق القصيد


تقلد تحياتي


المصدر :


The Relaxation & Stress Reduction workbook
الطبعة الرابعه
ل مارثا دايفس و, وبرفسور اليزابيث روبينس أيشل مان , و بروفيسور ماثيو ماكاي

[ابو فارس]

[poem=font="Simplified Arabic,4,black,normal,normal" bkcolor="transparent" bkimage="backgrounds/40.gif" border="none,4,gray" type=0 line=0 align=center use=ex num="0,black"]
وان دخلك في ظلام الليل جني=لاتخافه لاتخافه لاتخافه
كل ابوها سورتين ويرجهني=يطلع المعتوه ويجيك اعترافه[/poem]
---------------
حياك الله عشق القصيد
بصراحة هناك خلط كبير بين الاشياء النفسية
وبين الامراض التي سببها الجن (سحر .عين.مس. تلبس.وغيرها)
لكن بالعموم ان القرآن شفاء من كل هذه الامراض
سواء امراض جنية او نفسية
وفي الغالب ان اللي عندك شئ نفسي
اما عدم تركيز
او ان تركيزك في امر واحد بمعنى اخر انه حين تكون على الكمبيوتر
يصعب عليك التركيز على الاشياء الاخرى
وتحتاج الى نقلة بالتفكير من موضوع الى اخر حتى يتم التركيز تماما
جرب القرآن تجربة الواثق بانه شفاء وان العلاج متحقق باذن الله
وان الجن لايصمدون امامه ابدا
تمنياتي لك بالشفاء
ودمت بخير

[سيدة القـــــلم]

شكراً لكـ الصيرمــي ..
بس وش تقصد بالصحين ..؟؟
هو أسم مستشفى او اسم شيخ او ايش بالضبط ..؟؟

الف شكر لكـ

تحياتي
عشق القصيد

[سيدة القـــــلم]

[QUOTE=أسير الليل]ما عندك إلا العافيه إن شاء الله عشق القصيد


لقد جاوبت على تساؤلك بنفسك , حينما قلت هل سببه شرود الذهن ؟

أنشاءلله يكون شرود ذهنــــي وماله علاقـــه بالمس ...


لا ننكر وجود الجن أعاذنا الله وأياكم منها , ولكن لا ننكر العلم أيظا لما له من دلائل ملموسه .

مختصر مفيد :

سبب حالتك والله اعلم يرجع الى :

- كثرة جلوسك امام شاشة الحاسوب .

ماعتقد جلوسيعلى النت له علاقه .. لاني جلوسي على النت مايكون مكثف الا فتره الاجازات وايام الدراسه يكون قليل جدا


- كثرة التفكير وعدم أعطاء المجال الكافي لراحة دماغك ( وهذا شيء سيء جدا وله مضاعفات خطيرة )

بهـــذي معاكــ حق ..

- محاولة هروبك من الواقع بسبب مشكلة ً ما لا ترغب بمناقشتها مع أي شخص وحتى مع نفسك .

برضــــو معاكـــ حق بهذي

ولهذه الأسباب لا تستطيع ان ترى هذه الأشياء .

الحل والعلاج :

قراءة ما تتيسر من القرآن الكريم .

شفاء لكل داء

- كثرة جلوسك امام شاشة الحاسوب .


جزاكــ الله خير اخوي اسير اليلــ والي فهمته منكم كلكم ان العلاج بالقران هو العلاج الوحيد
الله شكر لكـ والله

تحياتي
عشق القصيد

[سيدة القـــــلم]

[poem=font="Simplified Arabic,4,black,normal,normal" bkcolor="transparent" bkimage="backgrounds/40.gif" border="none,4,gray" type=0 line=0 align=center use=ex num="0,black"]
وان دخلك في ظلام الليل جني=لاتخافه لاتخافه لاتخافه
كل ابوها سورتين ويرجهني=يطلع المعتوه ويجيك اعترافه[/poem]


كيف ماخـــافه ... بسم الله علينا وعلى محلنــا
أنا وش خلاني اكتب هنا وأطلب مشورتكم ورايكم الا انه خوف يكون فيني جني
ولو انه مرض نفسي كان على أقرب دكتور وونتهى الموضوع .. بس الجني لا لا لا ماقدر اتحمل طاريه فاكيف يكون فيني ...

---------------
حياك الله عشق القصيد
بصراحة هناك خلط كبير بين الاشياء النفسية
وبين الامراض التي سببها الجن (سحر .عين.مس. تلبس.وغيرها)
لكن بالعموم ان القرآن شفاء من كل هذه الامراض
سواء امراض جنية او نفسية
وفي الغالب ان اللي عندك شئ نفسي
اما عدم تركيز
او ان تركيزك في امر واحد بمعنى اخر انه حين تكون على الكمبيوتر
يصعب عليك التركيز على الاشياء الاخرى
وتحتاج الى نقلة بالتفكير من موضوع الى اخر حتى يتم التركيز تماما
جرب القرآن تجربة الواثق بانه شفاء وان العلاج متحقق باذن الله
وان الجن لايصمدون امامه ابدا


تمنياتي لك بالشفاء
ودمت بخير

أبو فارس جزانا واياكـ خير الجزاء وأثابكـ على ردكــ الدال على ثقتكـ بالله وعلى علمكـ
أسأل الله ان لايحرمكـ أجر ماكتبت لي

تحياتي
عشق القصيد

[هايس الشمري]

[align=center]شف انا كان عندي واحد من خوياي الله يرحموه توفى


كان مثل حالتك يعني يا بغى الحاجه ما يلقاه لو انه قدام عينوه


المهم ما خلا طبيب ما جاه ولا خطباء ما راح لهم


الوكاد ما خلى شين ما جاوه


دور دور ما لقى علاج


اخيرا مات من القهر


الله يرحمه و يرحم جميع اموات المسلمين و اللي يبون يموتون منهم


سلاااااااااااااااااااام [/align]

[المطنوخ]

اخيرا مات من القهر


الله يرحمه و يرحم جميع اموات المسلمين و اللي يبون يموتون منهم


سلاااااااااااااااااااام

ههههههههههههههههههههههههههههه
ههههههههههههههههههههههههههه

ياولد انت وشو هالرد

عشق القصيد يبي علاج ماهو زود فضخة قلب

عشق القصيد

مثل ما قال أخي اسير الليل

انا مرات خصوصا اذا كنت ابي اطلع من المكان ومستعجل اقعد ادور شغله وهي قدامي بس ما اشوفها

بس لي كنت مسترخي ومافيه شي شاغل تفكيري تختفي هالمشكله

وسالفتك هينه
انا مرات امشي بشارع او قاعد بعرس واكون سرحان وعيني بعين واحد ماسلمت عليه
هو يحسب اني جاحده ومطنشه وانا على نياتي وافكر بشغله وماشفته

فا مثل هالشغلات تصير وانشالله السالفه لا مس ولا هم يحزنون

بس القرآن مافيه مثله كعلاج

عسى الله يشفي علتك

دمت برعاية الله

[سيدة القـــــلم]

ذيب الله يصلح قلبكـ وش هالرد ..

أنت مو بعيد عن جدتي يوم قلت له بطني يعورني قالت وكااد ان بك سرطان ...
وش سرطان الله يهداك عندتس سعوط اعطيناا ماعندتس أسكتي ولاتفضخين قلبي بهالحتسي ..

على العموم الموت الحق

واالله يرحم خويكــ ويفغرلووه